សព្វាវុធទំនើបៗរបស់មហាយក្សចិន ៦ប្រភេទក្រៅពីយន្តហោះដែលប្រទេសមហាអំណាចមិនអាចមើលរំលង
កាលពីថ្ងៃម្សិលមិញ លោកអ្នកបានតាមដានយន្តហោះប្រយុទ្ធ និងទម្លាក់គ្រាប់ទំនើបៗរបស់ចិនទាំង ៥ប្រភេទ នាថ្ងៃនេះវិញ Biz Khmer សូមណែនាំឱ្យស្គាល់ពីសព្វាវុធទំនើបៗ ៦ប្រភេទទៀតរបស់មហាយក្សចិន។ ក) ជើងទម្របាញ់មីស៊ីលមានល្បឿនលឿនជាងសំឡេង (hyper-sonic glide vehicle)៖ Wu-14 ជាជើងទម្រសម្រាប់បាញ់មីស៊ីលមានល្បឿនលឿនជាងសំឡេង។ មីស៊ីលដែលបាញ់ដោយជើងទម្រនេះគឺប្រើរ៉ុកែតនាំផ្លូវដូចគ្នាទៅនឹង Ballistic Missile ដែរ។ បើគិតត្រឹមខែសីហា កន្លងទៅ រដ្ឋាភិបាលក្រុងប៉េកាំងបានធ្វើតេស្ដចំនួន ៥ដងរួចមកហើយ ហើយលើកចុងក្រោយបានធ្វើតេស្ដប្រកបដោយជោគជ័យ។ សព្វាវុធនេះត្រូវបានចិនផលិតឡើងដើម្បីប្រជែងជាមួយប្រព័ន្ធការពារមីស៊ីលរបស់សហរដ្ឋអាមេរិក។
ខ) នុយក្លេអ៊ែរបំពាក់លើនាវាមុជទឹក (nuclear-based submarine) ៖ ការបង្កើនកងនាវាមុខទឹកមានសមត្ថភាពវាយប្រហារដោយនុយក្លេអ៊ែរ គឺយុទ្ធសាស្ត្រធំរបស់រដ្ឋាភិបាលក្រុងប៉េកាំង។ តាមសេចក្តីរាយការណ៍របស់ Business Insider កាលពីឆ្នាំ២០១៤ រដ្ឋាភិបាលក្រុងប៉េកាំងមាននាវាមុជទឹកបំពាក់នុយក្លេអ៊ែរសម្រាប់ប្រយុទ្ធចំនួន ៦គ្រឿង។
គ) នាវាមុជទឹកបំពាក់អាវុធនុយក្លេអ៊ែរអន្តរទ្វីប ៖ យោងតាមសេចក្ដីរាយការណ៍របស់ Business Bloomberg នៅចុងឆ្នាំ២០១៥នេះ ចិនអាចនឹងដាក់ដំណើរការនាវាមុជទឹកប្រភេទថ្មីដែលអាចបាញ់មីស៊ីលអន្តរទ្វីបដល់គោលដៅណាមួយនៃទឹកដីសហរដ្ឋអាមេរិកបាន។ តួយ៉ាងដូចជាកងនាវា Jinclass ដែលមានបំពាក់មីស៊ីល JL-2 ជាដើម អាចបាញ់ដល់ទឹកដីកោះហាវ៉ៃ រដ្ឋអាឡាស់ស្កា និងឆ្នេរភាគខាងលិចរបស់ប្រទេសអាមេរិកបាន។ បច្ចុប្បន្នចិនមាននាវាមុជទឹកប្រភេទនេះចំនួន ៤គ្រឿង និងកំពុងផលិតមួយគ្រឿងទៀត។ 
ឃ) នាវាដឹកយន្តហោះ (Aircraft Carrier) ៖ រដ្ឋាភិបាលក្រុងប៉េកាំងមាននាវាដឹកយន្តហោះមួយគ្រឿងមានឈ្មោះថា Liaoning។ នាវានោះបន្សល់ទុកពីសម័យអតីតសហភាពសូវៀត ដែលចិនបានទិញ និងយកមកកែច្នៃឡើងវិញ។ វាត្រូវបានដាក់ឱ្យដំណើរការជាលើកដំបូងនៅខែកញ្ញា ឆ្នាំ២០១២។វាមានប្រហែល ៣០០ម៉ែត្រ និងអាចផ្ទុកទម្ងន់បានជិត ៧ម៉ឺនតោន។
ង) មីស៊ីលប្រឆាំងនឹងផ្កាយរណប (Anti-Satellite Missiles)៖ មេបញ្ជាការកងទ័ពជើងអាកាសរបស់អាមេរិកម្នាក់ បានអះអាងថា ចិនបានសាកល្បងបានដោយជោគជ័យ មីស៊ីលកម្ទេចផ្កាយរណបបាញ់ពីលើដី។ មន្ត្រីអាមេរិកដដែលបានលើកឡើងថា នាពេលឆាប់ៗខាងមុខនេះ ផ្កាយរណបនឹងស្ថិតនៅក្នុងហានិភ័យ។ ច) មីស៊ីលអន្តរទ្វីប (ICBM)៖ ចិនបានចំណាយធនធានយ៉ាងច្រើនដើម្បីអភិវឌ្ឍន៍គ្រាប់មីស៊ីល ballistic អន្តរទ្វីប។ កាលពីខែសីហា ឆ្នាំទៅមិញ ចិនបានសាកល្បងមីស៊ីលអន្តរទ្វីប Dong Feng 5A បានដោយជោគជ័យក្នុងចម្ងាយប្រតិបត្តិការប្រមាណ ១៣ ០០០គីឡូម៉ែត្រ គឺមានសមត្ថភាពគ្រប់គ្រាន់វាយប្រហារដល់ដែនដីសហរដ្ឋអាមេរិក។ ឆ) មីស៊ីលអន្តរទ្វីបចល័តតាមផ្លូវ (Road-Mobile ICBM)៖ មិនត្រឹមតែមីស៊ីល ballistic បាញ់ពីជើងទម្រមួយកន្លែងប៉ុណ្ណោះទេ ប៉ុន្តែចិនក៏មានប្រភេទចល័តដែលអាចបាញ់បានចម្ងាយចន្លោះពី ១១ ២០០ ទៅ ១២ ០០០គីឡូម៉ែត្រ។ កាលពីខែសីហា កន្លងទៅ ចិនបានសាកល្បង DF-41 ជាប្រភេទមីស៊ីលអន្តរទ្វីបថ្មីបានដោយជោគជ័យ ៕
ដោយ៖ រតនៈវិភូ ប្រភព៖ businessinsider, missilethreat.com, thediplomat.com/
