តើតេស្លា (Tesla) អាចមកបោះទីតាំងស្ថានីយអាវកាស Space X និងបើករោងចក្រផលិតអាគុយ នៅ ឥណ្ឌូណេស៊ី មែនឬយ៉ាងណា?
មានព័ត៌មានលេចឮមកថា ក្រុមហ៊ុន តេស្លា (Tesla) របស់ Elon Musk មានគម្រោងក្នុងការបោះទីតាំងទីតាំងស្ថានីយអាវកាស Space X និងបើករោងចក្រផលិតអាគុយ នៅ ឥណ្ឌូណេស៊ី ជាប្រទេសបងធំសេដ្ឋកិច្ចក្នុងតំបន់អាស៊ីអាគ្នេយ៍។ តើនេះជាការពិតឬយ៉ាងណា? ហើយបើក្រុមហ៊ុនមួយនេះ ពិតជាសម្លឹងមើលទីផ្សារប្រទេសនេះតើវានឹងមានរឿងអ្វីកើតឡើងបន្តទៀត?
- ឥណ្ឌូណេស៊ីនៅតែជាបងធំនៅអាស៊ាន ខណៈទំហំ GDP សរុប ១,០៩ទ្រីលានដុល្លារ (ឆ្នាំ២០១៩) ឈរនៅលេខរៀងទី១៥ លំដាប់ពិភពលោក។ ឥណ្ឌូណេស៊ីមានផ្ទៃដីធំជាងគេនៅអាស៊ាន ១,៩លានគីឡូម៉ែត្រការ៉េ (លេខរៀងទី១៤ លំដាប់ពិភពលោក)។
- អាស៊ានមានប្រជាជនសរុប ៦៤០លាននាក់ ខណៈឥណ្ឌូណេស៊ី មានរហូតដល់ ២៧០លាននាក់ (ឆ្នាំ២០១៨) ស្មើនឹង ៤១% គឺ ១០០នាក់នៅអាស៊ាន មានជនជាតិឥណ្ឌូណេស៊ី ៤១នាក់។ ប្រទេសនេះមានកម្លាំងពលកម្មធំ និងនៅធូរថ្លៃ ហើយទីផ្សារក្នុងស្រុក (domestic consumption) ក៏ធំដែរ។
- ក្រៅពីនេះ ឥណ្ឌូណេស៊ីមាន Startups កំពុងរីកលូតលាស់ច្រើន ខណៈ Unicorn Startups (តម្លៃខ្លួនជាង ១ពាន់លានដុល្លារ) មាន ៥ គិតត្រឹមចុងឆ្នាំ២០១៩ មាន Go-Jek, Traveloka, Bukalapak, Tokopedia (Google & Temasek ទើបវិនិយោគ ៣៥០លានដុល្លារ) និង Bigo Tech...(អាចនឹងបន្តកើនថែមទៀត)។
- របាយការណ៍ economy Sea 2020 ឱ្យដឹងថា សេដ្ឋកិច្ចឌីជីថល ឥណ្ឌូណេស៊ី ធំជាងគេ (ឆ្នាំ២០២០ ទំហំ Gross Merchandize Value GMV គឺ ៤៤ពាន់លានដុល្លារកើន១១%ធៀបឆ្នាំ២០១៩ នឹងបន្តកើនដល់ ១២៤ពាន់លានដុល្លារនៅត្រឹមឆ្នាំ២០២៥)។ របាយការណ៍ដដែលនេះ កាលពីឆ្នាំ២០១៩ បានពន្លយថា ទៅអនាគតបើ ១០$ចាយនៅអាស៊ានលើសេដ្ឋកិច្ចឌីជីថល គឺ ៤$ ចាយដោយជនជាតិឥណ្ឌូណេស៊ី (មិនចម្លែកទេព្រោះឥណ្ឌូណេស៊ីមានប្រជាជនស្មើនឹង ៤១%នៃអាស៊ានទាំងមូល)
- ដោយឡែក ការសន្ទនាតាមទូរស័ព្ទរវាងប្រធានាធិបតី Joko Wododo និង Elon Musk អំពីការស្នើឱ្យតេស្លាបោះទីតាំងរោងចក្រនៅឥណ្ឌូណេស៊ីទំនងសម្រេចបាន។ ក្រុមហ៊ុនផ្គត់ផ្គង់អាគុយឱ្យ Tesla ឈ្មោះ Contemporary Amperex Technology (CATL) ដែលជា ក្រុមហ៊ុនចិន ប្រកាសផែនការបោះទុន ៥ពាន់លានដុល្លារសង់រោងចក្រផលិតអាគុយរថយន្តអគ្គិសនីនៅឆ្នាំ២០២៤ ដោយមើលឃើញសក្ដានុពលរ៉ែនីកែល (ឥណ្ឌូណេស៊ី ទាញយក និងផលិតរ៉ែនេះបានច្រើនជាងគេក្នុងលោក)។
- ក្រុមហ៊ុន LG Chemical ត្រូវបានគេហៅខ្លីថា LG Chem ជាក្រុមហ៊ុនបុត្រសម្ព័ន្ធរបស់ក្រុមហ៊ុនអិលជី ដែលផ្គត់ផ្គង់ឲ្យក្រុមហ៊ុន Tesla ដែរនោះក៏ពិចារណាវិនិយោគទំហំទឹកប្រាក់ ៩,៨ពាន់លានដុល្លារនៅប្រទេសដែនកោះមួយនេះដែរ។
- មហិច្ឆតាឥណ្ឌូណេស៊ី ដោយសារសម្បូររ៉ែនីកែល ឥណ្ឌូណេស៊ីចង់បង្វែរការនាំចេញរ៉ែទៅជាមជ្ឈមណ្ឌលផលិតអាគុយក្នុងស្រុក ផ្គត់ផ្គង់ពិភពលោកតែម្ដង មិនមែនតែការសហការជាមួយ CATL ទេ ហើយថែមទាំងមានមហិច្ឆតាផលិតរថយន្តអគ្គិសនី (EV) ក្នុងស្រុកថែមទៀតផង។ រដ្ឋឥណ្ឌូណេស៊ី បានដាក់បម្រាមនាំចេញរ៉ែនេះទៅកាន់ប្រទេសជាច្រើន ខណៈរ៉ែនីកែលមានសម្បូរតែនៅ កាណាដា អាមេរិកខាងជើង ហ្វីលីពីន និងរុស្ស៊ីតែប៉ុណ្ណោះ (បោះរោងចក្រនៅទីនោះ ពលកម្ម និងថ្លៃដើមថ្លៃ លើកលែងតែនៅហ្វីលីពីន) … មហិច្ឆតាគឺចង់ Turning into a Global Supply Chain
- លោក Wijoko ក៏ស្នើឱ្យ Elon Musk បោះទីតាំងស្ថានីយអវកាស SpaceX នៅទីតាំងដែលឥណ្ឌូណេស៊ីត្រៀមសម្រាប់បាញ់រ៉ុកកែតក្នុងស្រុកនៅកោះ Biak របស់ខេត្ត Papua ជាប់ប្រទេស Papua New Guinea។ ឥណ្ឌូណេស៊ីមានមហិច្ឆតាខ្ពស់លើការអភិវឌ្ឍន៍រ៉ុកកែត។ វិទ្យាស្ថានអាកាសចរណ៍ និងអវកាសជាតិឥណ្ឌូណេស៊ី កំពុងសាងសង់កន្លែងបាញ់រ៉ុកកែតដំបូងរបស់ខ្លួននៅកោះ Biak នាខេត្ត Papua ដែលគ្រោងបញ្ចប់ការសាងសង់នៅឆ្នាំ២០២៤។
- លោក Elon Musk នឹងបញ្ជូនក្រុមការងារទៅសិក្សាសំណើរបស់ឥណ្ឌូណេស៊ីសប្ដាហ៍ក្រោយ។
- តើអាចទេដែល Tesla មកបោះទីតាំងស្ថានីយបាញ់រ៉ុកកែត SpaceX នៅទីនេះ?
ដោយ យ៉ន សុភារិទ្ធ
ស្ថាបនិក BizKhmer, BizKhmer Media, and We Strong Realty
Powered by BizKhmer Media
Strategically operated by We Strong Realty
