តើ​អ្វី​ទៅ​គឺជា Parallelism នៅ​ក្នុង​ភាសា​អង់គ្លេស? ល្បះ​ណា​ដែល​គោរព​តាម​គោលការណ៍​របស់ Parallelism ល្បះ​នោះ​មាន​ភាព​ស៊ីចង្វាក់​គ្នា មាន​លំហូរ មាន​លំនឹង ស្ដាប់​ទៅ​ពីរោះ​ដល់​ត្រចៀក ព្រម​ទាំង​អាច​បង្កើន​ការ​ចាប់​អារម្មណ៍​របស់​អ្នក​អាន​ឲ្យ​ជក់ចិត្ត​នៅ​ក្នុង​ការ​អាន​សំណេរ​របស់​អ្នក។ ល្បះ​ដែល​មាន​លក្ខណៈ​បែប​នេះ ត្រូវ​បាន​ចងក្រង​ដោយ​ឃ្លា​ពីរ​ឬ​ច្រើន​ដែល​មាន​សំណង់​វេយ្យាករណ៍​ដូចគ្នា។

ឧទាហរណ៍ My mom was chopping garlic, washing cabbage and rinsed rice when the phone rang. (ម្ដាយ​របស់​ខ្ញុំ​កំពុងតែ​ចិញ្ច្រាំ​ខ្ទឹមស លាង​ស្ពៃក្ដោប និង​លាង​អង្ករ​ខណៈ​ពេល​ទូរស័ព្ទ​រោទ៍។) តើ​អ្នក​មាន​សង្កេត​ឃើញ​កំហុស​ត្រង់​ណា​នៅ​ក្នុង​ល្បះ​នេះ​ដែរ​ទេ ? កំហុស​គឺ​នៅ​ត្រង់​កិរិយាសព្ទ rinsed ព្រោះ was chopping, (was) washing (អ្នក​មិន​ត្រូវការ​ដាក់​កិរិយាសព្ទ​ជំនួយ Was នៅ​ទីនេះ​ម្ដង​ទៀត​នោះ​ទេ) គឺជា​កិរិយាសព្ទ​ដែល​ស្ថិត​នៅ​ក្នុង​ទម្រង់ Past continuous ចំណែក​ឯ rinsed គឺជា​កិរិយាសព្ទ​ដែល​ស្ថិត​ក្នុង​ទម្រង់ Past simple ហេតុនេះ​វា​មិន​បាន​គោរព​ទៅ​តាម​គោលការណ៍​របស់ Parallelism នោះ​ឡើយ។ ដើម្បី​កែ​វា​ឲ្យ​ត្រឹមត្រូវ យើង​អាច​ប្ដូរ​ល្បះ​នេះ​ទៅ​ជា My mom was chopping a garlic,washing a cabbage and rinsing rice when the phone rang. ។

ឥឡូវ​នេះ​យើង​ងាក​មក​សិក្សា​ពី​ការ​ប្រើប្រាស់​វា​នៅ​ក្នុង​ស្ថានភាព​លម្អិត​មួយៗ​ដូច​ខាងក្រោម៖

•         List នៅ​ក្នុង Parallelism

១) Every morning as soon as I wake up, I always brush my teeth, taking a shower, and make breakfast. ល្បះ​នេះ​មិន​ត្រឹមត្រូវ​ទេ ព្រោះ brush និង make គឺជា​កិរិយាសព្ទ​ក្នុង​ទម្រង់ Present simple រីឯ taking គឺជា​កិរិយាសព្ទ​ក្នុង​ទម្រង់ verb+ing។ ល្បះ​នេះ​អាច​កែ​ឲ្យ​ត្រឹមត្រូវ​វិញ​ទៅ​ជា​ដោយ​ប្ដូរ​កិរិយាសព្ទ taking ដែល​ស្ថិត​ក្នុង​ទម្រង់ verb+ing ទៅ​ជា​ទម្រង់ Present simple ដែរ​គឺ Every morning as soon as I wake up, I always brush my teeth, take a shower, and make breakfast.

២) She's independent, but compassionate, and care about other people. ល្បះ​នេះ​មិន​ត្រឹមត្រូវ​ទេ ព្រោះ independent និង compassionate គឺជា​គុណនាម (adjective) រីឯ care គឺជា​កិរិយាសព្ទ (verb)។ ល្បះ​នេះ​អាច​កែ​ឲ្យ​ត្រឹមត្រូវ​វិញ​ទៅ​ជា​ដោយ​ប្ដូរ​កិរិយាសព្ទ care ទៅ​ជា​គុណនាម caring គឺ She's independent, but compassionate and caring.

៣) This public speaker spoke confidently and with fluency. ល្បះ​នេះ​មិន​ត្រឹមត្រូវ​ទេ ព្រោះ speak confidently ត្រូវ​បាន​ចងក្រង​ដោយ​កិរិយាសព្ទ speakដែល​ត្រូវ​បាន​បញ្ជាក់​ន័យ​ដោយ​គុណកិរិយា confidently រីឯ with fluency ត្រូវ​បាន​ចងក្រង​ដោយ with ដែល​ជា​ធ្នាក់​និង fluency ដែល​ជា​នាម ពោល​គឺ​ពួក​វា​មិន​មាន​សំណង់​ប្រយោគ​ដូច​គ្នា។ ល្បះ​នេះ​អាច​កែ​ឲ្យ​ត្រឹមត្រូវ​វិញ​ដោយ​ប្ដូរ with fluency ឲ្យ​ទៅ​ជា​ទម្រង់​គុណកិរិយា​ដែរ​គឺ This public speaker spoke confidently and fluently.

•         Preposition (ធ្នាក់) នៅ​ក្នុង Parallelism

១) Although I have looked for my document in my bag, my closet, and on the table, I still can't find it. ល្បះ​នេះ​មិន​ត្រឹមត្រូវ​ព្រោះ in my bag, my closet, and on the table ព្រោះ​នៅ​ពេល​អ្នក​មិន​ដាក់​ធ្នាក់​នៅ​ពី​មុខ my closet នោះ​វា​ស្មើនឹង​អ្នក​សរសេរ​ថា in my bag, in my closet, and in on the table ដែល​វា​ពិត​ជា​មិន​ត្រឹមត្រូវ​ទៅ​តាម​វេយ្យាករណ៍​របស់​ភាសា​អង់គ្លេស​នោះ​ឡើយ។ ដើម្បី​កែ​ល្បះ​នេះ​ឲ្យ​ត្រឹមត្រូវ​វិញ អ្នក​ត្រូវ​បន្ថែម​ធ្នាក់​នៅ​ពី​មុខ my closet ហើយ​ល្បះ​នេះ​ទៅ​ជា Although I have looked for my document in my bag, in my closet, and on the table, I still can't find it. ។ 

២) When Emma got a result that didn't live up to her expectation, she was both disappointed and angry with herself. ល្បះ​នេះ​មិន​ត្រឹមត្រូវ​នោះ​ទេ ព្រោះ​នៅ​ពេល​យើង​ដាក់​ធ្នាក់ with នៅ​ខាង​ចុង​គុណនាម​ទាំងពីរ​ដែល​ជា disappointed និង angry នោះ​វា​ស្មើនឹង​អ្នក​សរសេរ​ថា disappointed with and angry with។ យ៉ាងណាមិញ disappointed មិន​អាច​ប្រើ​ជាមួយ​នឹង​ធ្នាក់ with បាន​នោះ​ទេ ហេតុនេះ​ដើម្បី​កែ​ឲ្យ​ល្បះ​នេះ​ត្រឹមត្រូវ យើង​ត្រូវ​សរសេរ​បែប​នេះ​វិញ​ថា When Emma got a result that didn't live up to her expectation, she was both disappointed in and angry with herself.

ក្រៅ​ពី List និង Preposition យើង​នឹង​សិក្សា​ចំណុច​ផ្សេងៗ​ទៀត​ដែល​ត្រូវ​បាន​ប្រើប្រាស់​ឲ្យ​ស្រប​តាម​គោលការណ៍ Parallelism ប៉ុន្តែ​យើង​នឹង​បន្ត​សិក្សា​នៅ​វគ្គ​បន្ទាប់​ទៀត។ ឥឡូវ​នេះ​យើង​ស្លេះ​ត្រង់​នេះ​សិន​ចុះ៕

ដោយ៖ ស្រីពៅ