ថ្មីៗ​នេះ​ក្រុមហ៊ុន Samsung បាន​បង្ហាញ​របាយការណ៍​ពី​លទ្ធផល​ហិរញ្ញវត្ថុ នៅ​ក្នុង​សេចក្ដី​ប្រកាស​ព័ត៌មាន​ក្រុមហ៊ុន​បាន​និយាយ​ថា ការ​ចែកចាយ​លក់ Galaxy S9 និង S9 Plus ​បាន​ជួយ​បង្កើន​ប្រាក់​ចំណេញ​របស់​ខ្លួន។ យោងតាម​របាយការណ៍​ថ្មីៗ​នេះ​ឱ្យ​ដឹង​ថា Samsung បាន​ចែកចាយ​លក់ Galaxy S9 និង S9 Plus ដាច់​អស់​ប្រមាណ ៨លាន​គ្រឿង​នៅ​រយៈពេល ១ខែ​ដំបូង។

​ព័ត៌មាន​នេះ​ត្រូវ​បាន​រាយការណ៍​ចេញ​ពី​ក្រុមហ៊ុន​ស្រាវជ្រាវ​ទីផ្សារ​ Canalys ​ដែល​បាន​បង្ហាញ​ចេញ​តួលេខ​នេះ។ ក្រុមហ៊ុន Samsung ពិត​ជា​ធ្វើ​បាន​យ៉ាង​ល្អ​ជាមួយ​ការ​ចែកចាយ​លក់ Galaxy S9 យ៉ាងណា​វា​ត្រឹមតែ​ជា​តួលេខ​ប្រាក់ប្រហែល​នឹង​ការ​ចែកចាយ​ Galaxy S8 ប៉ុណ្ណោះ តែ​មិន​ទាន់​អាច​ប្រៀបធៀប​នឹង​លទ្ធផល​លក់ Galaxy S7 ទៅ​ទៀត ព្រោះ Samsung អាច​ធ្វើ​បាន​ដល់​ទៅ ៩លាន​គ្រឿង​អំឡុង​ពេល​ចេញ​លក់ Galaxy S7 រយៈពេល​ដំបូង។  

​ដូច្នេះ Galaxy S7 និង S7 Edge នៅ​តែ​ជា​ស្មាតហ្វូន​លក់​ដាច់​បំផុត​របស់ Samsung ហើយ​វា​ពិត​ជា​គួរ​ឱ្យ​ចាប់អារម្មណ៍​ប្រសិន​ការ​លក់ Galaxy S9 និង S9 Plus ជា​រួម អាច​យក​ឈ្នះ Galaxy S7 និង Galaxy S8 នោះ។ Galaxy S9 ​មាន​ទំហំ RAM 4GB ​បំពាក់ lens កាមេរ៉ា 12MP ចំនួន១ ​ខណៈ Galaxy S9+ ​មាន RAM 6GB ​និង​មាន​កាមេរ៉ា​ក្រោយ​ភ្លោះ​ទំហំ 12MP ទាំង​ពីរ។ ស្មាតហ្វូន Android កំពូល​ទាំង​ពីរ​នេះ បំពាក់​ឈីប​ពីរ​ជម្រើស​គឺ Exynos 9810 ឬ Qualcomm Snapdragon 845 ។ អង្គ​ប្រតិបត្តិ​នៅ​លើ Galaxy ថ្មី​នេះ នឹង​បែកចែក​លក់​ទៅតាម​ទីផ្សារ​ផ្សេង​គ្នា ជាក់ស្ដែង​ទីផ្សារ​អាមេរិក​នឹង​ត្រូវ​ដាក់​លក់​ម៉ូដែល​ប្រើ​ឈីប Snapdragon 845៕ ដោយ៖ រឹទ្ធិរាជ