អ្នក​ជំនាញ​ព្យាករថា អាគារ​ខ្នាត​ធំ​នៅ​ភ្នំពេញ​នឹង​កើន​ដល់​ជាង​៤​សែន​ក្នុង​ឆ្នាំ​២០៣០​



ប្រភេទ​អគារ​ខ្នាត​ធំ​ដែល​មាន​ទំហំ​ចាប់​ពី​១ម៉ឺនម៉ែត​ការ៉េ​ឡើង​នា​រាជធានី​ភ្នំពេញ​ ដូច​ជា​ប្រភេទ​អាគារ​កាណាឌីយ៉ា និង​អគារ​វឌ្ឍនៈ​ជា​ដើម ត្រូវ​បាន​អ្នក​ជំនាញ​ព្យាករថា នឹង​កើន​ឡើង​ដល់​ ៤៧១,០០០ម៉ែតការ៉េ នៅ​ក្នុង​ឆ្នាំ​២០៣០​ខាង​មុខ​នេះ។ នេះ​បើ​តាម​លោក ហឹម សីហា អ្នក​ជំនាញ​ខាង​វាយ​តម្លៃ​អចលនទ្រព្យ បាន​លើក​ឡើង​នៅ​ក្នុង​កម្មវិធី «ទុន​គំនិត​នៃ​ការ​ស្វែង​យល់​ពី​សេដ្ឋកិច្ច​ក្នុង​វិស័យ​អចលនទ្រព្យ» កាល​ពី​ពេល​ថ្មីៗ​កន្លង​ទៅ​។

លោក ហឹម សីហា ប្រធាន​ផ្នែក​ស្រាវជ្រាវ​នៃ​ក្រុមហ៊ុន Vtrust Appraisal បាន​លើក​ឡើង​ថា ចំពោះ​អាគារ​ដែល​មាន​ទំហំ​ធំ​ចាប់​ពី​១ម៉ឺនម៉ែត​ការ៉េ​ឡើង​នា​រាជធានី​ភ្នំពេញ​ គិត​មក​ដល់​ឆ្នាំ​២០១៨​គឺ​មាន​ចំនួន​ជាង ១សែន​៨ម៉ឺនម៉ែតការ៉េ (sq.m)។ ជា​មួយ​គ្នា​នេះ លោក​ សីហា បាន​ព្យាករណ៍​ថា អគារ​ទំហំ​ធំ​ប្រភេទ​នេះ​ នៅ​រាជធានី​ភ្នំពេញ​នឹង​បន្ត​កើន​ឡើង​រហូត​ដល់​ ៤សែន​អគារ​នៅ​រយៈពេល​ប្រមាណ​១០​ឆ្នាំ​ខាង​មុខ​ទៀត។

អ្នក​ជំនាញ​រូប​នេះ​ក៏​បាន​ព្យាករណ៍​ផង​ដែរ​ថា ប្រភេទ​ផ្សារ​ទំនើប (Shopping mall) និង​មាន​កំណើន​ខ្ពស់​ជាង​គេ គឺ​នៅ​ក្នុង​កំឡុង​ឆ្នាំ​២០៣០​អាច​កើន​ដល់​ជិត​១លានម៉ែតការ៉េ ជា​ចំនួន​មួយ​ដែល​មាន​កំណើន​ខ្ពស់។ កំណើន​ខាង​លើ​នេះ​ កើន​ឡើង​ដោយ​សារ​តែ​ចំណូល​របស់​ពលរដ្ឋ​កើន​ឡើង រួម​ផ្សំ​នឹង​ការ​វិវត្ត​នៃ​ជីវភាព​រស់​នៅ​របស់​ពួកគាត់​ទៅ​កាន់​ភាព​ទាន់​សម័យ និង​ស៊ីវីល័យ ដូច​ជា​ការ​និយម​ទិញ​ទំនិញ ម្ហូប​អាហារ​តាម​ផ្សារ​ទំនើប​ជា​ដើម។

ជា​មួយ​គ្នា​នេះ​វិស័យ​អូតែល​ដែល​ជា​ផ្នែក​មួយ​នៃ​វិស័យ​អចលនទ្រព្យ ក៏​ត្រូវ​បាន​អ្នក​ជំនាញ​រូប​នេះ​ព្យាករណ៍​ថា និង​មាន​កំណើន​កើន​ឡើង​រហូត​ដល់​រាប់​សែន​បន្ទប់​ឯណោះ​នៅ​ក្នុង​ឆ្នាំ​២០៣០ សម្រាប់​បម្រើ​ឲ្យ​វិស័យ​ទេសចរណ៍​។ បើ​ក្រឡេក​ទៅ​មើល​ចំនួន​ទេសចរណ៍​អន្តរជាតិ​មាន​ចំនួន​១០លាននាក់ ចំណែក​ឯ​ទេសចរណ៍​ក្នុង​ស្រុក​មាន​រហូត​ដល់​២០លាននាក់​ឯណោះ ដូច្នេះ​តម្រូវ​ការ​យ៉ាង​ហោច​ណាស់​ក៏​មាន​ជាង​១សែន​បន្ទប់​សម្រាប់​ពួកគាត់​ដែរ៕

ដោយ៖ ជួប ស្រីរ័ត្ន

X
5s