Apple ក្រៅពី​ខ្លាំង​ខាង​ជំនួញ​ទូរស័ព្ទ រីឯ​ជំនួញ​កុំព្យូទ័រ​យូរដៃ​ក៏​ជោគជ័យ​គួរ​កត់​សម្គាល់​ផង​ដែរ។ រយៈពេល​ប៉ុន្មាន​ឆ្នាំ​ចុងក្រោយ​នេះ ក្រុមហ៊ុន​បច្ចេកវិទ្យា​អាមេរិក​នេះ ហាក់​មាន​ការ​ផ្ដោត​អភិវឌ្ឍ​ស៊េរី​កុំព្យូទ័រ​យួរដៃ MacBook Pro ​និង​ MacBook ១២អ៊ីញ​ខ្លាំង​ជាង​ស៊េរី​កុំព្យូទ័រ​ផ្សេងៗ។ ចំណែក​សេចក្ដី​រាយការណ៍​ថ្មី​នេះ អះអាង​ថា Apple អាច​​នឹង​មាន​របត់​ផ្លាស់ប្ដូរ​ខ្លះ ដោយ​ផលិត​ចេញ​ម៉ូដែល​កុំព្យូទ័រ​ធូរ​ថ្លៃ​ជាង​ស៊េរី​មុនៗ ​នឹង​ត្រូវ​ក្រុមហ៊ុន​ប្រកាស​នៅ​អំឡុង​ត្រីមាស​ទី២ ឆ្នាំ២០១៨ នេះ។

​បើ​តាមសេចក្ដី​រាយការណ៍​ពី​សារព័ត៌មាន 9to5Mac ដែល​បាន​លើក​យក​សម្ដី​អ្នក​ជំនាញ​វិភាគ​មក​ពី​ក្រុមហ៊ុន KGI Securities ​លោក Ming-Chi Kuo ​ឱ្យ​ដឹង​ថា លោក​ជឿ​ថា នឹង​មាន​វត្តមាន MacBook Air ​ស៊េរី​ថ្មី​ “មាន​ខ្ទង់​តម្លៃ​ទាប​” ប្រកាស​ដោយ Apple នៅ​អំឡុង​ត្រីមាស​ទី២ ឆ្នាំ​នេះ។ ម៉ាស៊ីន​ឡេបថប​ថ្មី​នេះ ធ្លាប់​ត្រូវ​រាយការណ៍​ដោយ​គេហទំព័រ Digitimes ​រួច​មក​ហើយ​កាលពី​ដើម​ឆ្នាំ២០១៨ កន្លង​ទៅ។ រចនាបថ​របស់ MacBook Air ​ទើបតែ​មាន​ការ​កែប្រែ​បន្តិចបន្តួច​ប៉ុណ្ណោះ​អស់​រយៈពេល ១០ឆ្នាំ​មក​នេះ។ Apple ​បាន​ដក​សមាជិក​ម៉ូដែល ១១អ៊ីញ និង ១៥អ៊ីញ ដោយ​ទុក​ជំនាន់ ១៣អ៊ីញ​ដែល​លក់​ក្នុង​តម្លៃ​ចាប់ពី ៩៩៩ដុល្លារ ទៅ ១១៩៩ដុល្លារ​អាមេរិក អាស្រ័យ​តាម​លក្ខណៈ​សម្បត្តិ​ខុស​គ្នា។ វា​នៅ​តែ​ទទួល​បាន​ការ​គាំទ្រ​ពី​សិស្ស​និស្សិត ដូច្នេះ​ជម្រើស​តម្លៃ​ទាប​ជាង​នេះ នោះ​នឹង​មិន​មាន​ត្រូវ​សង្ស័យ​ថា ប្រាកដ​ជា​ស្វាគមន៍​យ៉ាង​ខ្លាំង​ពី​ពួក​គេ​ឡើយ។ គេ​រំពឹង​ថា MacBook Air ​តម្លៃ​ធូរ​ថ្លៃ​ជាង​មុន ប្រហែល​នឹង​ត្រូវ​បង្កើន​លក្ខណៈ​សម្បត្តិ​ខ្ពស់ ទំនើប​ជាង​មុន​បន្តិច គឺ​លឿន​ជាង CPU ​ប្រភេទ 1.8GHz dual-core i5 ​កាលពី​ឆ្នាំ​មុន។ ក្រុមហ៊ុន​អាច​ថែមទាំង​ដក USB-A connector ដោយ​ទុក​តែ USB Type-C ​ប៉ុណ្ណោះ។ ផ្នែក​ដែល Apple នឹង​បង្កើន​សមត្ថភាព​គឺ​នៅ​លើ​កម្រិត resolution ឱ្យ​ខ្ពស់​ជាង 1440x900 ​ទៅ 1080 ​ឬ ខ្ពស់​ជាង​នេះ​ដើម្បី​ប្រកួតប្រជែង​នឹង resolution ​នៅ​លើ​ឡេបថបPC ។ លើស​ពី​នេះ លោក Kuo ​បាន​គូស​បញ្ជាក់​ថា AirPods ​ជំនាន់​ថ្មី​អាច​នឹង​បង្ហាញ​ខ្លួន​ក្នុង​ឆ្នាំ២០១៨ នេះ​ផង​ដែរ។ លោក​ថែមទាំង​លើកឡើង​ទៀត​ថា តម្រូវការ​ឧបករណ៍​បំពង​សំឡេង HomePod ​នឹង​មាន​កម្រិត​បង្គួរ៕ ​ដោយ៖ រឹទ្ធិរាជ ប្រភព៖ techspot