ហេតុផល៥យ៉ាងបញ្ជាក់ថា អ្នកគួរឈប់ធ្វើការឲ្យគេ ហើយងាកមកបើកជំនួញខ្លួនឯងវិញ!
មនុស្សភាគច្រើន សុទ្ធតែចង់មានជំនួញផ្ទាល់ខ្លួន ហើយក៏មិនចង់បន្តធ្វើការឲ្យគេយូរពេកនោះដែរ។ ប៉ុន្តែអ្នកខ្លះគ្រាន់តែចង់ តែមិនដែលហ៊ានសម្រេចចិត្តបើកជំនួញដោយខ្លួនឯងទេ ព្រោះខ្លាចនេះខ្លាចនោះរហូត ចុងបញ្ចប់គឺនៅតែធ្វើការឲ្យគេដដែល។ ដូច្នេះហើយ សម្រាប់អ្នកដែលចង់រកស៊ីនោះ មិនគួរខ្លាចពេកនោះទេ ពោលគឺត្រូវតែសម្រេចចិត្តធ្វើវាបើទោះបីជាមានការលំបាកក៏ដោយ។
ខាងក្រោមនេះ គឺជាហេតុផលមួយចំនួន ដែលបញ្ជាក់ថា អ្នកគួរតែឈប់ធ្វើការឲ្យគេ ហើយងាកមកបើកជំនួញវិញ៖
១) មានឯករាជ្យ៖ ជាទូទៅ ក្នុងនាមជាបុគ្គលិកម្នាក់ទោះបីជាថ្នាក់ខ្ពស់ ឬ ទាបក្តីគឺជៀសមិនផុតពីការស្តាប់តាមការបង្គាប់បញ្ជាពីគេនោះទេ ហើយក៏មិនងាយនឹងបដិសេធឡើយទោះពេញចិត្ត ឬមិនពេញចិត្តក្តី។ សម្រាប់អ្នកដែលស្រលាញ់ភាពម្ចាស់ការ និង ឯករាជ្យលើខ្លួនឯងនោះ ប្រាកដជាពិបាកទ្រាំណាស់ ជាពិសេសធ្វើការជាមួយនឹងថ្នាក់លើដែលជំនាញខាងបញ្ជា។ ផ្ទុយទៅវិញ ការបើកជំនួញដោយខ្លួនឯងនឹងជួយឲ្យអ្នកមានសេរីភាព ក្នុងការសម្រេចចិត្ត ហើយអាចធ្វើអ្វីដែលខ្លួនគិតថាត្រឹមត្រូវ ដោយមិនចាំបាច់ស្តាប់តាមការបញ្ជារបស់គេ។ ដូច្នេះហើយ អ្នកមិនចាំបាច់រងសម្ពាធពីនរណាឡើយ។
២) អាចរៀបចំប្រព័ន្ធដឹកនាំដែលយល់ថាត្រឹមត្រូវ៖ នៅពេលធ្វើការឲ្យគេ អ្នកប្រាកដជាធុញទ្រាន់នឹងប្រព័ន្ធដឹកនាំ ដែលស្មុគស្មាញ និង គ្មានប្រសិទ្ធភាពទាំងនោះ ជាហេតុធ្វើឲ្យបុគ្គលិកមិនអាចបំពេញការងារបានល្អ។ នៅពេលបើកអាជីវកម្មខ្លួនឯង អ្នកអាចរៀបចំរចនាសម្ព័ន្ធដឹកនាំ ដែលខ្លួនគិតថាល្អ និង មានប្រសិទ្ធភាពដែលផ្តល់ភាពងាយស្រួលចំពោះបុគ្គលិក។
៣) អាចបង្កើតការងារដល់អ្នកដទៃ៖ នៅពេលអ្នកបើកជំនួញ គឺប្រាកដជាត្រូវការបុគ្គលិកមិនខាន ដែលនេះគឺជារឿងល្អមួយដែលអាចជួយឲ្យ មនុស្សផ្សេងទៀតឲ្យមានការងារធ្វើ ដើម្បីលើកស្ទួយជីវភាពគ្រួសារ និងប្រទេសជាតិ។ ដូច្នេះហើយ វាមិនត្រឹមតែចំណេញសម្រាប់ខ្លួនឯងទេ ប៉ុន្តែក៏អាចជួយអ្នកដទៃបានទៀត ដែលចំណុចនេះអ្នកត្រូវតែពិចារណាឲ្យបានច្បាស់។
៤) មានភាពរីករាយចិត្ត៖ ថ្វីបើការរកស៊ី គឺមានការលំបាកច្រើនក្តី ប៉ុន្តែធ្វើឲ្យអ្នកសប្បាយចិត្ត ទោះបីត្រូវធ្វើការច្រើនម៉ោងក្តី។ វាពិតជាមានភាពខុសគ្នា រវាងអារម្មណ៍នៃការធ្វើការឲ្យគេ និង ការធ្វើការឲ្យខ្លួនឯង ព្រោះការធ្វើការឲ្យគេ គឺអ្នកធ្វើឲ្យតែដល់ម៉ោង ហើយមិនបានបញ្ចេញឲ្យអស់សក្ដានុពលរបស់ខ្លួនដែរ នៅពេលមិនសូវពេញចិត្តជាមួយនឹងថ្នាក់លើ។ ប៉ុន្តែអ្នកនឹងធ្វើការអស់ពីចិត្ត និង អស់ពីសមត្ថភាព នៅពេលបើកជំនួញខ្លួនឯង ព្រោះថាអ្វីដែលប្រឹងប្រែងនោះ គឺនឹងបានទៅលើអ្នក។
៥) មានឱកាសក្លាយជាអ្នកមាន៖ នៅពេលធ្វើការឲ្យគេ បើទោះបីជាអ្នកមានប្រាក់ខែខ្ពស់ក្តី ប៉ុន្តែមិនអាចឲ្យអ្នកក្លាយជាអ្នកមាននឹងគេបានឡើយ។ ថ្វីបើការធ្វើជំនួញ មិនមែនជារឿងងាយស្រួល តែបើអ្នកមានក្តីស្រមៃចង់ក្លាយជាមនុស្សដែលមានលុយច្រើនក្នុងដៃ គឺគួរតែជ្រើសយកផ្លូវធ្វើជំនួញ មិនមែនធ្វើការឲ្យគេរហូតនោះទេ៕
ដោយ៖ រតនា វិចិត្រ
ប្រភព៖ www.entrepreneur.com & www.huffingtonpost.com
