ហេតុអ្វីភាសាអង់គ្លេសពិបាកក្នុងការបញ្ចេញសម្លេងម្លេះ? អ្នកត្រូវដឹងរឿងមួយនេះ
ហេតុអ្វីភាសាអង់គ្លេសពិបាកក្នុងការបញ្ចេញសម្លេងម្លេះ? ហេតុអ្វីខ្ញុំបញ្ចេញសម្លេងមិនត្រូវ? ហេតុអ្វីភាសាអង់គ្លេសស្មុគស្មាញម្លេះ? ទាំងនេះប្រហែលជាសំនួរដែលអ្នកសិក្សាភាសាអង់គ្លេសភាគច្រើនតែងសួរ និងមានចម្ងល់ទាក់ទងនឹងភាសាមួយនេះ។ អ្នករៀនភាសាអង់គ្លេសភាគច្រើនប្រហែលមានការយល់ច្រលំក្នុងការបញ្ចេញសម្លេងភាសាអង់គ្លេស ដោយភាគច្រើនគាត់យកអក្សរនីមួយៗទៅបូកដើម្បីបង្កើតជាសម្លេង។ ប៉ុន្តែការធ្វើបែបនេះមិនត្រឹមត្រូវនោះទេ។
លោក លង់ វណ្ណៈ អ្នកបកប្រែរបស់ BizKhmer, គ្រូបង្រៀនភាសាអង់គ្លេស និងជាអ៊ែដមីនផេក Cam-Edu បានចែករម្លែកថា៖ «អ្នកត្រូវដឹងថាភាសាអង់គ្លេសមិនមែនជា Phonetic Language ទេ។ Phonetic language គឺជាភាសាដែលមានអក្សរអាចមើលឃើញហើយប្រកបបញ្ចេញជាសម្លេងនិយាយបាន។ នេះមានន័យថា ឃើញការសរសេរបែបណាអានបែបហ្នឹង។ឧទាហរណ៍៖ ភាសាខ្មែរយើងគឺជា Phonetic Language ដោយយើងអាចប្រកបដោយយកអក្សរ «ក» ដាក់ស្រះ «ា» យើងអាចបញ្ចេញសម្លេងថា «កា» ប៉ុន្តែភាសាអង់គ្លេសមិនមែនបែបហ្នឹងទេ ដោយអ្នកមិនអាចយក English Alphabet អក្សរ ABC…Z មកនិយាយបង្កើតជាសម្លេងបានទេ។ ដែលនេះជាការយល់ច្រលំធំរបស់អ្នករៀនអង់គ្លេស ដែលធ្វើឲ្យគាត់ពិបាកក្នុងការបញ្ចេញសម្លេង។ ពាក្យភាសាអង់គ្លេសមិនអាចមើលឃើញ ហើយប្រកបដូចពាក្យខ្មែរឬភាសា Phonetic language ដទៃទៀតបានទេ។»
អីចឹងតើធ្វើដូចម្ដេចដើម្បីឲ្យការបញ្ចេញសម្លេងឲ្យត្រឹមត្រូវ? ដើម្បីការបញ្ចេញសម្លេងភាសាអង់គ្លេសត្រឹមត្រូវ អ្នកត្រូវស្គាល់ IPA (International Phonetic Alphabet) ដែលជាប្រព័ន្ធសម្លេង (Sound System) របស់ភាសាអង់គ្លេស ដែលមាន Phonetic symbols សញ្ញាសម្លេងទាំង 44 តួ។ ក្នុង Phonetic symbols ហ្នឹងរួមមានទាំង Consonant ព្យញ្ជនៈចំនួន ២៤តួ និង Vowel ស្រះចំនួន២០តួ ។ ក្នុងព្យញ្ជនៈ (Consonant) មាន 24 ហើយមានបែបចែកជា ព្យញ្ជនៈសម្លេងញ័រ មិនញ័រ និងសម្លេងដទៃទៀត ហើយក្នុងស្រះ (Vowel) មាន ២0 តួ ដែលគេបែងចែកស្រះវែង ស្រះខ្លី និងស្រះផ្សំ។
ប្រសិនបើអ្នកទាំងអស់គ្នាចង់ដឹងបន្ថែមអំពី Phonetic symbols អ្នកទាំងអស់គ្នាអាចស្វែងរកលើ Google ឬ Youtube ក៏បានដែរ ហើយរៀននិងស្វែងយល់ពីវាឲ្យបានច្រើន និងចងចាំការបញ្ចេញសម្លេងរបស់វានីមួយៗ។ ដោយ Phonetic symbols នឹងមានការបញ្ចេញសម្លេងសញ្ញានីមួយៗដោយប្រើប្រាស់មាត់ អណ្ដាត ធ្មេញ និងបំពង់ក ជាដើម។ នេះទាមទារឲ្យអ្នកទាំងអស់គ្នាហ្វឹកហាត់និយាយឲ្យបានត្រឹមត្រូវ។
បើចេះ Phonetic symbols ហើយ តើត្រូវធ្វើដូចម្ដេចទៀត? បន្ទាប់ពីអ្នកទាំងអស់គ្នា ដឹងថាពាក្យមួយមាន Phonetic symbols ដូចម្ដេចខ្លះអ្នកទាំងអស់គ្នាអាចស្វែងរកក្នុងវចនានុក្រម ហើយរៀនប្រកបវាឲ្យត្រឹមត្រូវ។ ឧទាហរណ៍ពាក្យ book /bʊk/ ដោយ អ្នកយក ព្យញ្ជនៈ /b/ ផ្សំជាមួយស្រះ /ʊ/ និងព្យញ្ជនៈ /k/ ទើបបង្កើតបានជាសម្លេងនៃពាក្យ book ដែលប្រែថាសៀវភៅ។
ជាចុងក្រោយ លោក វណ្ណៈ គូសបញ្ជាក់ទៀតថា ដើម្បីឲ្យការបញ្ចេញសម្លេងរបស់អ្នកកាន់តែត្រឹមត្រូវ អ្នកត្រូវអាននិងបញ្ចេញសម្លេងពាក្យនីមួយៗក្នុងភាសាអង់គ្លេសឲ្យត្រឹមត្រូវជាមុនសិន។ ប្រសិនបើអ្នកបញ្ចេញសម្លេងពាក្យនីមួយៗមិនត្រឹមត្រូវ នោះការនិយាយរបស់អ្នកអស់គ្នាក៏មិនត្រឹមត្រូវដូចគ្នា។ នេះបានន័យថាការបញ្ចេញសម្លេងមិនទាន់ល្អ៕
