ថៃរកឃើញមនុស្ស ៦៦ម៉ឺននាក់ទូទាំងប្រទេសចាត់ថ្នាក់ជា «អ្នកមានហានិភ័យខ្ពស់»
ក្នុងរយៈពេល ២ខែចុងក្រោយនេះ ក្រុមការងារសុខាភិបាលស្ម័គ្រចិត្តរបស់ប្រទេសថៃ បានចុះទៅដល់គេហដ្ឋាន ១១,៨លាននៅទូទាំងប្រទេសថៃ និងបានកំណត់ឃើញថា មានមនុស្ស ៦៦ម៉ឺននាក់ទូទាំងប្រទេសអាចចាត់ថ្នាក់ជាក្រុមមនុស្ស «មានហានិភ័យខ្ពស់» ដោយសារប៉ះពាល់ដោយផ្ទាល់ និង/ឬ ចម្លង Covid19។ នេះបើយោងតាមការចុះផ្សាយពីសារព័ត៌មាន Thai PBS World ចុះផ្សាយថ្ងៃទី១២ ខែមេសា កន្លងទៅ។
លោកវេជ្ជបណ្ឌិត Tharet Krasnairawiwong អគ្គលេខាធិការនៃនាយកដ្ឋានគាំពារសេវាសុខាភិបាល បានថ្លែងថា មានមនុស្សប្រមាណ ៥៩ ១៧៨នាក់បានធ្វើដំណើរត្រលប់មកពីក្រៅប្រទេសវិញ មាន ៤៦៣ ៧៥៦នាក់ចាកចេញពីក្រុងបាងកកមកដល់ខេត្តកំណើតរបស់គេវិញ និងជាក្រុមមនុស្សដែលមានទំនាក់ទំនងជាមួយសកម្មភាពនៅកីឡដ្ឋានប្រដាល់ និងកន្លែងកម្សាន្តផ្សេងៗទៀត។
ប្រទេសថៃ មានភ្នាក់ងារសុខាភិបាលស្ម័គ្រចិត្តច្រើន នាក់ត្រូវបំពេញការងារប្រឆាំងនឹងកូវីដនៅទូទាំងប្រទេស។ មកដល់ពេលនេះ តំបន់សំខាន់ៗពីរ គឺបាងកក និងភូកេតដែលមានអត្រាខ្ពស់ជាងគេ។
សូមអាន៖ ប្រទេសថៃត្រូវការការចូលរួមពីពលរដ្ឋ៨០ភាគរយ ទើបអាចទប់ស្កាត់ការឆ្លងកូវីដ១៩ បាន
ក្រសួងសុខភាពសាធារណៈថៃ បានធ្វើការទស្សទាយថាប្រសិនបើប្រជាជនថៃ ៨០ភាគរយអាចគោរពតាមការរក្សាគម្លាតដាច់ពីគេ ឬគម្លាតសុវត្ថិភាព (Social distancing) បាន នោះចំនួននៃអ្នកឆ្លងនឹងមាន ៧ ៧៤៥នាក់ ត្រឹមថ្ងៃទី១៥ មេសា ទៅដល់ ១៧ ៦៣៥ករណី ប្រសិនបើអ្នកគោរពតាមវិធានការមួយនេះមានត្រឹមតែ៥០ភាគរយ។
យោងតាមរបាយការណ៍ពី Worldometers នាថ្ងៃទី១៤ កុម្ភៈ នេះបានឱ្យដឹងថា ថៃមានករណីវិជ្ជមានសរុប ២៥៧៩ករណី ស្លាប់ ៤០ និងជាសះស្បើយប្រមាណ ១២៨៨នាក់។ ចំនួនធ្វើតេស្តវិភាគសំណាកសរុប នៅទូទាំងប្រទេស ធ្វើបាន ១០០ ៤៩៨៕
ដោយ៖ រតនៈវិភូ
