ការប្រើប្រាស់ Inversion នៅក្នុង Question និង Question tags (ភាគ២)
កាលពីវគ្គមុនយើងបានរៀនរួចមកហើយថា នៅពេលគុណកិរិយាឬឃ្លាគុណកិរិយាអវិជ្ជមានត្រូវបានយកមកដាក់នៅខាងដើមល្បះដើម្បីបន្ថែមទម្ងន់ទៅលើល្បះទាំងមូល នោះទីតាំងរបស់សព្វនាមនិងកិរិយាជំនួយត្រូវបានចម្រាសគ្នា ដែលក្នុងភាសាអង់គ្លេសហៅថា Inversion។ ប៉ុន្តែការចម្រាសទីតាំងសព្វនាមនិងកិរិយាជំនួយមិនមែនប្រើប្រាស់តែដើម្បីបន្ថែមទម្ងន់លើល្បះនោះទេ។ ដូច្នេះហើយ នៅថ្ងៃនេះយើងនឹងសិក្សាស្ថានភាពដទៃទៀត ដែលInversion ត្រូវបានយកមកប្រើប្រាស់។
- ប្រយោគសំនួរ (Question)
ចំពោះការចម្រាស់សព្វនាមនិងកិរិយាជំនួយដើម្បីលើកឡើងនូវប្រយោគសំណួរ អ្នកប្រហែលជាមានការយល់ដឹងមួយចំនួនអំពីវាហើយ។ ដើម្បីបម្លែងប្រយោគស្របនេះជាសំណួរ She has been to Thailand for 3 times. អ្នកគ្រាន់តែចម្រាសទីតាំងរបស់សព្វនាម She និងកិរិយាជំនួយរបស់វាដែលជា has នោះអ្នកនឹងបង្កើតជាសំណួរបានថា How many times has she been to Thailand ?
ចំណុចដែលអ្នកត្រូវកំណត់ចំណាំអំពីការចម្រាស់ទីតាំងរបស់សព្វនាមនិងកិរិយាជំនួយនៅពេលបង្កើតសំណួរគឺ ដោយសារតែវេយ្យាករណ៍ភាសាអង់គ្លេសមានកិរិយាជំនួយ (Auxiliary verb) និងកិរិយាចម្បង (Main verb) ហើយក្នុងល្បះមួយអាចមានកិរិយាជំនួយលើសពី១ ហេតុនេះនៅពេលអ្នកចម្រាស់សព្វនាមជាមួយនឹងកិរិយាជំនួយ កិរិយាជំនួយដែលអ្នកត្រូវចម្រាស់គឺជាកិរិយាជំនួយដំបូងបង្អស់នៅក្នុងល្បះ។
ឧទាហរណ៍
He could have been a doctor if he followed his family's tradition. (គាត់អាចនឹងក្លាយជាគ្រូពេទ្យមួយរូប បើសិនជាគាត់បានដើរតាមប្រពៃណីក្រុមគ្រួសាររបស់គាត់។)
នៅពេលបម្លែងជាសំណួរ វាក្លាយជា Could he have been a doctor if he followed his family's tradition? (តើគាត់អាចនឹងក្លាយជាគ្រូពេទ្យមួយរូបទេ បើសិនជាគាត់បានដើរតាមប្រពៃណីក្រុមគ្រួសាររបស់គាត់?) ក្នុងល្បះនេះ កិរិយាជំនួយមាន could, have និង been ប៉ុន្តែនៅពេលបម្លែងជាសំណួរ មានតែ could មួយគត់ដែលត្រូវបានយកមកចម្រាស់ជាមួយសព្វនាម He។
ក្នុងករណីដែលល្បះនោះមិនមានកិរិយាជំនួយដូចជាប្រយោគស្របនៅក្នុងទម្រង់ Present simple និង Past simple យើងត្រូវប្រើប្រាស់កិរិយាជំនួយដូចជា Do, Does សម្រាប់ Present simpleនិង Did សម្រាប់ Past simple ទៅលើសំណួរនោះ ហើយកិរិយាចម្បងត្រូវប្ដូរទៅជាទម្រង់ bare infinitive វិញ។ ឧទាហរណ៍៖ They went to Koh Kong yesterday. ទៅជាសំណួរ Did they go to Koh Kong yesterday ? ដោយសារតែប្រយោគនេះមិនមានកិរិយាជំនួយហើយវាមានទម្រង់ជា Past simple នៅពេលប្រយោគស្របមួយនេះបម្លែងជាសំណួរ យើងត្រូវប្រើកិរិយាជំនួយ Did ដើម្បីបង្កើតជាសំណួរ ហើយកិរិយាចម្បងនៅក្នុងប្រយោគស្របដែលជា went ត្រូវបានប្ដូរជាទម្រង់ bare infinitive វិញគឺ go នៅក្នុងសំណួរ។
ចំណែកឯកិរិយាសព្ទ To be នៅក្នុងទម្រង់ Present simple ដូចជា Am/Is/Are និង Past simple ដូចជា Was/Were យើងអាចចម្រាស់កិរិយានេះជាមួយសព្វនាមតែម្ដងដោយមិនត្រូវការប្រើប្រាស់កិរិយាជំនួយដទៃទៀតនោះឡើយ។ ឧទាហរណ៍៖ He is exhausted. ទៅជា Is he exhausted ? និង She was a very famous actress in the past. ទៅជា Was she a very famous actress in the past ? ជាដើម។
- ប្រយោគ Question tags
Question tags ត្រូវបានប្រើប្រាស់នៅពេលដែលអ្នកនិយាយចង់សួររកព័ត៌មាន ឬសួរបញ្ជាក់អំពីព័ត៌មានអ្វីមួយ។ ការចម្រាស់ទីតាំងរបស់សព្វនាមនិងកិរិយាជំនួយក៏កើតឡើងនៅក្នុងការប្រើប្រាស់ Question tags នេះដែរ។ ជាទូទៅនៅក្នុងការប្រើប្រាស់របស់ Question tags សំណួរបដិសេធត្រូវលើកឡើងនៅក្នុងប្រយោគស្រប
ឧទាហរណ៍ថា You are Cambodian, aren't you ? (តើអ្នកជាជនជាតិខ្មែរមែនទេ?) ផ្ទុយមកវិញសំណួរស្របត្រូវលើកឡើងនៅក្នុងប្រយោគបដិសេធ ឬនៅក្នុងប្រយោគស្របដែលមានគុណកិរិយាអវិជ្ជមាន ជាឧទាហរណ៍ You didn't go to school today, did you ? (អ្នកមិនបានទៅសាលានៅថ្ងៃនេះទេមែនទេ ?) និង He never arrives on time, does he ? (គាត់មិនដែលមកទាន់ពេលទេមែនទេ ?) ។
សំណួរបដិសេធភ្ជាប់ជាមួយប្រយោគស្រប ឯសំណួរស្របភ្ជាប់ជាមួយប្រយោគបដិសេធនេះ មិនមែនប្រើប្រាស់នៅក្នុងស្ថានការណ៍ទាំងអស់នោះទេ។ វាប្រើប្រាស់តែនៅពេលដែលអ្នកចង់សួររកព័ត៌មានអ្វីមួយពីនរណាម្នាក់ប៉ុណ្ណោះ។
ការប្រើប្រាស់នេះត្រូវបានផ្លាស់ប្ដូរនៅពេលអ្នកចង់សួរបញ្ជាក់ពីអ្វីមួយពីនរណាម្នាក់ ឬបង្ហាញពីការចាប់អារម្មណ៍របស់អ្នកទៅលើព័ត៌មានអ្វីមួយពីម្នាក់នោះ ឬការភ្ញាក់ផ្អើល ឬបង្ហាញពីកំហឹង។ នៅក្នុងស្ថានភាពបែបនេះ ប្រយោគស្របត្រូវភ្ជាប់ជាមួយសំណួរស្រប។
ឧទាហរណ៍
You are getting married next week, aren't you ? (អ្នករៀបការនៅសប្ដាហ៍ក្រោយនេះហើយពិតមែនទេ ?) ដែលវាបង្ហាញពីការចាប់អារម្មណ៍របស់អ្នក និង I must finish this project before 21st, must I ? (ខ្ញុំត្រូវបញ្ចប់គម្រោងនេះឲ្យរួចរាល់មុនថ្ងៃទី២១មែនទេ ?) ដែលវាបង្ហាញពីការសួរបញ្ជាក់។
ប្រយោគបដិសេធភ្ជាប់ជាមួយសំណួរបដិសេធក៏អាចទៅរួចបានដែរ ហើយគេប្រើប្រាស់វាដើម្បីបង្ហាញពីការមិនពេញចិត្ត។ ឧទាហរណ៍ដូចជា So you don't like my look, don't you ? (ដូច្នេះអ្នកមិនចូលចិត្តរូបរាងរបស់ខ្ញុំទេពិតមែនទេ ?) ។
ក្រៅពីការប្រើប្រាស់ទាំងនេះ Question tags ក៏ត្រូវបានប្រើប្រាស់នៅពេលសួរនាំព័ត៌មានឬសុំជំនួយពីអ្នកដទៃផងដែរ។ នៅពេលប្រើ Question tags ដើម្បីសួរអំពីព័ត៌មានឬសុំជំនួយបែបនេះ វាធ្វើឲ្យការសួររបស់អ្នកមានលក្ខណៈគួរសមជាងទម្រង់សំណួរផ្សេងៗ ហើយវាច្រើនផ្ដើមឡើងដោយប្រយោគបដិសេធ។
ឧទាហរណ៍
You don't know the way to the Russian embassy, do you ? (តើអ្នកដឹងផ្លូវទៅស្ថានទូតរុស្ស៊ីទេ ?)
You couldn't help me looking after my cat, could you ? (តើអ្នកអាចជួយមើលថែឆ្មារបស់ខ្ញុំផងបានទេ ?) ។
យើងក៏ប្រើប្រាស់ប្រយោគបង្គាប់បញ្ជា (Imperative sentence) នៅក្នុង Question tags ដើម្បីផ្ដល់ការអញ្ជើញនិងបង្គាប់ឲ្យនរណាម្នាក់ធ្វើអ្វីមួយឲ្យអ្នកដែរ។ នៅពេលអ្នកអញ្ជើញនរណាម្នាក់ អ្នកអាចប្រើកិរិយាជំនួយ won't សម្រាប់ការអញ្ជើញ និងកិរិយាជំនួយ can, can't, will, would សម្រាប់ការបង្គាប់បញ្ជា។
ឧទាហរណ៍
Keep your voice low, will you ? (អាចស្ងាត់បន្តិចបានទេ ?) សម្រាប់ការបង្គាប់បញ្ជា និង Take a seat, won't you ? (សូមអញ្ជើញអង្គុយចុះ។)
សម្រាប់ការអញ្ជើញ ហើយសម្រាប់ប្រយោគបង្គាប់បញ្ជាអវិជ្ជមាន យើងអាចប្រើបានតែកិរិយាជំនួយ will ប៉ុណ្ណោះ។ ឧទាហរណ៍ Don't forget, will you ? (កុំភ្លេចឲ្យសោះ។)
សម្រាប់ការស្នើសុំ (Suggestions) អ្នកអាចប្រើ Question tags «shall we» ឧទាហរណ៍ដូចជា Let's do it this way, shall we ? (ពួកយើងគួរធ្វើវាបែបនេះទៅ។) ។ ចំពោះ Demonstrative ដែលស្មើនឹងភាសាខ្មែរយើងថាសព្វនាមចង្អុល ដែលមានដូចជា This, That, These និង Those អ្នកអាចប្រើប្រាស់បែបនេះថា This is beautiful, isn't it ? សម្រាប់ This, That is a Japanese store, isn't it ? សម្រាប់ That, These are the old buildings, aren't they ? សម្រាប់ These និង Those are the things you are looking for, aren't they ? សម្រាប់ Those។
ករណីលើកលែងពិសេសៗអំពីការប្រើប្រាស់ Question tags មានដូចជា យើងមិននិយាយថា I'm late, amn't I ? នោះទេ តែយើងនិយាយថា I'm late, aren't I ? ម្យ៉ាងទៀត បើសិនជាសព្វនាមគឺជា Everybody, Nobody, Somebody ឬ Anybody យើងត្រូវប្រើសព្វនាម they នៅក្នុង Question tag។
ឧទាហរណ៍ថា Everybody agrees with it, don't they ? និង Nobody told him about that, did they ? ។ បើសព្វនាមគឺជា Everything, Nothing, Something ឬ Anything នោះយើងត្រូវប្រើសព្វនាម it នៅក្នុង Question tags។ ឧទាហរណ៍ Anything can happen, can't it ? និង Nothing is going wrong, isn't it ? ៕
ដោយ៖ ស្រីពៅ
===========================================
វគ្គសិក្សា «វេយ្យាករណ៍និងបកប្រែកាសែតពិសេស» (Special Grammar and Translation Course) តាមអនឡាញ សម្រាប់ថ្ងៃចន្ទ ដល់ ថ្ងៃសុក្រ
- តម្លៃ៖ 80$/ម្នាក់ (ចុះឈ្មោះបង់ថ្លៃសិក្សាមុនថ្ងៃទី ៣០ ខែមីនា ឆ្នាំ ២០១៩ ទទួលបានការបញ្ចុះតម្លៃ ១០$)
- រយៈពេល៖ ៦ សប្ហាហ៍
- ថ្ងៃចូលរៀន៖ ថ្ងៃទី ០១ ខែមេសា ឆ្នាំ២០១៩
- ម៉ោងសិក្សា៖ ថ្ងៃចន្ទ-សុក្រ ម៉ោង ៧៖៣០ ដល់ ៨៖៣០ យប់
បញ្ជាក់៖ ចំនួនសិស្សមានកំណត់តែ ១០នាក់ប៉ុណ្ណោះ/ សិក្សាតាមរយៈអនឡាញតាមកម្មវិធីទូរស័ព្ទដៃឬកុំព្យូទ័រមានភាពងាយស្រួល
