ហេតុអ្វីអ្នកចាំបាច់ត្រូវស្គាល់ច្បាស់ពីបុគ្គលិកលក្ខណៈរបស់ខ្លួនឯង ?
ពំនោលមួយរបស់តាលែស ដែលជាទស្សនវិទូដ៏ល្បីល្បាញមួយរូបរបស់ក្រិកបុរាណនាឆ្នាំ៦២៤មុនគ.ស ដល់ឆ្នាំ៥៤៧មុនគ.ស មានសេចក្ដីថា៖ «អ្វីដែលលំបាកបំផុតនៅក្នុងជីវិតគឺជាការស្គាល់ខ្លួនឯង»។ បើការស្គាល់ពីធាតុពិតរបស់ខ្លួន ជារឿងលំបាកបំផុតដូច្នេះ ហេតុអ្វីមនុស្សម្នាក់ៗចាំបាច់បង្ខាតពេលវេលាក្នុងការស្វែងរកវាដើម្បីអ្វី ? តើភាពសំខាន់នៃការស្គាល់ពីខ្លួនឯងមានខ្លាំងកម្រិតណា ហើយវាមានប្រយោជន៍យ៉ាងដូចម្ដេចខ្លះសម្រាប់ជីវិតរស់នៅរបស់មនុស្ស ?
តាមពិតទៅក្នុងសម័យបច្ចេកវិទ្យាទំនើបនាសតវត្សទី២១នេះ មានកម្មវិធីតាមអនឡាញជាច្រើន ដែលបង្កើតឡើងក្នុងគោលបំណងជួយអ្នកស្វែងយល់ពីខ្លួនឯងឲ្យបានស៊ីជម្រៅ ដោយផ្ដល់ជាសំណួរផ្ទាល់ខ្លួនធ្វើតេស្តសាកសួរអ្នក។ នៅពេលអ្នកបានបំពេញចម្លើយទៅកាន់គ្រប់សំណួរដែលបានដាក់មកនោះហើយ កម្មវិធីប្រភេទនោះនឹងធ្វើការវាយតម្លៃថាតើអ្នកជាមនុស្សមានអត្តចរិតបែបណា ហើយការងារណាស័ក្ដិសមសម្រាប់អត្តចរិតដែលអ្នកមាន ឬជាការវាយតម្លៃផ្សេងៗដែលមានទម្រង់ស្រដៀងៗគ្នានេះ។ ឥឡូវនេះ យើងនាំគ្នាងាកមកចាប់អារម្មណ៍នឹងសំណួរខាងលើវិញ។ ការស្គាល់ពីខ្លួនឯងនឹងផ្ដល់ប្រយោជន៍ដល់អ្នកដូចដែលបានបង្ហាញនៅខាងក្រោមនេះ៖
១) កាលណាអ្នកស្គាល់ពីខ្លួនឯង អ្នកនឹងឈានដល់កម្រិតមួយដែលអ្នកយល់ពីអ្នកដទៃកាន់តែប្រសើរជាងមុន៖ មកដល់ដំណាក់កាលមួយនៃជីវិត នៅពេលអ្នកចាប់ផ្ដើមកត់សម្គាល់ដឹងថា ខ្លួនអ្នកមានអត្តចរិតបែបណា ចរិតនៃការគិតរបស់អ្នកប្រព្រឹត្តទៅយ៉ាងដូចម្ដេច ដែលចង់សំដៅលើថាតើអ្នកទម្លាប់គិតយ៉ាងដូចម្ដេច នោះការយល់ពីអ្នកដទៃនឹងក្លាយជាភាពងាយស្រួលសម្រាប់អ្នក។ ឯការដាក់ខ្លួនទទួលស្គាល់ពីភាពខុសប្លែកគ្នានៃគំនិត អត្តចរិតរបស់មនុស្សម្នាក់ៗ នឹងជាឱកាសដល់អ្នកបើកចំហទទួលរៀនសូត្រពីភាពខុសគ្នាទាំងនោះ ហើយទំនាក់ទំនងរបស់អ្នកនិងពួកគេនឹងវិវត្តទៅរកការយល់ពីគ្នាទៅវិញទៅមក និងបង្កប់នូវអត្ថន័យជ្រាលជ្រៅ។
២) អ្នកនឹងអាចកំណត់សម្គាល់បានថាអ្វីជាចំណុចខ្លាំង និងអ្វីជាចំណុចខ្សោយរបស់ខ្លួន៖ ការយល់ដឹងច្បាស់ពីចំណុចខ្លាំងនិងចំណុចខ្សោយរបស់ខ្លួនឯង មានភាពចាំបាច់បំផុតជាពិសេសក្នុងជីវិតការងាររបស់អ្នក។ អាចដោយសារតែភាពមមាញឹកនៃការបំពេញកិច្ចការងារជាប្រចាំថ្ងៃរបស់អ្នក បង្កើតគម្លាតដល់អ្នកក្នុងការស្វែងយល់ពីសំឡេងខាងក្នុងរបស់អ្នក អ្វីជាធាតុពិតរបស់អ្នក។ ពេលខ្លះដោយឥតដឹងខ្លួន មិនថាចំពោះការសិក្សាឬការងារនោះទេ អ្នកចូលខ្លួនទៅបំពេញការងារអ្វីមួយទាំងងងឹតងងល់ដោយមិនដឹងថាផ្នែកនេះឬផ្នែកនោះមិនមែនជាជំនាញរបស់ខ្លួន រួចក៏សាងនូវលទ្ធផលមិនគួរជាទីគាប់ចិត្ត។
នៅពេលស្ថានភាពបែបនេះប្រព្រឹត្តទៅជាញឹកញាប់ដោយមិនមានការឈ្វេងយល់ពីធាតុពិតរបស់ខ្លួន អ្នកនឹងចាប់ផ្ដើមយល់ថាខ្លួនគ្មានសេចក្ដីសុខ ជីវិតគ្មានគុណភាពនិងគ្មានតម្លៃមិនខាន។ យ៉ាងណាមិញ បើអ្នកស្គាល់ខ្លួនឯងច្បាស់ថាអ្វីជាភាពខ្លាំងរបស់អ្នកនិងអ្វីជាភាពខ្សោយ នោះអ្នកនឹងអាចបង្កើនប្រសិទ្ធភាពទាំងចំពោះការងារនិងជីវិតរបស់អ្នកយ៉ាងរលូន។ ថ្វីត្បិតតែ កម្មវិធីវាយតម្លៃពីបុគ្គលិកលក្ខណៈតាមអនឡាញមួយចំនួន អាចបំពេញតម្រូវការឲ្យអ្នកនូវប្រយោជន៍ទាំងនេះមែន ប៉ុន្តែវាមិនមែនជាឧបករណ៍ដែលកំណត់ថាអ្នកពិតជាស័ក្ដិសមនឹងការងារផ្នែកណាមួយមែន ឬការវាយតម្លៃផ្សេងទៀតដែលចាត់ទុកថាត្រឹមត្រូវមិនលម្អៀងនោះឡើយ។ វាគ្រាន់តែជាឧបករណ៍ជំនួយជួយអ្នកស្វែងយល់ពីខ្លួនឯងជាងមុនប៉ុណ្ណោះ ការវិនិច្ឆ័យថាតើអ្នកពិតជាមានអត្តចរិតបែបនោះមែនឬអត់ និងបើមានអត្តចរិតបែបនោះមែន ការងារផ្នែកនោះពិតជាស័ក្ដិសមសម្រាប់អ្នកនិងជាអ្វីដែលខ្លួនពេញចិត្តធ្វើមែនឬអត់ គឺស្ថិតនៅលើអ្នកទៅវិញទេ៕
ប្រែសម្រួល៖ ស្រីពៅ ប្រភព៖ www.verywell.com
