ថៃជាប់លេខ៦ជាប្រទេសល្អជាងគេលើលោកក្នុងការត្រៀមខ្លួនការពារសុខភាពពលរដ្ឋនៅគ្រាអាសន្ន
បច្ចុប្បន្ននេះពិភពលោកទាំងមូលកំពុងភ័យខ្លាចទៅនឹងការឆ្លងរីករាយដាលនៃជំងឺ Covid-19 ដែលបានសម្លាប់មនុស្សជាង ៣ពាន់នាក់ និងជាង ៩ ម៉ឺននាក់ផ្សេងទៀតបានឆ្លងជំងឺនេះ។ នៅក្នុងស្ថានភាពនេះ មានសំនួរមួយចោទសួរឡើងថា តើមានប្រទេសណាខ្លះដែលអាចត្រៀមខ្លួនការពារសុខភាពពលរដ្ឋរបស់ខ្លួនបានយ៉ាងល្អជាងគេនៅពេលមានជំងឺ ឬផលប៉ះពាល់សុខភាពនៅគ្រាអាសន្ននេះ?
យោងតាមទិន្ន័យចេញផ្សាយនៃសន្ទស្សន៍សុវត្ថិភាពសុខភាពសកល (Global Health Security Index) ដែលបានចេញផ្សាយកាលពីខែតុលាឆ្នាំ ២០១៩ កន្លងទៅបានបង្ហាញឈ្មោះប្រទេសចំនួន ១០ ដែលឈានមុខគេក្នុងការត្រៀមខ្លួនការពារសុខភាពពលរដ្ឋរបស់ខ្លួននៅពេលមានអាសន្ន។ ដោយបានសិក្សាលើប្រទេសចំនួន ១៩៥ របាយករណ៍នេះបានរកឃើញថា សុវត្ថិភាពសុខភាពរបស់ប្រជាជននៃបណ្តាប្រជាជាតិភាគច្រើនស្ថិតនៅក្នុងកម្រិតខ្សោយបំផុត។
របាយការណ៍នេះបានបន្តទៀតថា មកទល់នឹងពេលនេះគ្មានប្រទេសណាមួយអាចត្រៀមខ្លួនបានពេញលេញ ១០០% ដើម្បីការពារសុខភាពពលរដ្ឋរបស់ខ្លួននោះទេ ដើម្បីប្រឆាំងទប់ទល់ទៅនឹងការរីករាលដាលនៃជំងឺកាចសាហាវផ្សេងៗ ឬជំងឺរាតត្បាតថ្មីៗ។
ទោះបីជាមិនបាន១០០% ក៏ពិតមែន ក៏ប៉ុន្តែទិន្នន័យខាងលើរកឃើញប្រទេសចំនួន ១០ ដែលបានពិន្ទុច្រើនជាងគេ (ពិន្ទុពី០-១០០) លើការការពារសុខភាពពលរដ្ឋរបស់ខ្លួន។ ក្នុងនោះថៃជាប្រទេសដែលបានត្រៀមខ្លួនការពារសុខភាពពលរដ្ឋក្នុងគ្រាអាសន្នបានល្អជាងគេនៅក្នុងតំបន់អាស៊ានដែលបានឈរនៅលេខរៀងទី៦នៅក្នុងចំណោមប្រទេសទាំង ១០ ជុំវិញពិភពលោក។
- អាមេរិក មាន ៨៣,៥ពិន្ទុ
- អង់គ្លេស មាន ៧៧,៩ពិន្ទុ
- ហូឡង់ មាន ៧៥,៦ពិន្ទុ
- អូស្ត្រាលី មាន ៧៥,៥ពិន្ទុ
- កាណាដា មាន ៧៥,៣ពិន្ទុ
- ថៃ មាន ៧៣,២ពិន្ទុ
- ស៊ុយអែត មាន ៧២,១ពិន្ទុ
- ដាណឺម៉ាក មាន ៧០,៤ពិន្ទុ
- កូរ៉េខាងត្បូង មាន ៧០,២ពិន្ទុ
- ហ្វាំងឡង់ មាន ៦៨,៧ពិន្ទុ៕
ប្រភព៖ Weforum
