គន្លឹះសុវត្ថិភាព បញ្ចៀសការថ្លង់ដោយសារស្ដាប់កាសចម្រៀងច្រើន
ដោយយោងតាមខ្លឹមសារព័ត៌មានរបស់គេហទំព័រ indiatimes ឱ្យដឹងថា អ្នកដែលមានទម្លាប់ប្រើប្រាស់កាសទូរស័ព្ទ (headphone) ស្ដាប់ចម្រៀងឮៗខ្លាំង អាចប្រឈមផលប៉ះពាល់ដល់ត្រចៀកយ៉ាងធ្ងន់ធ្ងររហូតអាចឈានដល់ថ្លង់។ អ្នកជំនាញផ្នែកសុវត្ថិភាព បានប្រាប់ពីក្បួនច្បាប់ ដែលអ្នកគួរអនុវត្តតាមដើម្បីជៀសវាងជំងឺធ្ងន់ត្រចៀក។
គេសង្កេតឃើញបច្ចុប្បន្ននេះ ឧបករណ៍ស្ដាប់ចម្រៀង ក៏ដូចជាស្មាតហ្វូនចេញស៊េរីក្រោយៗ មានលក្ខណសម្បត្តិទំនើបៗ ភ្ជាប់មុខងារច្រើនសំបូរបែប ក្នុងនោះក៏មានកម្មវិធីបើកស្ដាប់ចម្រៀង អមដោយកាសស្ដាប់ (headset) ពីរោះៗ។ យុវវ័យសម័យបច្ចុប្បន្ននិយមចូលចិត្តស្ដាប់ចម្រៀង ដោយពាក់កាសជាប់ត្រចៀក ទោះបីជាពេលធ្វើដំណើរ។ ម្យ៉ាងអ្នកខ្លះ ប្រហែលជា ដោយសារធុញទ្រាន់នឹងសំឡេងដ៏ខ្លាំងៗពីការកកស្ទះចរាចរណ៍ ទើបគេសុខចិត្តពាក់កាសស្ដាប់ចម្រៀងកំដរអារម្មណ៍វិញ។ ប៉ុន្តែពួកគេអាចមិនបានចាប់អារម្មណ៍ អាការៈស្ពឹកក្រដាសត្រចៀក។
យ៉ាងណា ទាំងនេះគឺជាសកម្មភាពដែលនឹងជះផលអាក្រក់ដល់សុខភាពត្រចៀករបស់អ្នកបាន។ ដូច្នេះវេជ្ជបណ្ឌិតប្រឹក្សាផ្នែកជំងឺត្រចៀក ច្រមុះ និងបំពង់ក (ENT consultant) Nishit Shah នៅមន្ទីរពេទ្យ Bombay នៅឥណ្ឌាបានណែនាំពីវិធីសាស្ត្រជៀសវាងការខូចត្រចៀកដោយសារស្ដាប់កាសចម្រៀង៖ -បើកចម្រៀងឮចេញក្រៅ (Play it loud)៖ ការស្ដាប់តន្ត្រីដោយបើកសំឡេងត្រឹមតែពាក់កណ្ដាល Volume នោះនឹងមិនប៉ះពាល់ដល់ត្រចៀកឡើយ។
-អាការៈស្ពឹកត្រចៀក (Uncomfortably numb)៖ មិនដូចទៅនឹងមនុស្សដែលថ្លង់ដោយសារសំឡេងផ្ទុះគ្រាប់បែក ឬថ្លង់ដោយសារសំឡេងផ្ទុះយន្តហោះនោះទេ ការថ្លង់ដោយសារកាសទូរស័ព្ទគឺមានលក្ខណៈស្រាល ប៉ុន្តែក៏អាចបង្កផលប៉ះពាល់នៅរយៈពេលយូរខាងមុខដែរ។ តាមការសិក្សាបង្ហាញថា មនុស្សមួយក្រុមដែលចូលទៅកៀកនឹងកន្លែងប្រគំតន្ត្រី ឬក្លឹបដែលតែងមានសំឡេងកងរំពងនោះ នឹងធ្វើឲ្យត្រចៀករបស់គេស្ពឹកមិនខាន។ នៅពេលអ្នកចេញពីក្លឹប នោះអ្នកអាចស្ដាប់បានត្រឹមតែសូរសម្លេងនៅក្បែរត្រចៀកប៉ុណ្ណោះ ពោលគឺមិនអាចស្ដាប់សំឡេងពីចម្ងាយបានច្បាស់នោះឡើយ ដោយសារត្រចៀករបស់អ្នកទើបផ្លាស់ប្ដូរទៅមជ្ឈដ្ឋានថ្មី ទាមទាររយៈពេលដើម្បីសម្រប។ ការពិតនេះជាសញ្ញាដាស់តឿនមួយរបស់ត្រចៀក មុនពេលដែលវាឈានដល់ការទទួលរងសម្ពាធរហូតដល់ប៉ះពាល់ត្រចៀក។ វេជ្ជបណ្ឌិត Shah មានប្រសាសន៍ថា ការផ្លាស់ប្ដូរចេញពីទីកន្លែងដែលមានសំឡេងខ្លាំងៗ មកទីកន្លែងដែលស្ងាត់ជ្រងំ គឺអាចមានគ្រោះថ្នាក់ត្រចៀក ខ្លាំងជាងការស្ដាប់សំឡេងដែលមានដេស៊ីបែលខ្ពស់រយៈពេលយូរទៅទៀត។
-ប្រើកាសឱ្យបានត្រឹមត្រូវចាប់ពីពេលនេះ (Right hear, right now)៖ ការសិក្សាបានបង្ហាញទៀតថា អ្នកដែលចូលចិត្តស្ដាប់តន្ត្រីជាលក្ខណៈឯកជន តាមខ្សែកាសទូរស័ព្ទរបស់ខ្លួនដោយបើកសំឡេងឮខ្លាំងៗ មិនថាប្រើកាសហ្សីន (original) ឬកាសធម្មតាទេ គឺសុទ្ធតែមិនល្អចំពោះសុខភាពត្រចៀក។ វេជ្ជបណ្ឌិត Shah បានណែនាំថា ប្រសិនលោកអ្នកចង់ប្រើ កាសស្ដាប់ត្រចៀក ឬកាសទូរស័ព្ទដើម្បីកាត់បន្ថយ ឬលុបមិនឱ្យឮសំឡេងរំខានដទៃនោះ អ្នកគួរក្រិតសំឡេង (Volume) កម្រិតទាបបានហើយ ម្យ៉ាងក៏ធ្វើឲ្យអ្នកមិនខកពីការប្រាស្រ័យទាក់ទងនឹងអ្នកដទៃផងដែរ។ ការព្យាបាល៖ រឿងដែលគួរឱ្យភ័យខ្លាចបំផុតនោះ គឺថា បាត់បង់សមត្ថភាពស្ដាប់ហើយនោះ អ្នកនឹងមិនមានវិធីព្យាបាលថែទាំឱ្យល្អដូចដើមវិញបានឡើយ។ វេជ្ជបណ្ឌិត Shah មានប្រសាសន៍ថា មនុស្សភាគច្រើនទិញកាសទូរស័ព្ទ មិនផ្ដោតរកគុណភាពល្អទេ តែគេទិញដើម្បីតែសំឡេងឮទៅតាមតម្រូវការ។ នេះជារឿងគួរជៀសវាងមួយដែលអ្នក ក៏គួរតែប្រាប់ទៅកាន់មិត្តភ័ក្ដិ ឬអ្នកនៅជុំវិញផងដែរ។ ប្រសិនពេលកំពុងស្ដាប់កាស អ្នកទទួលអារម្មណ៍មិនស្រួល អ្នកត្រូវដោះកាសចេញភ្លាម។ អ្នកមិនអាចស្ដាប់តន្ត្រីឮខ្លាំងៗ ក្នុងរយៈពេល ៨ម៉ោងជាប់គ្នានោះឡើយ ព្រោះវានឹងប៉ះពាល់ដល់ការស្ដាប់សំឡេងទៅថ្ងៃក្រោយ។ ប្រសិនអ្នកមានអារម្មណ៍ថា ត្រចៀករបស់អ្នកហាក់ដូចជាកំពុងចុះខ្សោយសមត្ថភាព ស្ដាប់មិនសូវឮច្បាស់ ដូច្នេះត្រូវប្រញាប់ទៅជួបពេទ្យឯកទេសត្រចៀក។
-កម្រិតសំឡេងដែលគ្រោះថ្នាក់ដល់ត្រចៀក៖ អ្នកស្រាវជ្រាវបានណែនាំប្រាប់ថា ការស្ដាប់តន្ត្រីតាមកាសឮខ្លាំងៗបើកអស់សំឡេងជារាល់ថ្ងៃនោះ គឺអាចជះផលអវិជ្ជមានត្រឹមតែរយៈពេល ៥នាទី។ សំឡេងចរាចរណ៍មានកម្រិតប្រហែល ៧០ ទៅ ៨០ដេស៊ីបែល។ ប្រសិនអ្នកព្យាយាមចង់ស្ដាប់តន្ត្រីដោយប្រើប្រាស់សំឡេងឱ្យខ្ពស់ជាងសំឡេងចរាចរណ៍ដើម្បីបន្ថយ ឬបំបាត់សំឡេងរំខាន នោះវានឹងគ្រោះថ្នាក់ដល់ត្រចៀកមិនខាន។ ការស្ដាប់តន្ត្រីតាមកាស មិនថាប្រភេទ earbud ឬ headphone នោះទេ ប្រសិនអ្នកប្រើប្រាស់រយៈពេល ៩០នាទីក្នុងមួយថ្ងៃ ជាមួយកម្រិតសំឡេង ៨០% នៃ volume ប្រហែលជាស្ថិតក្នុងកម្រិតសុវត្ថិភាពនៅឡើយ។
យ៉ាងណា កម្រិតសំឡេងអាចខុសគ្នាអាស្រ័យលើម៉ាកកាសផ្សេងៗគ្នា ដូច្នេះអ្នកគួរតែសិក្សាអំពីកម្រិតសំឡេងរបស់កាសនោះឱ្យបានច្បាស់ ដែលជៀសវាងមិនប៉ះពាល់ដល់ត្រចៀករបស់អ្នក។ ខាងក្រោមនេះ គឺជាកម្រិតសំឡេង និងរយៈពេលដែលផ្ដល់ផលប៉ះពាល់ដល់ត្រចៀក់៖ -នៅ ៩៥ដេស៊ីបែល ផលប៉ះពាល់នឹងកើតមាន នៅរយៈពេល ៤ម៉ោងនៃការស្ដាប់កាសរៀងរាល់ថ្ងៃ -១០០ដេស៊ីបែល ផលប៉ះពាល់នឹងកើតមាន នៅរយៈពេល ២ម៉ោង នៃការស្ដាប់កាស -១០៥ដេស៊ីបែល ផងប៉ះពាល់នឹងកើតមាន នៅរយៈពេល ១ម៉ោង -១១០ដេស៊ីបែល ផលប៉ះពាល់នឹងកើតមាន នៅរយៈពេល ១៥នាទី -ចាប់ពី ១២០ដេស៊ីបែល ផលប៉ះពាល់ស្ទើរតែកើតមានភ្លាមៗបន្ទាប់ពីស្ដាប់កាស
ប្រែសម្រួល៖ រឹទ្ធិរាជ ប្រភព៖ indiatimes，stonybrookmedicine
