ការចំណាយសរុបរបស់ពិភពលោកលើយោធាមានការកើនឡើងច្រើនបំផុតក្នុងឆ្នាំ២០១៩ ដែលក្នុងនោះរាប់ទាំងអាមេរិកនិងប្រទេសអាស៊ីចំនួន ២ដែលចំណាយច្រើនជាងគេ។ នេះបើយោងតាមអ្នកសិក្សាស្រាវជ្រាវបានប្រាប់ឲ្យដឹងកាលពីថ្ងៃច័ន្ទកន្លងទៅ ដែលចុះផ្សាយដោយ SCMP។

ប្រទេសទាំងអស់លើពិភពលោកចំណាយសរុបប្រមាណ ១,៩លានលានដុល្លារ (ទ្រីលាន) ទៅលើយោធារបស់ខ្លួនក្នុងឆ្នាំ២០១៩ នេះយោងតាមរបាយការណ៍មួយរបស់ វិទ្យាស្ថានសិក្សាស្រាវជ្រាវសន្ដិភាពអន្តរជាតិស្ដុកហម (Stockholm International Peace Research Institute )។

បើធៀបនឹងឆ្នាំ២០១៨ ការចំណាយនេះមានការកើនឡើង ៣,៦ភាគរយ ដែលជាចំនួនច្រើនបំផុតមិនធ្លាប់មានចាប់ពីឆ្នាំ២០១០មក។

លោក Nan Tian អ្នកសិក្សាស្រាវជ្រាវនៅវទ្យាស្ថានខាងលើបានមានប្រសាសន៍ថា៖ «ការចំណាយលើយោធាពិភពលោកបានកើនដល់ចំណុចខ្ពស់បំផុតចាប់តាំងពីសង្គ្រាមត្រជាក់មក»។

ក្នុងការចំណាយសរុប ក្នុងនោះអាមេរិកចំណាយច្រើនជាងគេ បើគិតជាទឹកប្រាក់ ៧៣២ពាន់លានដុល្លារ ឬស្មើនឹងកំណើន ៥,៣ភាគរយ បើធៀបឆ្នាំ២០១៨ ដែលស្មើនឹង ៣៨ភាគរយនៃការចំណាយសរុបរបស់ពិភពលោក ក្នុងឆ្នាំ២០១៩។

ក្នុងនោះប្រទេសអាស៊ីចំនួន២ គឺប្រទេសចិនចំណាយប្រមាណ ២៦១ពាន់លានដុល្លារ មានកំណើន ៥,១ភាគរយ និងឥណ្ឌាចំណាយ ៧១,១ ពាន់លានដុល្លារ កើន ៦,៨ភាគរយ។

លោក  Nan Tian បានបញ្ជាក់ថា៖ «ចិនបានប្រកាសជាសាធារណៈថាខ្លួនចង់ប្រកួតប្រជែងជាមួយអាមេរិកដែលជាប្រទេសមហាអំណាចយោធា»។

ឥណ្ឌាមានការតានតឹងជាមួយប៉ាគីស្ថាន និងចិនផង ធ្វើឲ្យប្រទេសអាស៊ីមួយនេះចាក់ទឹកប្រាក់កាន់តែច្រើនពង្រឹងវិស័យយោធារបស់ខ្លួន។

ទោះបីជាយ៉ាងណាក៏ដោយ លោក Nan Tian បន្តថា ការចំណាយលើយោធានេះមើលឃើញថាមានការកើនឡើងក្នុងប៉ុន្មានឆ្នាំចុងក្រោយនេះ ប៉ុន្តែអាចនឹងមានការធ្លាក់ចុះវិញដោយសារតែជំងរាតត្បាតកូវីដ១៩ ដោយសារតែការធ្លាក់ចុះសេដ្ឋកិ្ចច និងត្រូវតម្រូវឲ្យប្រទេសទាំងនោះត្រូវគិតពីវិស័យផ្សេងទៀតដូចជាសុខាភិបាល និងវិស័យអប់រំជាដើម៕

អត្ថបទទាក់ទង៖ 

• មិនធម្មតា! វៀតណាមជាប់ចំណាត់ថ្នាក់ក្នុងកំពូលប្រទេសទាំង១០ដែលមានកម្លាំងយោធាច្រើនជាងគេលើលោក​
• អាមេរិកមហាអំណាចយោធាលេខ១ ចុះអ៊ីរ៉ង់មានសាច់ដុំប៉ុណ្ណាដែរ?​

ដោយ៖ លង់ វណ្ណៈ