នៅក្នុងពិព័រណ៍អេឡិចត្រូនិក CES កាលពីខែមករាកន្លងទៅ ក្រុមហ៊ុន Samsung បានធ្វើបទបង្ហាញរួចហើយនូវទូរទស្សន៍ស៊េរីថ្មីទំនើបចុងក្រោយរបស់ខ្លួន The Wall ដែលមានទំហំយក្សរហូតដល់ ១៤៦អ៊ីញ។ វាគឺជាប្រភេទទូរទស្សន៍ម៉ូឌុល (modular TV) ដែលអាចប្រើជាមួយបន្ទះអេក្រង់ស្ដើងខុសៗគ្នា ដែលអាចកិបភ្ជាប់ទៅនឹងអេក្រង់តែមួយ ក្នុងទំហំជាង ១០០អ៊ីញ។
ប្រភេទទូរស័ព្ទស៊េរីថ្មី modular TV របស់ Samsung ត្រូវបានផលិតឡើងពីបន្ទះ microLED ដែលបន្ទះនីមួយៗមានទំហំ ៩,៣៧អ៊ីញ ហើយអាចភ្ជាប់ចូលគ្នាទៅជាអេក្រង់ដ៏ធំមួយបាន។ ក្រុមហ៊ុន Samsung បានលើកឡើងថា នៅពេលបន្ទះអេក្រង់តូចៗ ត្រូវបានបញ្ចូលគ្នា វានឹងអាចដំណើរការដូចជាទូរទស្សន៍ធម្មតាអីចឹង ហើយមិនបាត់គុណភាពបង្ហាញរូបទេ។
ក្រុមហ៊ុន Samsung ពេលនេះបានបញ្ជាក់ឱ្យដឹងជាសាធារណៈថា ទូរទស្សន៍ជំនាន់ថ្មីរបស់ខ្លួននេះ នឹងមានលក់នៅលើទីផ្សារចាប់ពីខែសីហា ឆ្នាំ២០១៨ នេះ។ ក្រុមហ៊ុនមិនបានបញ្ជាក់អំពីតម្លៃរបស់ The Wall នៅឡើយ ខណៈដែលសាធារណជនកំពុងរំពឹងថា តម្លៃរបស់វានឹងថ្លៃជាងទូរទស្សន៍ធម្មតា៕
ដោយ៖ រឹទ្ធិរាជ
ប្រភព៖ The Verge
