តើអ្នកមានផ្នត់គំនិតមួយណា (ផ្នត់គំនិតអន់ថយ ឬ ផ្នត់គំនិតរីកចម្រើន)?
ដោយគ្រាន់តែស្វែងយល់ពីផ្នត់គំនិត ដែលជាទម្លាប់នៃការគិតរបស់បុគ្គលម្នាក់ នោះអ្នកនឹងអាចមើលឃើញធ្លុះទៅដល់លទ្ធផលដែលពួកគេនឹងទទួលបានចំពោះការសម្រេចកិច្ចការណាមួយ។ វាមិនមែនជាទេពកោសល្យពីកំណើត ស្ថានភាពខុសគ្នារបស់បុគ្គលម្នាក់ៗ សំណាងចៃដន្យ ឬជាព្រេងវាសនាកំណត់នោះទេ ដែលកំណត់ទៅលើលទ្ធផលជោគជ័យឬបរាជ័យរបស់បុគ្គលម្នាក់។ មនុស្សម្នាក់ពូកែជាងមនុស្សម្នាក់ទៀតបាន គឺដោយសារការគិតរបស់ពួកគេ។ តើពួកគេទម្លាប់គិតបែបណា ?
រាល់ពួកយើងម្នាក់ៗ ចាក់ឫសនឹងផ្នត់គំនិតមួយក្នុងចំណោមផ្នត់គំនិតពីរប្រភេទមាន ផ្នត់គំនិតរីកចម្រើន និងផ្នត់គំនិតអន់ថយ។ អ្នកប្រហែលជាមិនដឹងខ្លួនក៏ថាបាន ថាតើអ្វីដែលអ្នកទម្លាប់គិតគ្រប់ពេលនោះ ជាផ្នត់គំនិតរីកចម្រើនឬអន់ថយ។ ប៉ុន្តែហេតុអ្វីអ្នកចាំបាច់ត្រូវយល់ដឹងអំពីវា ? ព្រោះថានៅពេលមនុស្សគិតបែបណា ពួកគេនឹងឆ្លើយតបទៅកាន់ស្ថានភាពរបស់ពួកគេដោយយោងទៅតាមការយល់ឃើញបែបនោះ ហើយវានឹងទទួលខុសត្រូវចំពោះរាល់លទ្ធផលដែលពួកគេទទួលបាន។ បុគ្គលណាដែលមើលឃើញសមត្ថភាពរបស់ខ្លួនថាជាការកំណត់ពីធម្មជាតិ មិនអាចកែប្រែឬអភិវឌ្ឍបាន គេកំពុងមានផ្នត់គំនិតអន់ថយហើយ។ ផ្ទុយទៅវិញ បើបុគ្គលណាដែលមើលឃើញសមត្ថភាពរបស់ខ្លួនថាជាអ្វីដែលអាចអភិវឌ្ឍបាន ដោយការខិតខំប្រឹងប្រែង នោះគេមានផ្នត់គំនិតរីកចម្រើនហើយ។ នៅក្នុងស្ថានភាពដូចគ្នា ប៉ុន្តែភាពខុសគ្នានៃការគិតរបស់មនុស្សម្នាក់ៗ ធ្វើឲ្យជោគវាសនាជីវិតរបស់ពួកគេ ប្រែក្លាយជាភាពខុសគ្នាដូចមេឃនិងដីទៅវិញ។ ឧទាហរណ៍ចំពោះឧបសគ្គក្នុងជីវិត អ្នកមានផ្នត់គំនិតអន់ថយនឹងមើលឃើញថា នេះជាវាសនាពួកគេកំណត់មកឲ្យត្រូវបរាជ័យបែបនេះ ដូច្នេះទោះជាពួកគេប្រឹងប្រែងប៉ុណ្ណាក៏មិនអាចកែប្រែអ្វីបានដែរ។ ក្នុងស្ថានភាពតែមួយនេះ តើអ្នកមានផ្នត់គំនិតរីកចម្រើននឹងមានការយល់ឃើញដូចម្ដេចវិញ ? ពួកគេដឹងថាដោយការខិតខំតស៊ូរបស់ខ្លួន និងស្មារតីមិនបោះបង់ដោយងាយៗ ពួកគេប្រាកដនឹងអាចយកឈ្នះលើការលំបាកនោះក្នុងពេលណាមួយជាក់ជាពុំខានឡើយ។
ត្រង់ចំណុចនេះ ទស្សនវិទូក្រិកបុរាណ ផ្លាតុង ក៏បានពោលថា "ជ័យជម្នះដែលទទួលបានពីការយកឈ្នះលើខ្លួនឯង គឺជាជ័យជម្នះដំបូងនិងមានតម្លៃបំផុតជាងជ័យជម្នះណាៗទាំងអស់"។ រវាងបុគ្គលទាំងពីរប្រភេទនេះ នៅពេលពួកគេជោគជ័យក៏ការគិតរបស់ពួកគេមើលឃើញខុសគ្នាដែរ ដែលមានឥទ្ធិពលទៅលើអនាគតជីវិតរបស់ពួកគេផងដែរ។ អ្នកមានផ្នត់គំនិតអន់ថយនឹងសួរថា "តើលទ្ធផលការងាររបស់ខ្ញុំយ៉ាងណាដែរ" ? តែអ្នកមានផ្នត់គំនិតរីកចម្រើននឹងសួរថា "តើអ្វីដែលខ្ញុំអាចធ្វើបានដើម្បីអភិវឌ្ឍសមត្ថភាពខ្ញុំឲ្យកាន់តែល្អជាងនេះ" ? មហាសេដ្ឋីបច្ចេកវិទ្យា ប៊ីល ហ្គេតបាននិយាយដូច្នេះថា "ភាពជោគជ័យគឺជាគ្រូដ៏អាក្រក់មួយ ព្រោះវានឹងអូសទាញមនុស្សឆ្លាតទាំងឡាយឲ្យគិតថាពួកគេនឹងមិនអាចបរាជ័យបានជាដាច់ខាត"។ ទោះជាយ៉ាងណាក៏ដោយ ផ្នត់គំនិតនេះមិនមែនចាក់ឫសជាប់នៅក្នុងការគិតរបស់អ្នករហូតដល់ដង្ហើមចុងក្រោយរបស់អ្នកនោះឡើយ។ អ្នកនឹងអាចផ្លាស់ប្ដូរវាបាន ប្រសិនបើអ្នកមានឆន្ទៈមោះមុតនិងតាំងចិត្តថានឹងផ្លាស់ប្ដូរវា ព្រមទាំងចាំជានិច្ចថាជោគវាសនារបស់អ្នក គឺស្ថិតនៅក្នុងកណ្ដាប់ដៃរបស់អ្នកនោះហើយ៕
ប្រែសម្រួល៖ ស្រីពៅ ប្រភព៖ www.skillsyouneed.com
