ស្របពេលដែលបច្ចេកវិទ្យាទូរគមនាគមន៍កំពុងមានការវិវឌ្ឍន៍ទៅរកភាពកាន់តែជឿនលឿនពីមួយថ្ងៃទៅមួយថ្ងៃ មនុស្សក៏កំពុងមានការភ័យខ្លាចពីផលប៉ះពាល់សុខភាពដោយសាររលកវិទ្យុសកម្មដែរ។ ជាក់ស្ដែងស្មាតហ្វូតនាពេលបច្ចុប្បន្ននេះ បានក្លាយជាឧបករណ៍យ៉ាងសំខាន់សម្រាប់ប្រាស្រ័យទាក់ទងគ្នាចម្ងាយឆ្ងាយមិនថាជាសំឡេង រូបថត និងវីដេអូឆ្លើយឆ្លងគ្នាក៏បាន។ ប៉ុន្តែ ទន្ទឹមនឹងគុណសម្បត្តិក៏នៅមានគុណវិបត្តិមកជាមួយគ្នាផងដែរ។ បញ្ហាធំគឺ ស្មាតហ្វូនមាននូវវិទ្យុសកម្មដែលអាចបង្កគ្រោះថ្នាក់ដល់សុខភាពរបស់អ្នកប្រើបាន។
ទូរស័ព្ទទូទៅ (Cellphone) និងស្មាតហ្វូនគឺប្រើប្រេកង់ រលកវិទ្យុ (Radio Frequency)/microwave ដើម្បីធ្វើការបញ្ជូន និងទទួលព័ត៌មាន (information) ដែលមានទម្រង់ជា សំឡេង, ទិន្នន័យ(data) ឬវីដេអូ។ ដូច្នេះហើយ ទើបឧបករណ៍អេឡិចត្រូនិកចល័តនេះ មានសមត្ថភាពអាចឲ្យអ្នកភ្ជាប់ទំនាក់ទំនង (ខលទូរស័ព្ទ) ជាមួយមិត្តភ័ក្ដិ ឬក្រុមគ្រួសារបាន។
ដោយសារតែបែបនេះហើយ ទើបមនុស្សបានយកទូរស័ព្ទមកធ្វើជាមិត្តយ៉ាងជិតស្និទ្ធ តែងតែយកតាម និងដាក់ជាប់ខ្លួនជានិច្ច ប៉ុន្តែសូមស្វែងយល់ឲ្យបានច្បាស់ថា សកម្មភាពជារៀងរាល់ថ្ងៃរបស់អ្នកដូចនេះ គឺកំពុងប្រឈមនឹងផលប៉ះពាល់សុខភាពពីវិទ្យុសកម្មអេឡិចត្រូនិកដែលមាននៅលើទូរស័ព្ទ។
តាមធម្មតារាល់ទូរស័ព្ទដែលកំពុងចរាចរនៅលើទីផ្សារ គឺសុទ្ធតែត្រូវបានត្រួតពិនិត្យយ៉ាងត្រឹមត្រូវ នូវកម្រិតវិទ្យុសកម្មដែលធ្វើឡើងដោយគណៈកម្មការគមនាគមន៍សហព័ន្ធ (FCC) របស់បណ្ដាប្រទេស ផ្សេងៗ។ សម្រាប់ FCC របស់អាមេរិក គេកំណត់ និងហៅការសាយភាយរលកវិទ្យុសកម្មអេឡិចត្រូនិកនៅលើទូរស័ព្ទថា ជាអត្រាស្រូបយកជាក់លាក់តាងដោយ “SAR” ដែលមិនឱ្យមានតម្លៃលើសពី ១,៦វ៉ាត់ក្នុងមួយគីឡូក្រាមនៃជាលិកា (1.6W/kg) នោះទេ ព្រោះវាជាតម្លៃគ្រោះថ្នាក់ខ្ពស់បំផុតដែលធ្វើឱ្យប៉ះពាល់សុខភាពមនុស្ស។
ផ្អែកតាមសារព័ត៌មាន iphonetricks.org ឱ្យដឹងថា ក្នុងពេលដែលអ្នកនិយាយទូរស័ព្ទ ដើម្បីកាត់បន្ថយការរលកវិទ្យុសកម្មមកប៉ះនឹងខ្លួន ឬក្បាលរបស់អ្នកខ្លាំង អ្នកត្រូវ៖
-រក្សាគំលាតទូរស័ព្ទដាក់នៅឆ្ងាយពីផ្នែកក្បាលរបស់អ្នក។ គេអាចប្រើប្រាស់កាសទូរស័ព្ទជំនួសឱ្យការដាក់ទូរស័ព្ទផ្អោបផ្ទាល់នឹងត្រចៀក
-បើគ្មានកាស គេអាចបើកទូរស័ព្ទ ឮសំឡេងចេញក្រៅ (load speaker) ដើម្បីនិយាយ ដោយមិនចាំបាច់ដាក់ទូរស័ព្ទជាប់នឹងត្រជាក់ក៏បាន។ តាមរយៈនេះ អ្នកនឹងអាចដកគំលាតខ្លួនអ្នកពីទូរស័ព្ទបានយ៉ាងហោច ៣ហ្វីត ឬប្រហែល ១ម៉ែត្រ ដែលអាចកាត់បន្ថយកម្រិតសាយភាពវិទ្យុសកម្មមកលើខ្លួនអ្នកបាន។
-ប្រសិនទូរស័ព្ទមិនអាចដាក់ load speaker បាន អ្នកក៏អាចប្រើវិធីសាស្ត្រដំឡើងសំឡេងទូរស័ព្ទក្នុងពេលសន្ទនាឱ្យខ្ពស់បំផុត នោះប្រហែលជានៅតែអាចស្ដាប់ឮភាគីនិយាយបាន ទោះបីកាន់ទូរស័ព្ទដកឃ្លាចេញពីត្រចៀកបន្តិចក៏ដោយ។
-អ្នកនឹងអាចដកគម្លាតយ៉ាងហោចពី ២ ទៅ ៣អ៊ីញ ឬប្រហែលពី ៥សង់ទីម៉ែត្រ ទៅ ១០សង់ទីម៉ែត្រពីត្រចៀក។
អ្នកស្រី Magda Havas សាស្ត្រាចារ្យនៅវិទ្យាស្ថានសិក្សាផ្នែកសុខភាព Institute for Health Studies របស់សាកលវិទ្យាល័យ Trent ក្នុងប្រទេសកាណាដាបានប្រាប់ទូរទស្សន៍ CNN ថា នៅពេលអ្នកកាន់ទូរស័ព្ទនៅឆ្ងាយប្រហែលចម្ងាយ ២អ៊ីញ នឹងអាចកាត់បន្ថយចំហាយវិទ្យុសកម្មបាន ៤%។ យ៉ាងណាអ្នកជំនាញបានណែនាំថា ប្រសិនអាចជៀសវាងបាន អ្នកគួរកុំនិយាយទូរស័ព្ទច្រើន ហើយប្ដូរមកជាការផ្ញើសារអក្សរជំនួសវិញ៕
