ក្រុមហ៊ុន Samsung បាន​បង្ហាញ​ស្មាតហ្វូន Galaxy S9 និង Galaxy S9 + នៅ​ចុង​ខែ​កុម្ភៈ​កន្លង​ទៅ ចំណែក​ពេល​នេះ​គេហទំព័រ TechInsights បាន​ធ្វើការ​វិភាគ​អំពី​ភាព​ខុស​គ្នា​រវាង​គ្រឿងបន្លាស់​និង​ការ​ផលិត​សម្រាប់​ម៉ូដែល Plus។ ថ្លៃ​ដើម​នៃ​ការ​ផលិត​ម៉ូដែល​គឺ​ចំណាយ​ប្រមាណ ៣៧៩ដុល្លារ ដែល​ជា​ថ្លៃ​ដើម​ផលិត​ខ្ពស់​ជាង Galaxy Note 8 ១០ដុល្លារ​ជា​ហេតុ​ធ្វើ​ឱ្យ S9 + ក្លាយ​ជា​ស្មាតហ្វូន មាន​តម្លៃ​ថ្លៃ​ជាង​គេ​បំផុត​របស់ Samsung នាពេល​បច្ចុប្បន្ន។

ការ​វិភាគ​នេះ​គឺ​ប្រៀបធៀប​រវាង Galaxy S9 + (ជំនាន់ Global version), Galaxy Note8, Galaxy S8 +, iPhone 8 Plus និង iPhone X ។ ក្នុង​ចំណោម​ទូរស័ព្ទ​ទាំងអស់​ ​មានតែ​ស្មាតហ្វូន​របស់​ក្រុមហ៊ុន Apple តែ​ប៉ុណ្ណោះ​ដែល​ប្រើ​ថ្លៃ​ដើម​ផលិត​ខ្ពស់​ជាង​គេ​គឺ​ ៣៨៩,៥ដុល្លារ ​ថ្លៃ​ជាង S9+ ប្រមាណ ១០ដុល្លារ។

បើ​និយាយ​អំពី​តម្លៃ​សម្រាប់​វត្ថុធាតុ​ផ្សេងៗ​វិញ​ដូច​ជា Chipset Exynos 9810 គឺ​មាន​តម្លៃ ៦៨ដុល្លារ, បន្ទះ Super AMOLED តម្លៃ​ប្រមាណ ៧២,៥ដុល្លារ ហើយ​ក៏​នៅ​មាន​ផ្នែក​សំខាន់​ៗ​ ដូច​ជា កាមេរ៉ា​ អង្គ​ចងចាំ និង​ផ្នែក​អេក្រង់​ទូរស័ព្ទ​ជាដើម បូក​សរុប​ទាំង​អស់​ធ្វើ​ឱ្យ​តម្លៃ​ខ្លួន S9 Plus ​ប្រើ​ថ្លៃ​ដើម ៣៧៩ដុល្លារ។ តម្លៃ​នេះ​មិន​ទាន់​រួម​បញ្ចូល​លើ​ការ​ចំណាយ​ផ្សេងៗ​ដូច​ជា​ការ​ស្រាវជ្រាវ និង​អភិវឌ្ឍ ការ​ចែកចាយ និង​ពន្ធ​នៅ​ឡើយ៕ ដោយ៖ រឹទ្ធិរាជ ប្រភព៖ gsmarena