អ្នកជំនាញព្យាករថា តម្លៃអចលនទ្រព្យនឹងនៅតែមានទីផ្សារខ្ពស់រយៈ៣-៥ឆ្នាំបន្ត
ភ្នំពេញ៖ អ្នកជំនាញអចលនទ្រព្យព្យាករថា តម្លៃដីធ្លី ផ្ទះសម្បែង វីឡា ខុនដូ នៅតែមានទីផ្សារខ្ពស់ក្នុងរយៈពេល៣ទៅ៥ឆ្នាំខាងមុខ ទោះបីមានផលរំខានមួយចំនួនតូចកើតឡើងក៏ដោយ។
ក្នុងវេទិការៀបចំដោយក្លិបអ្នកកាសែតកម្ពុជាស្តីពីស្ថានភាពអចលនវត្ថុនៅកម្ពុជាក្នុងពេលបច្ចុប្បន្ននិងទៅថ្ងៃអនាគតនាថ្ងៃទី១៩ ខែកញ្ញា ឆ្នាំ២០១៩ នៅភោជនីយដ្ឋានមួយក្នុងរាជធានីភ្នំពេញ លោក ច្រឹក សុខនីម ប្រធានសមាគមអ្នកវាយតម្លៃនិងភ្នាក់ងារអចលនវត្ថុកម្ពុជា បានអះអាងថា វិស័យអចលនទ្រព្យនៅក្នុងប្រទេសកម្ពុជានៅតែមានភាពរឹងមាំដោយឈរលើកត្តាជាច្រើនក្នុងនោះមានដូចជា ប្រទេសមានសន្តិភាព ហើយតម្រូវការរស់នៅតាមខុនដូកាន់តែច្រើន និន្នាការនៃការរស់នៅបែកគ្រួសារមានសមាជិកច្រើននៃមនុស្សសម័យថ្មី ការកើនឡើងនៃចំណូលក្នុងស្រុកសរុប ឥទ្ធិពលនៃការចូលរួមវិនិយោគរបស់ក្រុមហ៊ុនធំៗមកពីក្រៅប្រទេស។
លោកបានបន្តថា បច្ចុប្បន្ននៅក្នុងខេត្តចំនួន៥ មានខេត្តព្រះសីហនុ ខេត្តសៀមរាប ខេត្តបាត់ដំបង ខេត្តកោះកុង និងខេត្តកំពត បានចូលរួមយ៉ាងសកម្មជាទិសដៅក្នុងការអភិវឌ្ឍលើវិស័យអចលនទ្រព្យនៅកម្ពុជា។ លោកក៏បានបង្ហាញគោលការណ៍ពីរចំណុចដើម្បីវិនិយោគដីឡូតិ៍ឱ្យបានជោគជ័យដោយ ទី១. ត្រូវមើលចំនួនប្រជាជនតិចឬច្រើននៅតំបន់ដែលត្រូវវិនិយោគ ទី២. មើលតំបន់នោះមានការអភិវឌ្ឍដូចជា មានផ្សារ រោងចក្រសហគ្រាស និងអគារពាណិជ្ជកម្មផ្សេងៗឬទេ។
លោក ម៉ាន់ ច័ន្ទឌី អនុប្រធានសមាគមអ្នកវាយតម្លៃនិងភ្នាក់ងារអចលនវត្ថុកម្ពុជាបានបង្ហាញពីប្រធានបទ «ស្ថានភាពវិស័យដីឡូតិ៍» លោកបានលើកឡើងថា ការទិញដីធ្លីត្រឹមត្រូវដោយមានការដឹងឮពិតប្រាកដពីអាជ្ញាធរពាក់ព័ន្ធគ្រប់លំដាប់ថ្នាក់ថា ជាដីស្របច្បាប់សម្រាប់ទុកលក់បន្តនៅតែមានសក្តានុពលខ្ពស់នាពេលបច្ចុប្បន្ននេះ។
លោកក៏បានក្រើនរម្លឹកដល់អ្នកចង់រកស៊ីវិស័យដីធ្លីថា«មុនវិនិយោគត្រូវពិនិត្យមើលការិយាល័យរបស់គេឱ្យបានច្បាស់លាស់ ប្លង់ដីឱ្យបានច្បាស់លាស់ កិច្ចសន្យាគួរឱ្យជឿជាក់បានកម្រិតណា មិនមែនកិច្ចសន្យាគ្រាន់តែក្រដាស់បន្តិចក៏ជឿជាក់នោះទេ »។
លោក ម៉ាន់ ច័ន្ទឌី បានបង្ហាញសញ្ញាវិជ្ជាមានថា វិស័យដីឡូតិ៍នៅតែមានលក្ខណៈល្អប្រសើរដែលអ្នកមានចំណូលមធ្យម ចំណូលទាប អាចវិនិយោគទៅលើដីឡូតិ៍បាន។ ជាមួយគ្នានេះលោកបានសង្កត់ធ្ងន់ថា សន្សំលុយនៅក្នុងដីឡូតិ៍ប្រសើរជាងសន្សំលុយនៅក្នុងធនាគារ។
លោក ហ៊ឹម សីហា នាយកផ្នែកស្រាវជ្រាវ VTRUST APPRAISAL បានឱ្យដឹងថា តម្រូវការផ្ទះសម្បែងរស់នៅក្នុងរាជធានីភ្នំពេញសព្វថ្ងៃនេះគឺស្ថិតក្នុងកម្រិតខ្ពស់ដោយក្នុងមួយឆ្នាំមានចំនួន២ម៉ឺនខ្នង(ផ្ទះផ្ទាល់ដី ផ្ទះក្នុងបុរីជាដើម)។ ដោយឡែក ខុនដូមានចំនួន១ម៉ឺនខ្នង ចំពោះចំនួនអគារដែលបានសាងសង់ចប់ និងកំពុងសាងសង់មានចំនួន៦ម៉ឺនខ្នង ហើយចំនួននេះមានការកើនឡើងជាបន្តបន្ទាប់ បើបូកសរុបអគារគ្រប់ប្រភេទទាំងអស់អាចឈាន៧សែនខ្នងក្នុងឆ្នាំ២០៣០ ប៉ុន្តែតម្រូវការនៅពេលនោះអាចឈានដល់៨១ម៉ឺនខ្នង។
នាយកផ្នែកស្រាវជ្រាវរូបនេះ បានបញ្ជាក់ថា «ការផ្គត់ផ្គងនេះមិនទាន់គ្រប់គ្រាន់ផង យើងផ្គត់ផ្គង់បានតែជាង៧សែនខ្នងទេនៅឆ្នាំ២០៣០ មានន័យថា កម្លាំងនៃការស្រូបទាញខ្លាំងមែនទែន នេះជាផ្នែកមួយនៃការទស្សន៍ទាយរបស់យើង»៕
ដោយ៖ ស្រីពេជ្រ
