នៅដើមខែមេសានេះ ច្បាប់ថ្មីរបស់រដ្ឋកាលីហ្វ័រញ៉ាដែលអនុញ្ញាតឱ្យក្រុមហ៊ុនផលិតរថយន្តស្វ័យប្រវត្តិ ក្រុមហ៊ុនបច្ចេកវិទ្យាខ្នាតយក្ស និងប្រជាជនក្នុងតំបន់ អាចធ្វើការសាកល្បងជិះរថយន្តទំនើបប្រភេទនេះដោយមិនចាំបាច់មានតៃកុង ឬអ្នកកាន់ចង្កូតនោះឡើយ។ ប៉ុន្តែមុននឹងក្រុមហ៊ុនទាំងនោះ អាចដឹងបញ្ចេញសមិទ្ធផលអមដោយមហិច្ឆតានៃរថយន្តតាក់ស៊ីស្វ័យប្រវត្តិនោះ គេត្រូវរង់ចាំរដ្ឋមួយនេះ អនុម័តសំណើដែលបានចេញដោយគណៈកម្មាធិការរដ្ឋកាលីហ្វ័រញ៉ាជាមុនសិន។ នេះដោយផ្អែកតាមប្រភពរាយការណ៍ពីគេហទំព័រ engadget ។
បទបញ្ជាដែលបានស្នើរបស់និយតករ នឹងអនុញ្ញាតឱ្យយានយន្តស្វ័យប្រវត្តិ បម្រើការដឹកជញ្ជូនដល់សាធារណជន ដែលជាផ្នែកមួយនៃកម្មវិធីសាកល្បង។ ដើម្បីចាប់ផ្ដើមជាមួយរថយន្តស្វ័យប្រវត្តិនេះ យ៉ាងហោចណាស់ក៏ត្រូវការអ្នកបើកបរបម្រុងទុក ដើម្បីធ្វើប្រតិបត្តិការឈប់ដាក់ភ្ញៀវបាន។ យ៉ាងណា វានឹងមិនជាបញ្ហាចោទធំដុំសម្រាប់គម្រោងអភិវឌ្ឍរថយន្តស្វ័យប្រវត្តិនោះទេ ព្រោះមានក្រុមហ៊ុនមិនបញ្ជាក់ឈ្មោះមួយបានដាក់ពាក្យស្នើសុំការអនុញ្ញាតឱ្យសាកល្បងរថយន្តគ្មានមនុស្សបើកបរនៅរដ្ឋកាលីហ្វ័រញ៉ា ហើយរំពឹងថា ការអភិវឌ្ឍនឹងឈានដល់ការផលិតរថយន្តបើកបរស្វ័យប្រវត្តិពេញលេញនៅពេលអនាគត។
បច្ចុប្បន្នរថយន្តដែលចូលរួមក្នុងកម្មវិធីសាកល្បងមិនអាចឈប់ចាំភ្ញៀវឡើង និងដាក់ភ្ញៀវចុះនៅឡើយ ហើយអ្នកដំណើរត្រូវតែមានអាយុចាប់ពី ១៨ឆ្នាំឡើង។ ក្រុមហ៊ុនទាំងឡាយដែលជ្រើសរើសចូលរួមក្នុងការធ្វើតេស្តនេះ ត្រូវរាយការណ៍ជាប្រចាំនូវរបាយការណ៍ដែលបង្ហាញពីចម្ងាយផ្លូវ ចំនួនជើងដែលបានធ្វើដំណើរ និងចំនួនភ្ញៀវដែលរថយន្តបានដឹក។ ចុងក្រោយ ក្រុមហ៊ុនត្រូវការរង់ចាំរយៈពេល ៩០ថ្ងៃបន្ទាប់ពីទទួលបានការអនុញ្ញាតឱ្យធ្វើតេស្តពី DMV មុនពេលរថយន្តរបស់ពួកគេ អាចចាប់ផ្ដើមចរាចរដឹកអ្នកដំណើរការផ្លូវការ៕
ដោយ៖ រឹទ្ធិរាជ
