អនាគត បច្ចេកវិទ្យា នឹងដណ្ដើមការងារ ចុះមនុស្សត្រូវធ្វើដូចម្ដេច?
ការងារស្ទើរគ្រប់វិស័យ ក្នុងប្រទេសអភិវឌ្ឍន៍នាបច្ចុប្បន្ន ត្រូវបានកាត់បន្ថយកម្លាំងមនុស្ស ជំនួសមកវិញដោយបច្ចេកវិទ្យា។ តួយ៉ាងកាលពីពេលថ្មីៗកន្លងទៅ មេក្រុមហ៊ុនបច្ចេកវិទ្យាធំៗដូចជា លោក Bill Gates ស្ថាបនិក Microsoft លោក Elon Musk ស្ថាបនិក Tesla លោក Jim Yong Kim ប្រធានធនាគារពិភពលោក និងបុគ្គលសំខាន់ៗជាច្រើនផ្សេងទៀត បានសម្ដែងក្ដីបារម្ភជាខ្លាំងថា មនុស្សអាចនឹងបាត់បង់ការងារនាពេលអនាគត។
បុគ្គលទាំងនេះ បានទទួលស្គាល់ថា បច្ចេកវិទ្យាបានផ្ដល់ភាពងាយស្រួលច្រើន ដូចជា ការបង្កើនផលិតភាពការងារ និងការបង្កើនស្តង់ដារនៃការរស់នៅជាដើម ក្នុងពេលបច្ចុប្បន្ន និងកាន់តែប្រសើរនាពេលអនាគាត ហើយក៏គ្មានអ្វីអាចបញ្ឈប់បច្ចេកវិទ្យា មិនឱ្យកើតមានបានដែរ។ ក្នុងរបាយការណ៍អភិវឌ្ឍន៍ពិភពលោកប្រចាំឆ្នាំ ២០១៩ ស្ដីអំពី “ការផ្លាស់ប្ដូររបៀបនៃការងារ" ចុះផ្សាយដោយធនាគារពិភពលោក ថ្ងៃទី១២ ខែតុលា ឆ្នាំ ២០១៨ លោក Jim Yong Kim ប្រធាន World Bank បានប្រាប់ថា របៀបនៃការធ្វើការ មិនត្រឹមតែផ្លាស់ប្ដូរទេ ថែមទាំងផ្លាស់ប្ដូរលឿនទៀតផង។
លោកមិនដឹងការងារអ្វីទេ ដែលក្មេងៗជំនាន់ក្រោយ នឹងត្រូវប្រជែង ពីព្រោះការងារទាំងនោះ មិនទាន់កើតមាននៅឡើយ។ លោក Jim Yong Kim ថា៖ "បញ្ហាប្រឈមដ៏អស្ចារ្យ គឺបំពាក់បំប៉នពួកគេនៅជំនាញ នោះពួកគេនឹងមិនខ្លាច នៃការប្រែប្រួលការងារក្នុងថ្ងៃអនាគតឡើយ"។ ជំនាញដែលលោក Kim បានលើកឡើង គឹជំនាញដោះស្រាយបញ្ហា ជំនាញគិត (Criticle Thinking) និងជំនាញទំនាក់ទំនង មានដូចជា ចិត្តសាស្ត្រ និងកិច្ចសហប្រតិបត្តិការ។ ដើម្បីធ្វើទៅបាន ថាតើរដ្ឋាភិបាលនៃប្រទេសនីមួយៗ វិនិយោគជំនាញទាំងនេះ លើប្រជាជនរបស់ពួកគេយ៉ាងដូចម្ដេច ហើយលោកសង្ឃឹមថា អ្វីបានលើកឡើង នឹងជួយរដ្ឋាភិបាលរៀបចំពលរដ្ឋខ្លួនឱ្យបានល្អប្រសើរ ដើម្បីជួយអនាគតសេដ្ឋកិច្ចប្រទេស។
របាយការណ៍អភិវឌ្ឍន៍ពិភពលោកប្រចាំឆ្នាំ២០១៩ ស្ដីអំពី “ការផ្លាស់ប្ដូររបៀបនៃការងារ" បានឱ្យដឹងដែរថា បើទោះបច្ចេកវិទ្យាជួយការងារបានច្រើន ក្នុងយុគសម័យថ្មីនេះក៏ដោយ ប៉ុន្តែវាអាចនឹងធ្វើឱ្យមានអស្ថិរភាពប្រាក់ចំណូល និងកង្វះការការពារសង្គម។ អ្វីជាការការពារសង្គម? ការការពារសង្គម ជាការព្រួយបារម្ភ ចំពោះការទប់ស្កាត់ ការគ្រប់គ្រង និងការជំនះស្ថានភាព ដែលជះឥទ្ធិពលយ៉ាងធ្ងន់ធ្ងរ ទៅលើសុខុមាលភាពរបស់ប្រជាជន។
វាមានបូកបញ្ចូលគោលនយោបាយ និងកម្មវិធីនានា ដែលត្រូវបានរៀបចំឡើង ដើម្បីកាត់បន្ថយភាពក្រីក្រ និងភាពងាយរងគ្រោះតាមរយៈការលើកកម្ពស់ទីផ្សារការងារ ប្រកបដោយប្រសិទ្ធភាព កាត់បន្ថយហានិភ័យរបស់ប្រជាជន និងបង្កើនសមត្ថភាពរបស់ពួកគេ ក្នុងការគ្រប់គ្រង ហានិភ័យសេដ្ឋកិច្ច និងសង្គម ដូចជា ភាពអត់ការងារធ្វើ ជំងឺ ពិការភាព និងភាពចាស់ជរា។
របាយការណ៍ដដែលបន្តថា មនុស្ស ៤ នាក់ក្នុងចំណោម ៥នាក់ នៅប្រទេសកំពុងអភិវឌ្ឍន៍មិនដឹងអ្វីជា ការការពារសង្គមទេ។ មនុស្ស ២ លាននាក់ ធ្វើការក្នុងវិស័យមិនផ្លូវការ គ្មានស្ថិរភាពប្រាក់ចំណូលការងារ គ្មានសុខុមាលភាពសង្គម ឬគ្មានទទួលបានអត្ថប្រយោជន៍ពីការអប់រំ៕
ដោយ៖ សុវណ្ណមុនីលីតា
