ចាប់តាំង​ពី​ត្រីមាស​ទី៣ ឆ្នាំ២០១៣ មក នេះ​ជា​លើក​ដំបូង​ហើយ​ដែល​តួលេច​ចែកចាយ​ស្មាតហ្វូន​នៅ​ទីផ្សារ​ប្រទេស​ចិន​បាន​ធ្លាក់​ចុះ​មិន​ដល់ ១០០លាន​គ្រឿង នាំ​ឱ្យ​ការ​ចែកចាយ​ស្មាតហ្វូន​សកល​ក៏​ធ្លាក់ ២,៩% ផង​ដែរ​គិត​នៅ​ត្រីមាស​ដំបូង​ឆ្នាំ២០១៨។ ស្មាតហ្វូន​ប្រមាណ ៣៣៤,៣លាន​គ្រឿង​ត្រូវ​បាន​ចែកចាយ​ពី​ខែ​មករា ដល់​ខែ​មីនា ដែល​ជា​តួលេខ​ថយចុះ​ពី ៣៤៤,៤លាន​គ្រឿង​គិត​ក្នុង​រយៈពេល​ដូច​គ្នា​កាលពី​ឆ្នាំ​ទៅ។ យ៉ាងណា Samsung នៅ​តែ​ឈរ​នៅ​លេខ​រៀង​កំពូល ជា​ក្រុមហ៊ុន​លក់​ស្មាតហ្វូន​បាន​ច្រើន​បំផុត​ទូទាំង​សកលលោក សរុប​ប្រមាណ ៧៨,២លាន​គ្រឿង។

យ៉ាងណា​តួលេខ​លក់​បាន​របស់ Samsung ​ខាង​លើ មាន​ការ​ធ្លាក់​ចុះ ២,៤% ​ពី ៨០,១លាន​គ្រឿង​បើ​ប្រៀបធៀប​នឹង​រយៈពេល​ដូច​គ្នា​កាលពី​ឆ្នាំ​ទៅ។ បើ​គិត​ពី​ចំណែក​ទីផ្សារ​វិញ Samsung ទទួល​បាន ២៣,៤%។ ចំណែក Apple ​ស្ថិត​នៅ​លេខ​រៀង​បន្ទាប់ ​ដោយ​ចែកចាយ​ទូរស័ព្ទ iPhone ​ដាច់​បាន ៥២,២លាន​គ្រឿង​អំឡុង​ត្រីមាស​ដូច​គ្នា ជា​តួលេខ​កើនឡើង​ពី ៥០,៨លាន​គ្រឿង​ធៀប​នឹង​ត្រីមាស​ដដែល​កាលពី​ឆ្នាំ​ទៅ។ តួលេខ​ដែល Apple ក្ដាប់​បាន​នេះ គឺ​ស្មើ​នឹង​ចំណែកទីផ្សារ​ ១៥,៦% ។ រីឯ Huawei ស្ថិត​នៅ​លំដាប់​លេខ៣ លក់​ស្មាតហ្វូន​ដាច់​បាន​ប្រមាណ ៣៩,៣លាន​គ្រឿង ស្មើ​នឹង ១១,៨% ជា​លទ្ធផល​វិជ្ជមាន​ធៀប​នឹង ១៤,៧% កាលពី​ឆ្នាំ​ទៅ។ ងាក​មក​មើល​ក្រុមហ៊ុន Xiaomi និង Oppo វិញ គឺ​ទទួល​បាន​ចំណាត់ថ្នាក់​បន្តបន្ទាប់។ Xiaomi រក​ចំណែកទីផ្សារ​បាន ៨,៤% កើន​ឡើង​ពី ៤,៣% ធៀប​នឹង​ឆ្នាំ​ទៅ បើ​គិត​ជា​តួលេខ​គឺ ២៨លាន​គ្រឿង។ ដោយឡែក Oppo មាន​ចំណែកទីផ្សារ​ធ្លាក់​ចុះ​ពី ៧,៥% មក​នៅ​ត្រឹម ៧,១% ​គិត​ជា​តួលេខ​គឺ​មាន ២៣,៩លាន​គ្រឿង៕ ​ដោយ៖ រឹទ្ធិរាជ