វៀតណាម អនុវត្តន៍វិធានការផាកពិន័យតឹងតែង ដល់អ្នកមិនពាក់ម៉ាសនៅទីសាធារណៈ
អាជ្ញាធរវៀតណាម បាននិងកំពុងតែអនុវត្តវិធានការ ផាកពិន័យជាទឹកប្រាក់យ៉ាងច្រើន ចំពោះអ្នកដែលមិនគោរពតាមបទបញ្ញត្តិលើការពាក់ម៉ាស គ្រប់ពេលវេលា និងទីកន្លែង ក្នុងចំណាត់ការដើម្បីទប់ស្កាត់ការរីកសាយភាពនៃវីរុសកូវីដ១៩។
បើយោងតាមគេហទំព័រ Worldometer ប្រទេសវៀតណាមដែលមានប្រជាជនជាង ៩៦ លាននាក់ ត្រូវបានកោតសរសើរដោយអង្គការសុខភាពពិភពលោក និងសហរដ្ឋអាមេរិក ចំពោះការឆ្លើយតប និងកិច្ចខិតខំប្រឹងប្រែងយ៉ាងរហ័សក្នុងការផ្ទុកវីរុសនេះ។ ហេតុដូច្នេះ បានធ្វើឲ្យប្រទេសនេះមានអត្រាឆ្លងមេរោគទាបមួយនៅលើពិភពលោកដោយមានចំនួន ២១២ ករណីគិតត្រឹមថ្ងៃពុធ (១មេសា) ហើយយោងតាមក្រសួងសុខាភិបាលរបស់ទីក្រុងហាណូយ បញ្ជាក់ថា គ្មាននរណាម្នាក់ដែលត្រូវបានស្លាប់ទាក់ទងនឹងជំងឺនេះទេ។
ទីក្រុងហាណូយ (Hanoi) បានតម្រូវឲ្យជនជាតិវៀតណាម និងជនបរទេសទាំងអស់ពាក់ម៉ាសនៅកន្លែងណាដែលមានមនុស្សច្រើនគិតចាប់ពីថ្ងៃទី ១៦មីនា មក ហើយនៅតាមឯអាកាសយានដ្ឋាន និងស្ថានីយរថភ្លើងទាំងអស់ នឹងមានការចែកជូនម៉ាសដល់ពួកគេដោយឥតគិតថ្លៃទៀតផង។ ប្រសិនបើនរណាម្នាក់មិនបានធ្វើតាមការណែនាំរបស់រដ្ឋាភិបាលនឹងត្រូវពិន័យរហូតដល់ ១៣ដុល្លារ ខណៈប្រទេសនៅតំបន់ឥណ្ឌូចិនមួយនេះ មានចំណូលសម្រាប់មនុស្សម្នាក់ (Per Capita Income) តែ ២.៧១៥ ដុល្លារក្នុងមួយឆ្នាំប៉ុណ្ណោះ យោងតាមទិន្នន័យរបស់ (CEIC) គិតត្រឹមខែធ្នូ ឆ្នាំ២០១៩។
មេដឹកនាំរដ្ឋ និងប្រព័ន្ធផ្សព្វផ្សាយបានកំពុងខិតខំផ្សព្វផ្សាយអំពីសារៈសំំខាន់នៃការពាក់ម៉ាស់អំឡុងពេលមានវិបត្តិវីរុសនេះផងដែរ។ មានក្រុមហ៊ុន និងអង្គភាពជាច្រើន បានលើកទឹកចិត្ដបុគ្គលិកឲ្យពាក់ម៉ាស ដោយមានរង្វាន់សម្រាប់នរណាដែលអនុវត្តតាម និងត្រូវដកប្រាក់ខែប្រសិនបើនរណាម្នាក់មិនពាក់ម៉ាស។ ជាពិសេសនៅ ពាសពេញទីក្រុងហាណូយ តាម ធនាគារ ឱសថស្ថាន និងហាងនានា បើមិនពាក់ម៉ាសគេមិនអនុញ្ញាតឱ្យចូលនោះឡើយ៕
អត្ថបទទាក់ទង៖
- WHO ថាបើមិនឈឺមិនបាច់ពាក់ម៉ាស តែអ្នកជំនាញចិនថា នេះជាកំហុសធ្ងន់ធ្ងររបស់ អ៊ឺរ៉ុប និងអាមេរិក
- ពេលនេះ WHO ប្ដូរចិត្តមកគាំទ្រឱ្យពាក់ម៉ាសនៅទីសាធារណៈវិញ
ដោយ៖ Anthony
ប្រភព៖ VOANews
