Facebook Lite សម្រាប់ទូរស័ព្ទធុនមធ្យមប្រើឱ្យស្រាលម៉ាស៊ីន ឥឡូវនេះប្រើបាននៅក្រៅទឹកដីអាមេរិក
Facebook Lite ដែលជាជំនាន់មួយបែកចេញពីកម្មវិធី Facebook ដើមសម្រាប់ទូរស័ព្ទ feature phone នោះ ឥឡូវនេះកំពុងត្រូវបានក្រុមហ៊ុនពង្រីកឱ្យប្រើបាននៅតាមបណ្ដាប្រទេសកំពុងអភិវឌ្ឍមួយចំនួនទៀតហើយ។ Facebook app ជំនាន់ Lite នេះ ត្រូវបានបង្កើតសម្រាប់ដំណើរការលើស្មាតហ្វូនធុនមធ្យម ដែលដើរត្រឹមប្រព័ន្ធ 2G ដើម្បីឱ្យកម្មវិធីដំណើរការរលូន។ ដូចទៅនឹង Messenger Lite ដែរ ទោះបីអ្នកប្រើជាមួយទូរស័ព្ទ Android ចាស់ៗ ឬអ៊ីនធឺណិតយឺត ក៏វានៅតែដើរស្រួលដែរ។
Facebook Lite ត្រូវបានដាក់ចេញឱ្យប្រើក្នុងឆ្នាំ២០១៥ ដែលធ្វើតេស្តដំបូងដោយបណ្ដាប្រទេសដូចជា៖ បង់ក្លាដេស នេប៉ាល់ នីហ្សេរីយ៉ា អាហ្វ្រិកខាងត្បូង ស៊ូដង់ ស្រីលង្កា វៀតណាម និងហ្ស៊ីមបាវ៉េ ប៉ុន្តែពេលនេះនឹងអាចដំណើរការបានជាង ១០០ប្រទេសឯណោះ។
Facebook Lite គឺជា APP ទម្ងន់ស្រាលត្រឹមតែ 252KB ហើយដំណើរការផ្អែកលើ Snaptu នៃ Facebook ដែលដំណើរការនៅលើទូរស័ព្ទប្រភេទ feature phone ។ បណ្ដាប្រទេសបន្ទាប់មួយចំនួន ដែលនឹងទទួលបានការប្រើ Facebook Lite នេះបន្តទៀតរួមមាន៖ អាមេរិក កាណាដា អូស្ត្រាលី អង់គ្លេស បារាំង អាល្លឺម៉ង់ អៀរឡង់ និងនូវែលហ្សេឡង់។ Facebook Lite នឹងមានដាក់ឱ្យទាញយកនៅតាមបណ្ដាញប្រទេសមួយចំនួនបន្ថែមទៀតចាប់ពីថ្ងៃសុក្រនេះតទៅហើយ៕
ដោយ៖ រឹទ្ធិរាជ
ប្រភព៖ theverge
