ឆាវ ឆាវ មានគូរសត្រូវម្នាក់ទៀតដែលខ្លាំងបន្ទាប់ពីលីវប៉ី តើជាអ្នកណា?
គេហទំព័រ Bizkhmer ធ្លាប់បាននាំអារម្មណ៍ប្រិយមិត្តអោយស្គាល់តួសម្តែងជា ឆាវ ឆាវ ក្នុងរឿងសាមកុក រួចមកហើយ គឺលោក Chen Jian Bin និង គូរសត្រូវរបស់គាត់គឺលីវប៉ី ដែលសម្ដែងដោយលោក Yu He Wei។ បន្តពីនេះ Bizkhmer សូមនាំមិត្តអ្នកអានមកស្គាល់គូរសត្រូវទី២របស់ ឆាវ ឆាវ វិញម្ដង គឺ ស៊ុន ឈាន ដែលសម្តែងដោយលោក Zhang Bo។ នៅក្នុងរឿងសាមកុក ស៊ុន ឈាន ជាតួអង្គមួយដែលលិចមុខតាំងពីក្មេង ដែលជាកូនប្រុសរបស់ត្រកូលស៊ុន គ្រប់គ្រងនៅតុងអ៊ូ។
ស៊ុន ឈាន ត្រូវបានគេទទួលស្គាល់ថាមានប្រាជ្ញាតាំងពីក្មេងមកម្ល៉េះ រហូតដល់ធំ ក៏បានក្លាយជាម្ចាស់តុងអ៊ូ ហើយក៏ជាបន្លាក្នុងកែវភ្នែករបស់ ឆាវ ឆាវ ផងដែរ។
លោក Zhang Bo ដែលសម្តែងជាតួ ស៊ុន ឈាន កើតនៅថ្ងៃទី២៩ សីហា ១៩៨២ ប្រទេសចិន។ លោក Zhang Bo គឺជាតារាសម្តែងប្រុសដែលមានកម្ពស់ខ្ពស់ គឺមានកម្ពស់១ម៉ែត្រ៨៣។ លោក Zhang Bo បានចូលប្រឡូកក្នុងវិស័យភាពយន្តចាប់តាំងពីឆ្នាំ២០០៥មកម៉្លេះ។ លោក បានសម្តែងជារឿងភាពយន្តខ្នាតខ្លី និងរឿងភាគខា្នតវែង បានប្រមាណជិត២០រឿង។
ក្នុងការសម្ដែងរឿងកន្លងមក លោក Zhang Bo ទទួលបានពានរង្វាន់ជាច្រើនដូចជា ពានរង្វាន់ Best Actor, Best TV Actor, Best Supporting Actor និង Most Valuable Actor ជាដើម។ នៅក្នុងការសម្តែងរឿងសាមកុក លោក Zhang Bo ទទួលបានពានរង្វាន់ Best Supporting Actor។
ក្នុងរឿងសាមកុក ស៊ុន ឈាន ជាមនុស្សដែលមានមហិច្ឆតាធំ និងមានការអត់ធ្មត់ខ្ពស់ ស៊ុន ឈាន ធ្លាប់បាននិយាយថា៖«បើយើងមិនខ្លាំង គ្មាននរណាព្រមជួយយើងនោះទេ»។
ដោយ៖ សុខា នីកា
