អំឡុងការប្រកាសសមិទ្ធផលថ្មីៗនៅក្នុងសន្និសីទ Build 2016 របស់ Microsoft ថ្មីៗនេះ ក្រុមហ៊ុនបានប្រកាសឱ្យដឹងជាសាធារណៈថា មកដល់ពេលនេះកុំព្យូទ័រដែលដំណើរការដោយប្រព័ន្ធប្រតិបត្តិការ Windows 10 កើនឡើងដល់ចំនួន ២៧០លានគ្រឿង។ Windows ជំនាន់ចុងក្រោយនេះ ត្រូវបានប្រកាសដាក់ឱ្យប្រើជាសកលចាប់តាំងពីថ្ងៃទី២៩ កក្កដា ឆ្នាំ២០១៥។
ចាប់តាំងពីប្រព័ន្ធប្រតិបត្តិការ Windows 10 ត្រូវបានដាក់ឱ្យប្រើមក ក្រុមហ៊ុន Microsoft បានធ្វើការផ្ដល់ជូននូវកញ្ចប់អាប់ដេតថ្មីជាបន្តបន្ទាប់ដើម្បីជួសជុលបញ្ហា error ផ្សេងៗ ដើម្បីធ្វើឲ្យ Windows 10 កាន់តែដំណើរការបានរលូន។ ជាការពិតណាស់ បច្ចុប្បន្ននៅមានកុំព្យូទ័រច្រើនលានគ្រឿងទៀត មិនទាន់ប្រើប្រាស់ Windows 10 នៅឡើយ។ ដូច្នេះក្រុមហ៊ុន Microsoft នៅតែបន្តធ្វើការអភិវឌ្ឍមុខងារថ្មីៗជាបន្តដើម្បីស្រូបទាញអតិថិជនឱ្យប្រើប្រាស់ប្រព័ន្ធប្រតិបត្តិការរបស់ខ្លួនកាន់តែច្រើនឡើង។
Windows 10 មានដំណើរការ ព្រមទាំងមុខងារល្អជាង និងល្បឿនលឿនជាង Windows 8 និងជំនាន់មុនៗ។ ក្រុមហ៊ុន Microsoft ថែមទាំងបានបញ្ជាក់ថា User បានចំណាយពេលប្រើប្រាស់ Windows 10 ប្រមាណជាង ៧៥ពាន់លានម៉ោងមកហើយ៕
