ហេតុផល ៥ យ៉ាងដែលបញ្ជាក់ថាអ្នកគួរចំណាយពេលសម្រាកខ្លះ
ពិតណាស់ថាមុខជំនួញ ការសិក្សា ឬការងាររបស់អ្នកមានភាពមមាញឹកខ្លាំងក៏ពិតមែន តែយ៉ាងណាអ្នកក៏គួរឆ្លៀតពេលសម្រាកខ្លះកុំឲ្យសុខភាពអ្នកចុះទ្រុឌទ្រោមទាន់។ ត្រឹមពេលពីរទៅបីនាទី ហើយធ្វើវាពីរទៅបីដងក្នុងមួយថ្ងៃ ដោយឆ្លៀតពេលដើរចេញពីកំព្យូទ័រ និងទូរស័ព្ទរបស់អ្នក យ៉ាងហោចណាស់ក៏អនុញ្ញាតឲ្យភ្នែកអ្នកសម្រាកដែរ ហើយខាងក្រោមនេះជាហេតុផលដែលអ្នកគួរតែសម្រាកខ្លះ÷
១) គំនិតល្អនឹងត្រលប់មកវិញពេលអ្នកសម្រាក÷ នេះជាហេតុផលមួយដែលអ្នកត្រូវងូតទឹកជាប្រចាំថ្ងៃ ពេលងូតទឹកយើងអាចសម្រាកខូរក្បាល សម្រាកភ្នែក គ្មានអារម្មណ៍ថារំខាន ធ្វើឲ្យអារម្មណ៍អ្នកបានស្រស់ថ្លាឡើងវិញ។ បន្ទាប់ពីនោះគំនិតថ្មីៗនឹងត្រលប់ចូលមកក្នុងខួរក្បាលរបស់អ្នក។
២) ខួរក្បាលអ្នកត្រូវការសម្រាកនិងបញ្ចូលថាមពល÷ មិនខុសពីថ្មទូរស័ព្ទទេខូរក្បាលអ្នកក៏ត្រូវការបញ្ចូលថាមពលឡើងវិញបន្ទាប់ពីប្រើវាអស់ ហើយវាត្រូវការសម្រាកនៅពេលដែលអ្នកប្រើប្រាស់វាមិនឈប់។
៣) ខួរក្បាលរបស់អ្នកនឹងត្រលប់មករឹងម៉ាំដូចដើម÷ ចូរប្រៀបធៀបខួរក្បាលរបស់អ្នកទៅនឹងសាច់ដុំ ព្រោះសាច់ដុំតែងត្រូវការសម្រាកបន្តិច ឬម៉ាស្សាថ្មមៗបន្ទាប់ពីហាត់ប្រាណរួចដើម្បីបង្កើនថាមពលឡើងវិញ។
៤) ខួរក្បាលរបស់អ្នកត្រូវការពេលវេលាដើម្បីដំណើរការព័ត៌មានថ្មី÷ នៅពេលសម្រាកខួរក្បាលរបស់អ្នកចាប់ផ្តើមរំឮកអ្វីដែលបានកើតឡើងឬបទពិសោធន៍ទាំងអស់ហើយវាបញ្ជូនព័ត៌មានទាំងនោះទៅអង្គចងចាំអចិន្ត្រៃយ៍រយៈពេលវែង “សម្តីរបស់លោក Loren Frank ជំនួយការសាស្រ្តចារ្យនៅ UC San Francisco” បន្ទាប់ពីនោះ វានឹងធ្វើឲ្យខួរក្បាលរៀននិងចងចាំបានល្អនូវព័ត៌មានសំខាន់ៗ ដែលវាហាក់ដូចជាទូរស័ព្ទដៃ Smart Phone របស់អ្នកដែលផ្ទុកបានការងារជាច្រើន។
៥) វាល្អសម្រាប់រាងកាយអ្នក÷ ពិតណាស់ប់អ្នកមានបញ្ហាស្រ្តេសច្រើន អ្នកអាចប្រឈមមុខនឹងបញ្ហាបេះដូង ជំងឺបាក់ទឹកចិត្ត បញ្ហាប្រព័ន្ធរំលាយអាហារ លើសទំងន់និងបញ្ហាសុខភាពដទៃទៀត។ បញ្ហាសុខភាពរយៈពេលយូរនឹងធ្វើឲ្យអ្នកឃ្លាតឆ្ងាយពីមុខជំនួញដែលអ្នកខិតខំបង្កើតកសាងវាឡើង។ យកពេលគិតពីសុខភាពផ្ទាល់ខ្លួនប្រសិនបើចង់បានក្តីស្រមៃនៃភាពជោគជ័យក្នុងមុខជំនួញរបស់អ្នក។៕
ដោយ៖ ទីន ម៉ាទីយ៉ា
