មេរៀន៣យ៉ាងដែលមានតម្លៃជាងមេរៀនណាៗទាំងអស់ដែលអ្នកអាចរៀនសូត្រពីការងាររបស់លោកJoe Biden
នាថ្ងៃព្រហស្បតិ៍ថ្មីៗកន្លងទៅនេះ លោក Joe Biden ជាអនុប្រធានាធិបតីសហរដ្ឋអាមេរិក ត្រូវបានបំពាក់នូវមេដាយកិត្តិយសសន្តិភាពពីលោក អូបាម៉ា ដែលជាកិត្តិយសដ៏ខ្ពង់ខ្ពស់មួយដែលជនសីុវិលអាចទទួលបាន។ ដោយឆ្លងកាត់នូវព្យុះភ្លៀងឧបសគ្គរារាំងនៅលើផ្លូវដើរដែលមានសភាពយ៉ាងរដាក់រដុបនៃជីវិតរបស់លោកកន្លងមក មិនថាតែចំពោះឧបសគ្គក្នុងអាជីពការងាររបស់ខ្លួននោះឡើយ តែថែមទាំងគ្រោះអភ័ព្វកើតមានមកលើជីវិតមនុស្សជាទីស្រឡាញ់៣នាក់ក្នុងគ្រួសារផងដែរនោះ ក៏ឧបសគ្គទាំងនោះ តែងតែបានជំរុញគាត់ឲ្យពុះពារទទួលយកជ័យជម្នះមកក្នុងជីវិតវិញជានិច្ច។ មេរៀន៣យ៉ាងខាងក្រោមអំពីការងាររបស់លោក នឹងធ្វើឲ្យអ្នកយល់ថាជាមេរៀនដែលមានតម្លៃជាងមេរៀនណាៗទាំងអស់ដែលអ្នកធ្លាប់ទទួលបានកន្លងមក៖
១) មិនថាជាឧបសគ្គនោះទេ ទោះបីជាសោកនាដកម្មក៏មិនចាំបាច់ដល់ថ្នាក់អ្នកត្រូវបោះបង់គោលដៅរបស់ខ្លួនដែរ៖ នៅក្នុងខែវិច្ឆិកា ឆ្នាំ១៩៧២ លោក Biden ក្នុងវ័យ៣០ឆ្នាំ ត្រូវបានជ្រើសតាំងជាព្រឹទ្ធសភាជាមួយនឹងសំឡេងឆ្នោតត្រឹមតែ៣,០០០សំឡេងប៉ុណ្ណោះ។ ក្រោយមកសោកនាដកម្មដ៏គួរឲ្យសោកសង្វែងមួយកើតឡើងចំពោះគ្រួសាររបស់លោក ដែលបណ្ដាលឲ្យប្រពន្ធ និងកូនស្រីម្នាក់របស់លោក បានស្លាប់បាត់បង់ជីវិតក្នុងពេលគ្រោះថ្នាក់ចរាចរណ៍ឡាន និងមានរបួសធ្ងន់ធ្ងរទៅលើកូនប្រុសពីរនាក់ទៀត។ ដោយសារការប៉ះទង្គិចផ្លូវចិត្តយ៉ាងខ្លាំងរបស់លោក បានធ្វើឲ្យលោកសម្រេចចិត្តបដិសេធមិនទទួលយកការជ្រើសតាំងជាព្រឹទ្ធសភានាពេលនោះឡើយ ទោះជាយ៉ាងណា ដោយមានការបន្តជំរុញរូបលោកពីអ្នកដឹកនាំរបស់លោកឲ្យទទួលយកតំណែងនេះវិញ លោកក៏បានសម្រេចចិត្តយល់ព្រមបំពេញតួនាទីតាមតំណែងរបស់ខ្លួនវិញ។ លោកបានពាំនាំនូវពាក្យស្បថស្បែចេញពីមន្ទីរពេទ្យដែលកូនប្រុសស្នាក់នៅ និងបានបន្តប្រឹងប្រែងបំពេញភារកិច្ច រហូតបានឡើងកាន់តំណែងជាប្រធានគណៈកម្មាធិការព្រឹទ្ធសភាតុលាការក្នុងឆ្នាំ១៩៨៧។
២) រៀនសូត្រពីកំហុសរបស់អ្នកដើម្បីប្រាកដថាអ្នកមានកេរ្តិ៍មរតកសម្រាប់បន្សល់ទុក៖ ក្នុងឆ្នាំ១៩៨៨ លោកបានឈរឈ្មោះជ្រើសតាំងជាប្រធានាធិបតីសហរដ្ឋអាមេរិក ប៉ុន្តែដោយសារមានរបាយការណ៍ពីការលួចចម្លងស្នាដៃអ្នកដទៃកំឡុងពេលលោករៀននៅសាលាច្បាប់ និងអំណះអំណាងមិនត្រឹមត្រូវពីកំណត់ត្រាការសិក្សារបស់លោក ក៏បានធ្វើឲ្យផែនការរបស់លោកត្រូវប្រឈមនឹងការបរាជ័យ ហើយក្រោយមកគាត់ក៏បានសន្យាថានឹងធ្វើខ្លួនជាមនុស្សដែលមានភាពស្មោះត្រង់ជាងមុន។ សកម្មភាពរបស់គាត់ចាប់តាំងពីពេលនោះមក បានបញ្ជាក់ភស្តុតាងយ៉ាងច្បាស់ពីភាពស្មោះត្រង់របស់លោកយ៉ាងពិតប្រាកដ រហូតដល់សារព័ត៌មានCBS (CBS News) និងការស្ទង់មតិរបស់សារព័ត៌មានNew York Times (New York Times poll) បានរកឃើញថា លោក Biden គឺជាអ្នកនយោបាយដែលមានភាពស្មោះត្រង់បំផុតចំពោះគណបក្សទាំងពីររបស់អាមេរិក។
យ៉ាងណាមិញ មកដល់ត្រង់ចំណុចមួយនៃផ្លូវដើរដ៏លំបាកលំបិនរបស់លោក ក្នុងឆ្នាំ១៩៩១ ការខ្វែងគំនិតពីមនុស្សមួយចំនួនបានកើតមានចំពោះលោក ក្នុងតួនាទីដែលលោកទទួលខុសត្រូវផ្ទាល់ក្នុងសវនាការរបស់តុលាការកំពូលClarence Thomas ដែលជាប់ពាក់ព័ន្ធទៅនឹងការចោទប្រកាន់របស់បុគ្គលិកលោកម្នាក់ពីបទរំលោភបំពានផ្លូវភេទ ហើយលោកមិនបានបំពេញតួនាទីឲ្យត្រឹមត្រូវដោយកោះហៅសាក្សី៣នាក់ដែលអាចអះអាងគាំទ្រដល់ការចោទប្រកាន់របស់នាងនោះឡើយ ទើបបង្កជាលទ្ធផលនូវការខ្វែងគំនិតពីភាពអយុត្តិធម៌នេះ។ បន្សល់នូវភាពវិប្បដិសារីចំពោះការប្រព្រឹត្តិរបស់ខ្លួន នៅឆ្នាំបន្ទាប់ពីនោះ លោកបានលើកឡើងពីច្បាប់ដែលគាំទ្រទៅដល់បញ្ហារបស់ស្ត្រី ហើយក៏ទទួលបានការចុះហត្ថលេខាបញ្ចូលទៅក្នុងច្បាប់អំពីការប្រឆាំងទៅលើការប្រព្រឹត្តិអំពើហិង្សាចំពោះស្ត្រីពីលោកស្រី Hilary Clintonក្នុងឆ្នាំ១៩៩៤។ ដោយមានការទទួលខុសត្រូវជាអនុប្រធានាធិបតីផងដែរនោះ លោកក៏បានក្លាយជាប្រធានតំណាងឲ្យការគ្រប់គ្រងទៅលើយុទ្ធនាការរបស់លោកអូបាម៉ា ក្នុងការលុបបំបាត់នូវអំពើហិង្សាទៅលើស្ត្រី។
៣) ឲ្យការខិតខំតស៊ូពុះពារជាផ្លាកសញ្ញារបស់អ្នក៖ ក្នុងឆ្នាំ២០១៥ សោកនាដកម្មមួយទៀតកើតមានចំពោះកូនប្រុសច្បងរបស់លោកម្នាក់ បណ្ដាលឲ្យស្លាប់បាត់បង់ជីវិតក្នុងវ័យ៤៦ឆ្នាំដោយសារជំងឺមហារីកខួរក្បាល។ ការប៉ះពាល់ផ្លូវចិត្តនេះទៀត ក៏បានក្លាយជាកត្តាជំរុញលោកឲ្យបោះបង់ចោលនូវការឈរឈ្មោះជ្រើសតាំងជាប្រធានាធិបតីម្ដងទៀតក្នុងឆ្នាំ២០១៦ ដែលធ្វើឲ្យលោកមានវិប្បដិសារីរៀងរាល់ថ្ងៃរហូតមកទល់ពេលនេះ។ ទោះជាយ៉ាងណា លោកក៏បានប្ដេជ្ញាថានឹងចូលរួមយ៉ាងសកម្មក្នុងសកម្មភាពនយោបាយទាំងឡាយ។
សម្ដីមួយឃ្លាដកស្រង់ចេញពីលោក Biden ដោយផ្ទាល់ក្នុងឆ្នាំ២០០៨គឺ "ការបរាជ័យនៅក្នុងដំណាក់កាលមួយនៃជីវិតគឺជារឿងមួយដែលមិនអាចចៀសបាន តែការបោះបង់ចោលវិញគឺជារឿងមួយដែលមិនអាចលើកលែងទោសឲ្យបានឡើយ"៕
ប្រែសម្រួល៖ ស្រីពៅ
ប្រភព៖ cnbc
