ការទស្សន៍ទាយរបស់អ្នកវិភាគអំពីរបត់ធំៗចំនួន ៣បង្ហាញពីអនាគតមហាអំណាចចិន
ទឹកដីដ៏ធំមួយដែលធ្លាប់ត្រូវបានអតីតមេដឹកនាំកុម្មុយនីស្ដម៉ៅ កាច់ចង្កូតបត់បែនទៅតាមមនោគមវិជ្ជារបស់ខ្លួន ដែលតបស្នងជាលទ្ធផលមកវិញបានបន្សល់ទុកនូវរបត់ផ្លាស់ប្ដូរធំៗជាច្រើនទាំងវិជ្ជមាននិងអវិជ្ជមានសម្រាប់ប្រជាជនចិនជំនាន់ក្រោយផងដែរ។
ការផ្លាស់ប្ដូររបស់សាធារណរដ្ឋប្រជាមានិតចិន បានទាក់ទាញការចាប់អារម្មណ៍អ្នកវិភាគមួយចំនួនឲ្យសិក្សាស្រាវជ្រាវ និងបង្កើតជាការទស្សន៍ទាយឡើងពីភាពដែលអាចទៅរួចរបស់មហាអំណាចចិនសម្រាប់ពេលអនាគតដូចដែលបានបង្ហាញនៅខាងក្រោមនេះ។
១) ចំនួនប្រជាជន៖ ចំនួនប្រជាជនចិនមានច្រើនរហូតធ្វើឲ្យប្រទេសនេះ ស្ថិតក្នុងលំដាប់ទី១ជាប្រទេសដែលមានប្រជាជនច្រើនជាងគេនៅលើពិភពលោក។ ហេតុនេះ អ្នកវិភាគបានទស្សន៍ទាយឃើញនូវរបត់ធំៗចំនួន៣ទៅលើចំនួនប្រជាជនចិន។
ទី១ ក្នុងឆ្នាំ២០២០ ចំនួនប្រជាជនក្នុងវ័យធ្វើការ នៅចន្លោះអាយុ១៥ឆ្នាំដល់៦៤ឆ្នាំ នឹងកើនឡើងរហូតដល់១ពាន់លាននាក់ ដែលជាការឆ្លើយតបរបស់សង្គមចំពោះការផ្លាស់ប្ដូរនេះវិញនូវការបង្កើនឱកាសការងារផងដែរ។ ទី២ ត្រឹមឆ្នាំ២០៣០ កំណើនប្រជាជននឹងមានរហូតដល់១.៦ពាន់លាននាក់ ដែលជាសញ្ញានៃកំណើនតម្រូវការការផ្គត់ផ្គង់អាហារ។ ទី៣ ក្នុងឆ្នាំ២០៤០ ប្រជាជនចិនប្រមាណ៣២០លាននាក់ គឺជាមនុស្សមានវ័យលើសពី៦០ឆ្នាំឡើងទៅ។
ម្យ៉ាងទៀត នៅ៤០ឆ្នាំខាងមុខ ការផ្លាស់ប្ដូរដ៏សំខាន់មួយនៅក្នុងសង្គមចិន គឺជាការធ្វើនគរោបនីយកម្មរបស់អ្នករស់នៅតាមជនបទផ្លាស់ប្ដូរទៅរស់នៅទីក្រុងវិញ ប្រហែល៥០០លាននាក់។
២) អាហារនិងទឹក៖ ប្រជាជនចិនមានចំនួន១ភាគ៥នៃចំនួនប្រជាជនរបស់ពិភពលោកសរុប យ៉ាងណាមិញ ផ្ទៃដីសម្រាប់ដាំដុះធ្វើស្រែចម្ការមានត្រឹមតែ៧ភាគរយធៀបនឹងផ្ទៃដីសរុបរបស់ពិភពលោកប៉ុណ្ណោះ។ ម្យ៉ាងទៀត នៅក្នុង៧ភាគរយនោះ មានតែ៣៣ភាគរយដែលអំណោយផលសម្រាប់ការដាំដុះបាន ដែលជាលទ្ធផលនៃសំណឹកដី និងតម្រូវការនៃកំណើនប្រជាជន ស្របពេលជាមួយគ្នានោះក៏ទទួលការគំរាមកំហែងពីការបំពុលពីឧស្សាហកម្មនិងកសិកម្មទៀតផង ធ្វើឲ្យប្រទេសនេះស្ថិតក្នុងលំដាប់ទី២ជាប្រទេសដែលមានការបំពុលឧស្ម័នកាបូនឌីអុកស៊ីតពីឧស្សាហកម្មច្រើនជាងគេបំផុត។
ប្រការនេះធ្វើឲ្យអ្នកវិភាគមួយចំនួនសន្និដ្ឋានថា ចិនអាចនឹងត្រូវពឹងផ្អែកទៅលើការនាំចូលផលិតផលពីបរទេស។ យ៉ាងណាមិញ ការទស្សន៍ទាយនេះអាចនឹងផ្លាស់ប្ដូរដោយសារភាពជឿនលឿននៃបច្ចេកវិទ្យា រួមជាមួយគ្នានឹងគោលនយោបាយបរិស្ថានរបស់រដ្ឋាភិបាល ទៅលើអនាគតនៃកសិកម្ម ដែលនឹងផ្ដល់ផលវិជ្ជមានដល់ទិន្នផលកសិកម្ម និងកាត់បន្ថយភាពអត់ការងារធ្វើនៅពេលមានកំណើនតម្រូវការកម្លាំងពលកម្មផ្នែកកសិកម្មផងដែរ។
៣) នយោបាយ៖ ស្ថានភាពនយោបាយនៅក្រោមការដឹកនាំតាមបែបកុម្មុយនីស្ដមួយនេះ នឹងខិតទៅរកប្រទេសប្រជាធិបតេយ្យបន្តិចម្ដងៗដោយខ្លួនឯង ប្រសិនណាបើស្ថានភាពសេដ្ឋកិច្ចមានភាពវិជ្ជមានដែរនោះ។ ប៉ុន្តែសម្រាប់មហាអំណាចសេដ្ឋកិច្ចទី២របស់ពិភពលោកនេះ ដែលបើទោះជាពុំមានវិបត្តិទាក់ទិននឹងអ្នកបន្តវេន ឬវិបត្តិរដ្ឋាភិបាលក៏ដោយ ក៏បញ្ហាចម្បងៗមួយចំនួនដូចជាចំនួនប្រជាជនដ៏ច្រើនលើសលប់ កំណែទម្រង់សហគ្រាសរបស់រដ្ឋ បញ្ហាជាមួយសហរដ្ឋអាមេរិក និងកម្សោយក្នុងការទប់ស្កាត់អំពើពុករលួយ និងបទឧក្រិដ្ឋនានា ជាពិសេសគឺជាសេដ្ឋកិច្ចនោះឯងជាបញ្ហាធ្វើឱ្យឈឺក្បាលដល់បក្សកុម្មុយនីស្ដ៕
ប្រែសម្រួល៖ ស្រីពៅ
ប្រភព៖ edition.cnn.com
