​រូបថត​បែកធ្លាយ​ថ្មីៗ​នេះ បាន​បង្ហាញ​ឱ្យ​ឃើញ​នូវ​កញ្ចក់​ការពារ ​សម្រាប់​ស្មាតហ្វូន​ថ្មី Google Pixel 3 និង Pixel 3 XL។ យើង​ឃើញ​ទម្រង់​រចនា screen protector ​នេះ ត្រូវ​បាន​ទុក​ប្រឡោះ​សម្រាប់​ចំហ​ត្រង់ stereo speaker ក៏​ដូច​ជា​ក្បាល​ឆក notch ​លើ​ម៉ូដែល XL។ និយាយ​រួម រូបរាង​ឌីហ្សាញ​លើ Pixel 3 ទាំង​ពីរ​ម៉ូដែល​នឹង​ស្លីម គែម​ស្ដើង​ជាង​ជំនាន់​មុន។

យើង​បាន​ដឹង​ថា ប្រព័ន្ធ​ប្រតិបត្តិការ Android P របស់ Google គឺ​បង្កើត​តម្រូវ​អេក្រង់​ឆក ដែល​ឃើញ​មាន​នៅ​លើ​ស្មាតហ្វូន​ទំនើបៗ​ប៉ុន្មាន​ម៉ូដែល​ចុងក្រោយ​របស់​ក្រុមហ៊ុន​ទូរស័ព្ទ​ល្បីៗ។ នេះ​ជា​សញ្ញាណ​បញ្ជាក់​ថា Google អាច​នឹង​ប្រឡូក​ចេញ​ស្មាតហ្វូន​អេក្រង់ notch នឹង​គេ​ដែរ។

ក្រឡេក​មើល​រូបថត​បែកធ្លាយ​នេះ ហាក់​បង្ហាញ​ឱ្យ​ឃើញ​ថា ស្មាតហ្វូន​ទាំងពីរ Pixel 3 XL និង Pixel 3 ​នឹង​បន្សល់​ទុក​មុខងារ​ល្អ​មួយ​ដូច​នៅ​លើ Pixel ជំនាន់​បច្ចុប្បន្ន​ដែរ ដោយ​នឹង​មាន​សំឡេង​ជា stereo speaker ​បំពាក់​នៅ​ខាង​មុខ ហើយ​ក៏​អាច​ជា​កាមេរ៉ា​ភ្លោះ​ខាង​មុខ​ដែរ។ នេះ​អាច​ជា​ការ​កែប្រែ​ថ្មី​ដ៏​គួរ​ឱ្យ​ចាប់អារម្មណ៍ ប្រសិន​បើ Google ពិត​ជា​កែប្រែ​ពី​ប្រព័ន្ធ​កាមេរ៉ា​មួយ​ទៅ​ភ្លោះ​មែន​នោះ៕ ​ដោយ៖ រឹទ្ធិរាជ