ក្រុមហ៊ុន Apple នឹង​ប្រកាស​ចេញ​ iPhone SE ​ជំនាន់​ថ្មី​នៅ​ឧសភា​ខាង​មុខ​ នេះ​ដោយ​ផ្អែក​តាម​ការ​អះអាង​ដោយ​អ្នក​ផលិត​ស្រោម​ទូរស័ព្ទ ដែល​បាន​បញ្ជាក់​ទៅ​គេហទំព័រ​ជប៉ុន​ Mac Otakara ក្នុង​ពិព័រណ៍​គ្រឿង​អេឡិចត្រូនិក​ GSME ​នៅ​ហុងកុង​សប្ដាហ៍​នេះ។ ​ប្រភព​ខាង​លើ បាន​ឱ្យ​ដឹង​ទៀត​ថា Apple នឹង​ចេញ​លក់ iPhone ​លំដាប់​មធ្យម​ធូរ​ថ្លៃ​ជំនាន់​ថ្មី​របស់​ខ្លួន​នៅ​ក្នុង​ខែ​ឧសភា​ដដែល ដែល​វា​នឹង​មាន​រចនាបថ​តាម SE ជំនាន់​មុន​ច្រើន ហើយ​មាន​លក្ខណៈ​ខុស​គ្នា​ខ្លះ​បន្តិច។ ទំនង Apple នឹង​ដក​រន្ធ​កាស​នៅ​លើ iPhone SE ​ថ្មី តែ​នឹង​នៅ​រក្សា​ទ្រនាប់​ស្កេន​ក្រយៅដៃ​ដដែល។

iPhone SE ​ជំនាន់​ទី២ នឹង​បំពាក់​ឈីប​ Apple A10 Fusion ​ហើយ​មាន RAM 2GB រីឯ​អង្គ​ចងចាំ​មាន​ពីរ​ជម្រើស​គឺ 32GB ឬ 128GB ។ វា​ថែមទាំង​នឹង​ទទួល​បាន​ការ​បង្កើន​សមត្ថភាព​កាមេរ៉ា​គុណភាព​ខ្ពស់​ជាង​មុន។ iPhone SE ​ម៉ូដែល​បច្ចុប្បន្ន​មាន​តម្លៃ ៣៤៩ដុល្លារ​សម្រាប់​ម៉ូដែល 32GB ​ចំណែក 128GB តម្លៃ ៤៤៩ដុល្លារ។ ​Apple ថែមទាំង​នឹង​ប្រកាស​ចេញ iPhone ​កំពូល​ថ្មី​ម្ដង ៣ម៉ូដែល​នៅ​ឆ្នាំ​២០១៨ នេះ។ គេ​រំពឹង​ថា iPhone ទំនើប​ទាំង​៣ ​នឹង​មាន​អេក្រង់​ខុស​គ្នា ពោល​គឺ​ទំហំ ៦,១អ៊ីញ LCD ​ហើយ​ពីរ​ម៉ូដែល​ទៀត​នឹង​ប្រើ​ប្រភេទ​អេក្រង់ OLED ។ iPhone ប្រើ OLED នឹង​មាន​អេក្រង់ ៥,៨អ៊ីញ ​និង ៦,៥អ៊ីញ។ ឆាប់ៗ​ខាង​មុខ យើង​នឹង​បាន​ដឹង​ច្បាស់​អំពី​លក្ខណៈ​ពិសេសៗ​ផ្លូវការ​នៅ​លើ iPhone SE 2៕ សូម​អានអត្ថបទ៖ អ្នក​វិភាគព្យាករ ​IPhone X Plus នឹង​មាន​លក់​ក្នុង​តម្លៃ $999 ​ចំណែក IPhone X ​ថ្មី​ឆ្នាំ​នេះ​លក់​ត្រឹម $899 ដោយ៖ រឹទ្ធិរាជ