ឧបសគ្គ៣យ៉ាងដែលគ្រប់គ្នាពិបាកជម្នះបំផុត តែបើជម្នះបានគឺដឹងតែជោគជ័យក្នុងជីវិត
អ្នកអាចនឹងមិនដែលចាប់អារម្មណ៍យកចិត្តទុកដាក់ពីការគិតរបស់ខ្លួននោះឡើយ ប៉ុន្តែឥទ្ធិពលរបស់វាមកលើជីវិតអ្នក តែងគ្របដណ្ដប់ពេញដង្ហើមជីវិតរបស់អ្នក។ អ្នកយល់ឃើញបែបណា អ្នកនឹងឆ្លើយតបបែបនោះ ហើយការប្រព្រឹត្តរបស់អ្នកបែបណា វានឹងកំណត់នូវផលដែលអ្នកទទួលបានបែបនោះដូចគ្នា។ ក្នុងរូបភាពនៃហេតុការណ៍មួយកើតឡើង រូបភាពជាក់ស្ដែងពិតប្រាកដនៃហេតុការណ៍នោះមានតែមួយនោះទេ ប៉ុន្តែរូបភាពនៅក្នុងការគិតរបស់មនុស្សម្នាក់ៗវិញ មានភាពខុសប្លែកពីគ្នាទាំងអស់ ដោយមិនអាចធ្វើការសន្និដ្ឋានជាមុនបានថា ការយល់ឃើញរបស់អ្នកនេះត្រឹមត្រូវ ហើយការយល់ឃើញរបស់អ្នកនោះមិនត្រឹមត្រូវនោះឡើយ។ បុគ្គលជោគជ័យតែងមានការយល់ឃើញវិជ្ជមានដែលនាំពួកគេឲ្យជោគជ័យ រីឯបុគ្គលបរាជ័យវិញតែងមានការយល់ឃើញអវិជ្ជមានដែលនាំពួកគេឲ្យបរាជ័យ។ ហេតុនេះ ដើម្បីទទួលបានភាពជោគជ័យក្នុងជីវិត គំនិតជារនាំងឧបសគ្គ៣យ៉ាងខាងក្រោម គឺជាអ្វីដែលអ្នកចាំបាច់យកឈ្នះឲ្យបានដាច់ខាត៖
១) អាយុ៖ បុគ្គលបរាជ័យយល់ថា អាយុរបស់ពួកគេគឺជាកត្តាកំណត់ថាតើខ្លួនគេជានរណា និងអាចធ្វើអ្វីបានខ្លះ។ ពួកគេថែមទាំងយល់ថា កត្តានេះជាឧបសគ្គដែលមិនអាចផ្លាស់ប្ដូរពួកគេទៅកាន់ទីកន្លែងជាក្ដីប្រាថ្នារបស់គេបានទៀតផង ដូច្នេះក៏បញ្ចប់នូវក្ដីសុបិនរបស់ខ្លួននៅត្រឹមឧបសគ្គនៃអាយុដែលតាមពិតវាជាលេសនោះទៅ។ ខុសពីគ្នាដាច់ស្រឡះ បុគ្គលជោគជ័យ ប្រគល់អំណាចដល់បេះដូងរបស់ពួកគេ និងជំនក់ចិត្តរបស់ពួកគេ ជាអ្នកដឹកនាំជីវិត មិនមែនជាសម្បកកាយដែលពួកគេតាំងទីលំនៅនោះឡើយ។
២) អតីតកាល ឬអនាគតកាល៖ គ្មានការសោកស្ដាយកម្រិតណាដែលអាចផ្លាស់ប្ដូរអតីតកាលរបស់អ្នក ហើយក៏គ្មានកង្វល់ខ្វល់ខ្វាយកម្រិតណាដែលអាចផ្លាស់ប្ដូរអនាគតកាលរបស់អ្នកបានដូចគ្នាដែរ។ បុគ្គលជោគជ័យដឹងថា រឿងដែលកន្លងហួសទៅ និងរឿងដែលមិនទាន់មកដល់ គឺជាអ្វីដែលនៅក្រៅអំណាចគ្រប់គ្រងរបស់ពួកគេ។ អ្វីដែលស្ថិតនៅក្នុងអំណាចគ្រប់គ្រងរបស់ពួកគេ និងដែលល្អបំផុតសម្រាប់ពួកគេឆ្លើយតបចំពោះរឿងទាំងនោះវិញ គឺជាការផ្ដោតយ៉ាងពេញទំហឹងក្នុងពេលបច្ចុប្បន្ន ក្នុងខណៈនេះ ឥឡូវនេះ ព្រោះថាពួកគេនឹងមិនអាចគាស់រំលើងសក្ដានុពលរបស់ខ្លួនបានអស់នោះឡើយ បើការគិតរបស់គេហោះហើររសាត់គ្មានកោះត្រើយនៅទីណាផ្សេងនោះ។ លោក Mark Twain ក៏បាននិយាយដូច្នេះថា "ការបារម្ភខ្វាយខ្វល់ប្រៀបបានទៅនឹងការណ៍ដែលអ្នកសងនូវបំណុលដែលខ្លួនមិនធ្លាប់ដែលបានជំពាក់ដូច្នោះ"។
៣) សភាពការខាងក្រៅរបស់ពិភពលោក៖ សង្គ្រាមហិង្សា ការកាប់សម្លាប់គ្នា សេដ្ឋកិច្ចធ្លាក់ចុះ គ្រោះទុរភិក្សជាដើម ដោយចូលទៅពិចារណាឲ្យជ្រៅបន្តិចទៅ ហេតុការណ៍ទាំងនេះ សុទ្ធតែជាវដ្ដនៃហេតុការណ៍ដែលកើតឡើងដដែលៗម្ដងហើយម្ដងទៀត។ ជាការខាតបង់ដ៏ខ្ជះខ្ជាយបំផុត ដែលទៅយកចិត្តទុកដាក់ខ្វាយខ្វល់រឿងដែលនៅក្រៅអំណាចគ្រប់គ្រងរបស់ខ្លួននោះ។ ងាកមកអ្វីដែលបុគ្គលជោគជ័យឆ្លើយតបចំពោះហេតុការណ៍ទាំងនេះវិញ គឺពួកគេនឹងផ្ដោតទៅលើអ្វីដែលខ្លួនគ្រប់គ្រងបាន ជាការបូជាកម្លាំងកាយចិត្ត និងពេលវេលាមានទាំងប៉ុន្មានផ្ដោតទៅលើផ្នែកវិជ្ជមាននៃជីវិត និងផ្ដោតការប្រើប្រាស់ភាពតស៊ូខិតខំរបស់ខ្លួន ធ្វើនូវអ្វីដែលសេសសល់សម្រាប់ខ្លួនធ្វើបាន ដើម្បីបង្កើនគុណភាពនៃជីវិត និងអភិវឌ្ឍពិភពលោកជុំវិញខ្លួនក្លាយជាកន្លែងដ៏ល្អប្រសើរសម្រាប់មនុស្សរស់នៅ៕
ប្រែសម្រួល៖ ស្រីពៅ ប្រភព៖ cnbc
