៥យ៉ាងជៀសវាងឱ្យបាន មិនត្រូវបង្អួតប្រាប់គេនៅលើ Facebook ទេ ព្រោះអាចនាំទុក្ខដាក់ខ្លួន
ទន្ទឹម Facebook កំពុងផ្ដល់ភាពងាយស្រួលដល់មនុស្សជុំវិញពិភពលោកភ្ជាប់ទំនាក់ទំនងគ្នា ទាំងទីជិតទីឆ្ងាយបាន ក៏មានផលវិបាកមួយចំនួនកើតចេញពីការបង្ហោះរឿងរ៉ាវផ្សេងៗនៅលើ Facebook ផងដែរ។ ខាងក្រោមនេះ គឺជារឿង ៥យ៉ាងមិនគួរបង្ហោះនៅលើ Facebook ឡើយ ព្រោះអាចនាំទុក្ខដាក់ខ្លួនអ្នក៖
១) អាសយដ្ឋានដែលលោកអ្នកកំពុងស្ថិតនៅ
សម្រាប់មនុស្សដែលកំពុងប៉ុនប៉ងធ្វើរឿងមិនល្អ ដូចជាលួច ឬប្លន់លើរូបអ្នក គេអាចតាមដានសកម្មភាពផ្សេងៗរបស់អ្នកបានច្រើនវិធី ក្នុងនោះ Facebook ក៏អាចជាកន្លែងមួយដែលជនទុច្ចរិតតាមដានអ្នកផងដែរ។ ប្រសិនលោកអ្នកបង្ហោះរូបថតពីទីកន្លែងកម្សាន្ត ឬសកម្មភាពកំពុងលេងកម្សាន្តផ្សេងៗ នោះជនល្មើសអាចនឹងកំណត់ដឹងពីទីតាំងរបស់អ្នកបាន និងងាយស្រួលធ្វើរាល់សកម្មភាពល្មើសផ្សេងៗ។ ដូច្នេះ អ្នកមិនគួរបង្ហោះពីអាស័យដ្ឋាន ឬទីតាំងដែលអ្នកស្ថិតនៅនោះទេ។
ក្នុងនោះ ព័ត៌មានទំនាក់ទំនងផ្ទាល់ខ្លួនរបស់អ្នក (Contact and Basic Info) ក៏គួរដកចេញផងដែរ ដើម្បីជៀសវាងជនទុច្ចរិតស្វែងរកអាសយដ្ឋានរបស់អ្នកឃើញ។ ដើម្បីលុប សូមចូលទៅ Wall របស់ខ្លួនអ្នក រួចចុចលើប៊ូតុង Update Info។ ការបង្ហាញចេញអាសយដ្ឋានមួយទៀត ដែលអ្នកមិនបានចាប់អារម្មណ៍នោះ គឺនៅពេលអ្នកចូលរួមព្រឹត្តិការណ៍នានា (event)។
ប្រសិនបើអ្នកបង្កើត event នោះអាសយដ្ឋាន ឬទីតាំង (Location) អាចនឹងត្រូវបង្ហាញចេញ ដូច្នេះមនុស្សទាំងឡាយអាចដឹងថា អ្នកទៅទីណាបាន។ ប្រសិនអ្នកបង្កើត event លក្ខណៈសាធារណៈ (Public) ទៀត នោះមនុស្សទាំងឡាយ ដែលមិនមែនជា friend ក៏អាចមើលឃើញ ហើយ friend របស់អ្នកក៏អាចអញ្ជើញភ្ញៀវតៗគ្នា ពោលនោះ ទីតាំងអាសយដ្ឋានរបស់អ្នកនឹងលែងជាការសម្ងាត់ អាចត្រូវបានក្រុមជនទុច្ចរិតឆ្មក់ប្រព្រឹត្តសកម្មភាពល្មើសផ្សេងៗបាន។
២) ព័ត៌មានពាក់ព័ន្ធនឹងកន្លែងការងារ
ព្យាយាមកុំដាក់ព័ត៌មានផ្សេងៗនៅលើ Facebook ពាក់ព័ន្ធនឹងទីកន្លែងការងាររបស់អ្នក ព្រោះជនទុច្ចរិតអាចដើរតួ មកសុំធ្វើជាបុគ្គលិកបំពេញកិច្ចការជាមួយអ្នកបាន។ ប្រសិនបើនរណាម្នាក់នៅកន្លែងការងាររបស់អ្នក ស្វែងរកមិត្តរួមការងារនៅលើ Facebook គេប្រហែលជាអាចរកឃើញអ្វីមួយដែលគេមិនពេញចិត្ត។ ដូច្នេះការដែល hacker បំបែកប្រព័ន្ធសុវត្ថិភាព ជ្រៀតចូលក្រុមហ៊ុនរបស់អ្នក ប្រមូលយកព័ត៌មានអំពីបុគ្គលិក នោះគឺជារឿងដែលត្រូវធ្វើដំបូងគេ។
ដូច្នេះលោកអ្នកគួរលុបចេញនូវព័ត៌មានទាក់ទិននឹងការងាររបស់អ្នកបច្ចុប្បន្ន ហើយត្រូវជ្រើសរើសឱ្យម៉ត់ចត់ថាតើបុគ្គលិកការងារណា ជាមិត្តភ័ក្ដិរបស់អ្នក។ ទន្ទឹមនោះ លោកអ្នកក៏មិនគួរ Post រឿងរ៉ាវមិនសប្បាយចិត្តចំពោះការងាររបស់អ្នក និងកិច្ចការផ្ទៃក្នុងរបស់ក្រុមហ៊ុនដែរ ព្រោះចំណុចអវិជ្ជមានទាំងនេះ មិនបានជួយជាប្រយោជន៍អ្វីនោះទេ តែបែរជាធ្វើឲ្យប៉ះពាល់ដល់ទំនាក់ទំនងបុគ្គលិកការងារ ឬប៉ះពាល់ដល់ចៅហ្វាយក៏ថាបាន។
៣) ស្ថានភាពទំនាក់ទំនងផ្សេងៗរបស់អ្នក
ការបង្ហាញស្ថានភាពទំនាក់ទំនងរបស់អ្នកជាសាធារណនៅលើ Facebook គឺជារឿងឆ្គាំឆ្គងមួយ ដែលអ្នកមិនគួរធ្វើ ព្រោះចំណងមិត្តភាព ឬស្នេហានោះអាចមានការប្រែប្រួលមិននៅស្ថិតស្ថេរនោះឡើយ។ អ្នកអាចសប្បាយចិត្តជាមួយចំនួន Like និង commend អបអរសាទរពី friend របស់អ្នក ក្នុងការដែលអ្នក បង្ហោះអំពីស្ថានភាពល្អកំពុងមានទំនាក់ទំនងស្វែងរកគូស្រករ (dating), រៀបការ នៅលីវ ឬ post ស្មុគស្មាញជាច្រើនទៀត នោះនឹងធ្វើឱ្យ friend មិនត្រឹមតែច្រណែន តែថែមទាំងអាចធុញទ្រាន់ ព្រមទាំងយល់ឃើញមិនល្អចំពោះលោកអ្នកទៅវិញ។
ការដែលសំខាន់ នៅពេលលោកអ្នកមានការផ្លាស់ប្ដូរទំនាក់ទំនងពីល្អទៅអាក្រក់ ពីអាក្រក់ទៅជាល្អ ឬម្ដងមានទំនាក់ទំនងល្អជាមួយអ្នកនេះ ម្ដងល្អជាមួយអ្នកនោះ សកម្មភាពបង្ហោះរឿងរ៉ាវច្រំដែលបែននេះ នឹងធ្វើឲ្យ friend កើតចិត្តស្អប់ ហើយយល់ថាអ្នកគ្រាន់តែជាមនុស្សឥតប្រយោជន៍ ឬថោកទាបទៅវិញ។
៤) ព័ត៌មានពីការចាយវាយរបស់អ្នក
Facebook គឺផ្ដល់ឱ្យអ្នកប្រើប្រាស់បណ្ដាញសង្គមនេះ ដោយឥតគិតថ្លៃ ប៉ុន្តែក៏មានលក្ខខណ្ឌខ្លះត្រូវការឱ្យអ្នកប្រើ (user) បញ្ចូលព័ត៌មានអំពីកាតឥណទានផងដែរ។ ជាក់ស្ដែងការបន្ថែមព័ត៌មានហិរញ្ញវត្ថុ ដើម្បីអាចទិញ gift card, ផលិតផលផ្សេងៗ ព្រមទាំងការចាយវាយលើការផ្សព្វផ្សាយ (advertisement)។ ដូច្នេះ វិធីដ៏ល្អបំផុត ដើម្បីមានសុវត្ថិភាព ជៀសវាងមានគេលួចចាយលុយក្នុងគណនីរបស់អ្នក អ្នកគួរតែចាកចេញពី Facebook Profile ឬ Log Out មិនថា នៅផ្ទះ កន្លែងការងារឬកុំព្យូទ័រសាធារណនោះទេ ពោលនៅពេលឈប់ប្រើគួរតែ Log Out ដាច់ខាត។ មិនថា សមាជិកគ្រួសារ មិត្តភ័ក្ដិ ឬមនុស្សចម្លែកនោះទេ គឺគេអាចលួចចាយប្រាក់ក្នុងគណនីរបស់អ្នកបានទាំងអស់តាម Facebook។
៥) លេខទូរស័ព្ទរបស់អ្នក
មុខងារសុវត្ថិភាពពិសេសមួយចំនួននៅលើ Facebook គឺមានដូចជា Login Notification និង Login approval ជាដើម គឺត្រូវការលេខទូរស័ព្ទរបស់អ្នក។ ការបំពេញលេខទូរស័ព្ទ ជាលក្ខណៈ ដើម (default) គឺមនុស្សគ្រប់គ្នាសុទ្ធតែអាចមើលឃើញលេខរបស់អ្នកបាន ទោះបីអ្នកមិនចង់ឱ្យលេខទូរស័ព្ទទៅនរណាក៏ដោយ។ ដូច្នេះគេអាចកត់ទុក និងព្យាយាម hack គណនីរបស់អ្នកបានតាមរយៈការស្គាល់លេខទូរស័ព្ទនេះ។
ដើម្បីដោះស្រាយបញ្ហានេះ សូមចូលទៅ Profile របស់អ្នកដោយចុចលើឈ្មោះរបស់អ្នក ស្ថិតនៅផ្នែកកំពូលនៃ Facebook page។ ចុចលើប៊ូតុង Update Info ហើយចូលទៅត្រង់ផ្នែក Contact and Basic Info។ នៅត្រង់ផ្នែក Mobile Phones សូមដាក់ mouse ពីលើ នោះអ្នកនឹងឃើញមានពាក្យ Edit សូមចុចលើ Edit។ ត្រង់នេះ សូមចុចលើ icon រូបមេសោ រួចជ្រើសរើសយក Only Me ដើម្បីលាក់បាំងមិនឱ្យអ្នកដទៃឃើញក្រៅពីខ្លួនអ្នក។ រួចចុចលើប៊ូតុង Save Changes។
ម្យ៉ាងលោកអ្នកមួយចំនួនមានទម្លាប់ប្រកាសលេខទូរស័ព្ទថ្មី នៅពេលទូរស័ព្ទមុនបានបាត់។ ប្រការនេះក៏គួរជៀសវាងផងដែរ។ ការធ្វើដូច្នេះ មិនត្រឹមតែផ្ដល់លក្ខណៈងាយស្រួលដល់ hacker លួចគណនីទេ តែថែមទាំងផ្ដល់ការរំខានទៅថ្ងៃក្រោយព្រោះតែ មានគេផ្ញើសារជាច្រើនមករំខានអ្នកទៅវិញ៕
ដោយ៖ រឹទ្ធិរាជ
