កាណាដាលួចទាក់ទងឥណ្ឌាស្ងាត់ៗ ទិញស្តុកថ្នាំព្យាបាលគ្រុនចាញ់ ៥លានគ្រាប់
រដ្ឋាភិបាលនៃប្រទេសកាណាដា បានទាក់ទងជាមួយភាគីឥណ្ឌាស្ងាត់ៗកាលពីសប្ដាហ៍មុននេះ ដោយកុម្ម៉ង់ថ្នាំ Hydroxychloroquine ចំនួន ៥លានគ្រាប់ដើម្បីបម្រុងទុកសម្រាប់ប្រជាជនខ្លួន ខណៈលោក Trump អះអាងថា ជាថ្នាំដែលមានប្រសិទ្ធភាពសម្រាប់ព្យាបាលអ្នកជំងឺកូវីដ១៩។
តម្រូវការឱសថព្យាបាលជំងឺគ្រុនចាញ់ Hydroxychloroquine បានកើនឡើងនៅទូទាំងពិភពលោក ខណៈមិនទាន់មានការប្រកាសពីអង្គការ WHO ពីថ្នាំណាមួយជាក់លាក់សម្រាប់ព្យាបាលកូវីដ១៩ឱ្យជាសះស្បើយតែមួយមុខពីរមុខនោះទេ។ ដោយសារតែមានតម្រូវការឱសថប្រភេទនេះខ្លាំងក្លា ធ្វើឱ្យបរិមាណផ្គត់ផ្គង់មានបញ្ហា ខណៈឥណ្ឌានៅតែជាប្រទេសធំជាងគេដែលផ្គត់ផ្គង់ថ្នាំប្រភេទនេះ។
អានបន្ថែម៖ កាណាដាបញ្ចេញទឹកប្រាក់ជាង៥០ពាន់លានដុល្លារ ជួយអាជីវកម្មបង់ប្រាក់ឈ្នួលបុគ្គលិក
តាមការបញ្ជាក់ពីសារព័ត៌មានក្នុងស្រុករបស់កាណាដា រដ្ឋាភិបាលនៃប្រទេសនេះបានកុម្ម៉ង់តាំងពីខែវិច្ឆិកា ឆ្នាំ២០១៩មកម្ល៉េះ ប៉ុន្តែដោយសារតែការរីករាតត្បាតកូវីដ១៩លឿនរហ័សពេកធ្វើឱ្យឥណ្ឌាសម្រេចផ្អាកការនាំចេញឱសថ ២៤មុខ ក្នុងនោះក៏មានថ្នាំ Hydroxychloroquine ផងដែរ។
គូសបញ្ជាក់ថា ឥណ្ឌា ជាប្រទេសផលិតឱសថធំជាងគេមួយក្នុងលោក ហើយសម្រាប់កាណាដា ឱសថប្រមាណ ៩០%គឺនាំចូលពីប្រទេសឥណ្ឌា៕
ដោយ៖ រតនៈវិភូ
