Jack Ma ថា បច្ចេកវិទ្យា AI នឹងធ្វើឲ្យមនុស្សធ្វើការត្រឹម ១២ ម៉ោងក្នុងមួយសប្តាហ៍
មហាសេដ្ឋីចិនលោក Jack Ma បានលើកឡើងថា ជាមួយនឹងភាពរីកចម្រើនវិស័យបច្ចេកវិទ្យា នៅពេលអនាគត បច្ចេកវិទ្យាឆ្លាតវៃសិប្បនិម្មិត (Artificial Intelligence) នឹងអាចធ្វើឲ្យមនុស្សធ្វើការត្រឹមតែ ១២ ម៉ោងប៉ុណ្ណោះក្នុងមួយសប្តាហ៍។
ដោយបានថ្លែងនៅក្នុងវេទិកាពិភពលោកមួយស្ដីពីបច្ចេកវិទ្យាឆ្លាតវៃសិប្បនិម្មិត (World Artificial Intelligence Conference) ធ្វើឡើងនៅទីក្រុងសៀងហៃប្រទេសចិនកាលពីសប្តាហ៍មុន មហាសេដ្ឋីមានប្រាក់ ៣៨ ពាន់លានដុល្លាររូបនេះបាននិយាយដូច្នេះថា៖« ខ្ញុំគិតថា មនុស្សគួរធ្វើការត្រឹម ៣ ថ្ងៃបានហើយក្នុងមួយសប្តាហ៍ ឬ ៤ម៉ោងក្នុងមួយថ្ងៃ»។
«ខ្ញុំគិតថា ដោយសារតែបច្ចេកវិទ្យាឆ្លាតវៃសិប្បនិម្មិត AI វានឹងធ្វើឲ្យមនុស្សយើងមានពេលច្រើនជាងមុនដើម្បីធ្វើរឿងសប្បាយៗក្នុងជីវិត។ ខ្ញុំមិនគិតថា នៅពេលអនាគតមនុស្សយើងនឹងត្រូវរកការងារធ្វើច្រើនដូចឥឡូវនេះទេ។ ការងារដែលយើងត្រូវការ គឺការងារដែលធ្វើឲ្យមនុស្សសប្បាយចិត្ត ការងារដែលផ្តល់បទពិសោធន៍ល្អក្នុងជីវិត ការងារសប្បាយៗ»។ នេះជាការបញ្ជាក់បន្ថែមរបស់ប្រធានក្រុមហ៊ុន Alibaba រូបនេះ។
នៅអំឡុងពេលកំពុងមានវត្តមាននៅលើវេទិកានេះជាមួយនាយកប្រតិបត្តិក្រុមហ៊ុន Tesla គឺលោក Elon Musk មហាសេដ្ឋី Jack Ma បានលើកឧទាហរណ៍មួយនៃបដិវត្តឧស្សាហកម្ម និងអគ្គិសនីដើម្បីបង្ហាញពីរបៀបដែលភាពជឿនលឿនផ្នែកបច្ចេកវិទ្យា បានជួយបង្កើតតុល្យភាពជីវិត និងការងារកាន់តែប្រសើរឡើង។ លោកថា ថាមពលអគ្គិសនី ធ្វើឲ្យមនុស្សកាន់តែមានពេលទំនេរច្រើនជាងមុន ដូច្នេះអ្នកអាចទៅច្រៀងខារ៉ាអូខេនៅពេលល្ងាចឬ ក៏អ្នកអាចទៅចូលរួមពិធីជប់លៀងរាំលេងកម្សាន្តសប្បាយៗជាមួយមិត្តភក្ដិរបស់អ្នកបានដោយមិនសូវខ្វាយខ្វល់ដូចមុនឡើយ។
ទាក់ទងទៅនឹងការយល់ឃើញខាងលើនេះគេអាចសង្កេតបានថា មិនមែនមានតែមហាសេដ្ឋីចិនរូបនេះទេដែលមានភាពសុទិដ្ឋិនិយមចំពោះបដិវត្តបច្ចេកវិទ្យា AI នៅពេលអនាគត។ សូម្បីតែមហាសេដ្ឋីអាមេរិក លោក Bill Gates ក៏ធ្លាប់បានលើកឡើងផងដែរថា AI នឹងធ្វើឲ្យការងាររបស់មនុស្សកាន់តែមានគុណភាពល្អ ហើយមនុស្សនឹងមានពេលទំនេរដើរ លំហែកាន់តែយូរជាងមុន។
«គោលបំណងរបស់មនុស្សយើងមិនមែនចង់អង្គុយធ្វើការនៅមុខកុំព្យូទ័ររាប់ម៉ោង ឬអង្គុយលក់រាល់ថ្ងៃពីពីព្រលឹមទាល់ព្រលប់ទេ។ មនុស្សយើងមានពេលទំនេរកាន់តែច្រើន មិនមែនជារឿងអាក្រក់នោះទេ»។ លោក Bill Gates បញ្ជាក់បន្ថែម៕
ប្រភព៖CNBC
