ថ្នាក់ធុរកិច្ចដែលមានតម្លៃ និងអំណាចបំផុតទាំង ១០ក្នុងលោកប្រចាំឆ្នាំ២០១៧
ជារៀងរាល់ឆ្នាំ ក្រុមហ៊ុនផ្ដល់សេវាកម្មអប់រំរបស់សហរដ្ឋអាមេរិកឈ្មោះ QS បានបង្កើតចំណាត់ថ្នាក់សកលវិទ្យាល័យដែលមានគុណភាពល្អបំផុតក្នុងលោកដោយបំបែកទៅតាមតំបន់ និងទៅតាមមុខជំនាញ។ គេហទំព័រ Business Insider បានស្រង់យកសាកលវិទ្យាល័យដែលល្អបំផុតខាងផ្នែកធុរកិច្ច និងផ្នែកគ្រប់គ្រងចំនួន១៩ តែ BizKhmer សូមបង្ហាញសាកលវិទ្យាល័យកំពូលផ្នែកធុរកិច្ចទាំង ១០៖
១) Harvard៖ មិនចម្លែកនោះទេ ដែលសាកលវិទ្យាល័យមួយនេះនៅតែល្បីផុតលេខក្នុងលោកខាងជំនាញធុរកិច្ច និងគ្រប់គ្រង។
២) London Business School៖ នៅអង់គ្លេស នេះហើយជាសាកលវិទ្យាល័យកំពូលផ្នែកធុរកិច្ច និងគ្រប់គ្រងដែលឈរនៅលេខពីរក្នុងលោក។ ៣) INSEAD៖ ត្រូវបានចាត់ថ្នាក់ថា ជាសាកលវិទ្យាល័យល្អបំផុតក្នុងចំណោមប្រទេសដែលមិននិយាយភាសាអង់គ្លេស។ សាកលវិទ្យាល័យដែលមានមូលដ្ឋាននៅប្រទេសបារាំងមួយនេះគឺផ្ដោតសំខាន់លើកម្មវិធីក្រោយឧត្តមសិក្សាដូចជាថ្នាក់អនុបណ្ឌិតពាណិជ្ជកម្មជាដើម។
៤) Massachusetts Institute of Technology (MIT)៖ MIT ល្បីបំផុតលើមុខជំនាញរូបវិទ្យា បច្ចេកវិទ្យាព័ត៌មានវិទ្យា ប៉ុន្តែថ្នាក់ធុរកិច្ច និងគ្រប់គ្រង់ក៏មិនអន់ដែរ។
៥) Pennsylvania៖ ជាសាកលវិទ្យាល័យលេចធ្លោបំផុតមួយនៅសហរដ្ឋអាមេរិក។ អតីតនិស្សិតល្បីៗនៅសកលវិទ្យាល័យនេះ មានដូចជាមហាសេដ្ឋី Warren Buffett និងប្រធានាធិបតីបច្ចុប្បន្នលោក Donald Trump ជាដើម។
៦) Standford៖ ជាសាកលវិទ្យាល័យលេចធ្លោមួយដែរនៅសហរដ្ឋអាមេរិក។ វាធ្លាក់ចុះចំណាត់ថ្នាក់ពីរលេខបើធៀបនឹងឆ្នាំ២០១៦។
៧) Oxford៖ ល្បីរាប់ឆ្នាំហើយ ខាងផ្នែកបុរាណវិទ្យា ប្រវត្តិសាស្ត្រ និងភាសា ប៉ុន្តែខាងផ្នែកធុរកិច្ច ក៏នៅតែមានចំណាត់ថ្នាក់ល្អដែរ។
៨) Cambridge៖ ឆ្នាំថ្មីនេះ បានធ្លាក់ចុះមួយលេខ។ ផ្នែកធុរកិច្ច និងគ្រប់គ្រងគឺបង្រៀននៅសាលាធុរកិច្ច Judge Business School។
៩) London School of Economics and Political Science៖ ជាសាកលវិទ្យាល័យល្បីមួយក្នុងលោកដែលផលិតធនធានមនុស្សខាងវិទ្យាសាស្ត្រនយោបាយ និងសេដ្ឋកិច្ច។
១០) University of California Berkeley៖ នៅតំបន់ឆ្នេរខាងលិចរបស់សហរដ្ឋអាមេរិក សាកលវិទ្យាល័យនេះនៅលេខរៀងទីពីរ ពោលគឺល្បីសុសសាយខ្លាំងដែរ៕
