រយៈពេល៣ខែដើមឆ្នាំ កម្ពុជាប្រមូលពន្ធបាន២៤លានដុល្លារលើចំនួនអចលនទ្រព្យ៣៣,៦%នៃផែនការ
គិតត្រឹមរយៈពេលបីខែនាដើមឆ្នាំ២០១៩នេះ កម្ពុជាប្រមូលបានពន្ធប្រថាប់ត្រាលើការផ្ទេរកម្មសិទ្ធ ឬសិទ្ធិកាន់កាប់អចលនទ្រព្យបានប្រមាណ ៩៦ប៊ីលានរៀល ឬប្រមាណ២៤លានដុល្លារ លើចំនួនអចលនទ្រព្យប្រមាណ២០ ៥០០មូលដ្ឋាន ដែលស្មើរនឹង ៣៣,៦%នៃផែនការ នេះបើតាមសេក្ដីប្រកាសព័ត៌មានរបស់អគ្គនាយកដ្ឋានពន្ធដារកាលពីថ្ងៃទី០៥ ខែមេសា ឆ្នាំ២០១៩។
ថ្លែងនៅក្នុងសិក្ខាសាលាស្ដីពី "ការប្រមូលពន្ធប្រថាប់ត្រាចំពោះការផ្ទេរកម្មសិទ្ធ ឬសិទ្ធិកាន់កាប់អចលនទ្រព្យ ពន្ធលើអចលនទ្រព្យនិងការត្រៀមអនុវត្តប្រកាសស្ដីពីការកំណត់មូលដ្ឋានគិតពន្ធប្រថាប់ត្រាចំពោះការផ្ទេរកម្មសិទ្ធិឬសិទ្ធិកាន់កាប់អចលនទ្រព្យ " ឯកឧត្តមបណ្ឌិត កែន សម្បត្តិ អគ្គនាយករងនៃអគ្គនាយកដ្ឋានពន្ធដារ បានបញ្ជាក់ជូនថា កាលពីឆ្នាំ២០១៨នៅរាជធានីភ្នំពេញ ចំណូលពន្ធប្រថាប់ត្រាលើការផ្ទេរកម្មសិទ្ធិ ឬកាន់កាប់អចលនទ្រព្យចំនួនប្រមាណ ៣៨៨ប៊ីលានរៀន (ប្រមាណ៩៧លានដុល្លារ) លើអចលនទ្រព្យ៥៥ ៦០០ មូលដ្ឋានស្មើនឹង ១៣៤,៤% នៃផែនការ។
នៅក្នុងសិក្ខាសាលានេះ ឯកឧត្តមក៏បានបញ្ជាក់ផងដែរថា រាជរដ្ឋាភិបាលបានសម្រេចធ្វើបច្ចុប្បន្នភាពឡើងវិញនូវឧបសម្ព័ន្ធស្ដីពីការបែងចែកភូមិសាស្រ្ត និងវាយតម្លៃអចលនទ្រព្យសម្រាប់មូលដ្ឋានគិតពន្ធប្រថាប់ត្រា ដែលបានកំពុងអនុវត្តអស់រយៈពេលជិត១០ឆ្នាំមកហើយ។ ដោយតាមរយៈការធ្វើបច្ចុប្បន្នភាពនេះ ក្រសួងសេដ្ឋកិច្ចនិងហិរញ្ញវត្ថុបានចេញប្រកាស ៣៤៣ ហវណ.ប្រក ចុះថ្ងៃទី២២ ខែមីនា ឆ្នាំ២០១៩ ស្ដីពីការកំណត់ ពន្ធប្រថាប់ត្រាចំពោះការផ្ទេរកម្មសិទ្ធ ឬសិទ្ធិកាន់កាប់អចលនទ្រព្យ ដែលនឹងត្រូវអនុវត្តនៅថ្ងៃទី០១ ខែកក្កដា ឆ្នាំ២០១៩តទៅ៕
ដោយ៖ ជួប ស្រីរ័ត្ន
