តើអ្វីទៅជាពន្ធប្រថាប់ត្រា (Registration Tax)?
ស្របតាមច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ១៩៩៥ និង វិសោធនកម្មជាបន្តបន្ទាប់ ដើម្បីជាគុណ ប្រយោជន៍ដល់ថវិការដ្ឋបាលថ្នាក់ក្រោមជាតិសម្រាប់ការអភិវឌ្ឍមូលដ្ឋាន ក្រសួងសេដ្ឋកិច្ច និង ហិរញ្ញវត្ថុ បានចេញ នូវប្រកាសលេខ ៥០៧ សហវ-ប្រក ចុះថ្ងៃទី២៦ ខែមេសា ឆ្នាំ២០១៧ ស្តីពីការប្រមូលពន្ធប្រថាប់ត្រា ដែលនៅក្នុង ប្រកាសនោះបានកំណត់អំពីបែបបទនិងនីតិវិធីនៃការគ្រប់គ្រងការប្រមូលពន្ធប្រថាប់ត្រារបស់រដ្ឋបាលសារពើពន្ធ។ នៅក្នុងអត្ថបទនេះ លោកអ្នកនឹងបានស្វែងយល់អំពីតើអ្វីទៅជាពន្ធប្រថាប់ត្រា?
ពន្ធប្រថាប់ត្រា (Registration Tax) គឺជាប្រភេទពន្ធមួយដែលត្រូវប្រមូលចំពោះ៖
ការផ្ទេរកម្មសិទ្ធិឬសិទ្ធិកាន់កាប់អចលនទ្រព្យ ឬការដាក់ភាគហ៊ុនជាអចលនទ្រព្យក្នុងក្រុមហ៊ុន និង ការផ្ទេរ កម្មសិទ្ធិ ឬសិទ្ធិកាន់កាប់មធ្យោបាយដឹកជញ្ជូន ឬយានយន្តគ្រប់ប្រភេទ
ការផ្ទេរចំណែកណាមួយ ឬទាំងស្រុងនៃភាគហ៊ុនរបស់ក្រុមហ៊ុន
កិច្ចសន្យាផ្គត់ផ្គង់ទំនិញ ឬសេវាដែលប្រើប្រាស់ថវិការដ្ឋ
លិខិតមានលក្ខណៈគតិយុត្ត ជាអាទិ៍ លិខិតស្តីពីការបង្កើតក្រុមហ៊ុន លិខិតស្តីពីការរំលាយក្រុមហ៊ុនបញ្ចូល គ្នា និង លិខិតស្តីពីការបិទក្រុមហ៊ុន។
ខាងក្រោមនេះ គឺជាបុគ្គលដែលទទួលបន្ទុកបង់ពន្ធប្រថាប់ត្រា៖
អ្នកទទួលកម្មសិទ្ធិ ឬសិទ្ធិកាន់កាប់អចលនទ្រព្យ ឬមធ្យោបាយដឹកជញ្ជូន ឬយានយន្តគ្រប់ប្រភេទ
អ្នកទទួលសិទ្ធិកាន់កាប់ភាគហ៊ុន
អ្នកទទួលចុះកិច្ចសន្យាផ្គត់ផ្គង់ទំនិញ ឬ សេវាដែលប្រើប្រាស់ថវិការដ្ឋ
អ្នកទទួលសិទ្ធិលើលិខិតមានលក្ខណៈគតិយុត្ត។
នៅក្នុងផ្នែកនេះ ពាក្យថា “រង្វង់ញាតិ” គឺសំដៅដល់ការផ្ទេរកម្មសិទ្ធិ ឬសិទ្ធិកាន់កាប់អចលនទ្រព្យៈ
រវាងឪពុក-ម្តាយបង្កើតនិងកូនបង្កើត
រវាងប្តីនិងប្រពន្ធ
រវាងយាយ-តាបង្កើតនិងចៅបង្កើត
រវាងបងប្អូនបង្កើតនិងបងប្អូនបង្កើត
រវាងឪពុក-ម្តាយក្មេកនិងកូនប្រសារ
រវាងយាយ-តាក្មេកនិងចៅប្រសារ។
ដោយ៖ ប៉ុម ទូច
