តើអ្នកដឹងអ្វីខ្លះពីកោះតៃវ៉ាន់ ជាទីដែលមហាយក្សចិនព្យាយាមគ្រប់គ្រងឲ្យបាន?
ស្មារតីជាតិនិយមនិងការរួបរួមសាមគ្គីគ្នាជាធ្លុងមួយ បានក្លាយជាស្នូលដ៏សំខាន់មួយនៃបេះដូងរបស់ជនជាតិតៃវ៉ាន់ប្រមាណ២៣.៣លាននាក់ ដែលជាម្ចាស់លើទឹកដីចំនួន៣៦.១៨៨គីឡូម៉ែត្រការ៉េនេះ។ ម្យ៉ាងទៀត ការពិតអំពីចំណងការទូតដែលមានសភាពឯកោរបស់កោះតៃវ៉ាន់ ក៏មិនបានរារាំងមហិច្ឆតារបស់ទឹកដីមួយនេះ ឲ្យសម្រេចបាននូវតំណែងមួយក្នុងចំណោមពាណិជ្ជករដ៏ធំជាងគេក្នុងតំបន់អាសីុនោះឡើយ ជាពិសេសក្នុងនាមជាអ្នកផលិតដ៏កំពូលមួយនៃបច្ចេកវិទ្យាកុំព្យូទ័រនៅលើពិភពលោក។
បើនិយាយពីប្រព័ន្ធនយោបាយរបស់កោះតៃវ៉ាន់វិញ អត្តចរិតដែលជារបៀបរបបដឹកនាំ បានធ្វើឲ្យទឹកដីនេះក្លាយជាទឹកដីមួយដែលមានប្រជាធិបតេយ្យកម្រិតខ្ពស់មួយ ដែលជាលទ្ធផលទទួលបានពីការផ្ដល់សិទ្ធិសេរីភាពដល់ប្រជាជនក្នុងការបញ្ចេញមតិ លក្ខណៈបើកចំហនៃប្រព័ន្ធផ្សព្វផ្សាយ និងស្ថិតនៅក្រោមភាពជាម្ចាស់របស់ឯកជន មិនមែនរបស់រដ្ឋ ជាពិសេសចំនួននៃការប្រើប្រាស់អ៊ីនធឺណិតមានខ្ពស់រហូតដល់ទៅ៨០ភាគរយឯណោះ។
យ៉ាងណាមិញ អ្វីដែលជាកង្វល់ធ្វើទុក្ខបុកម្នេញចំពោះអ្នកគ្រប់គ្រងរួមទាំងប្រជាជនរបស់តៃវ៉ាន់រហូតមក គឺជាភាពមិនប្រាកដប្រជានៃឯករាជ្យភាពរបស់ពួកគេពីកុំមុយនិសចិនដែលមានរាជធានីនៅប៉េកាំងនេះឯង ដែលនៅតែបន្តរហូតមកទល់សព្វថ្ងៃនេះនៅឡើយ។ បើទោះជាកោះតៃវ៉ាន់មានលក្ខណៈជាច្រើនដែលគ្រប់គ្រាន់នឹងអាចឲ្យសកលលោកទទួលស្គាល់ពួកគេថាជាទឹកដីអធិបតេយ្យភាពមួយ តួយ៉ាងមានដូចជា រដ្ឋធម្មនុញ្ញរបស់ខ្លួន ការបោះឆ្នោតជ្រើសតាំងអ្នកដឹកនាំជាប្រធានាធិបតីប្រកបដោយប្រជាធិបតេយ្យនិងតម្លាភាព ព្រមទាំងមានកងទាហានសកម្មរបស់ខ្លួនចំនួន៣០០.០០០នាក់ក៏ដោយ ក៏ការទទួលស្គាល់ពីភាពឯករាជ្យរបស់តៃវ៉ាន់ហាក់នៅមានកម្រិតតិចតួចខ្លាំងនៅឡើយ។
ក្នុងកាលដ៏យូរលង់មកហើយ ទឹកដីនៃកោះតៃវ៉ាន់នេះមានមនុស្សដែលមកតាំងទីលំនៅដំបូងបង្អស់គឺជាក្រុមកុលសម្ព័ន្ធរបស់Austronesianប្រហែលជាតាំងពីឆ្នាំ២៣៩នៃគ.ស តាមកំណត់ត្រារបស់ចិន។ ដល់ឆ្នាំ១៦៨៣ ទឹកដីនេះត្រូវធ្លាក់ទៅក្រោមការគ្រប់គ្រងរបស់រាជវង្សឈីង តែក៏ត្រូវបង្ខំប្រគល់ឲ្យទៅជប៉ុនក្នុងឆ្នាំ១៨៩៥នៅក្នុងជ័យជម្នះលើសង្គ្រាមសីុណូជប៉ុនដំបូង។ យ៉ាងណាមិញ បរាជ័យនៅក្នុងសង្គ្រាមលោកលើកទី២របស់ជប៉ុន ធ្វើឲ្យកោះតៃវ៉ាន់ត្រូវធ្លាក់មកក្រោមការគ្រប់គ្រងរបស់ម្ចាស់ទឹកដីដែលជាចិននេះវិញ។
ព្រឹត្តិការណ៍សំខាន់ៗនិងគួរឲ្យចាប់អារម្មណ៍ចេះតែបន្តឡើង គឺក្រោយពីទទួលបានទឹកដីនៃកោះនេះមកកាន់កាប់វិញហើយ ការចាញ់សង្គ្រាមរបស់ពួកសង្គមនិយមចិនរបស់ចៀង កាយជៀកនៅក្នុងសង្គ្រាមសីុវិលជាមួយពួកកុំមុយនិសចិនរបស់ម៉ៅ សេទុង បណ្ដាលឲ្យក្រុមរបស់ចៀង កាយជៀកភៀសខ្លួនទៅកាន់ទឹកដីតៃវ៉ាន់នៅឆ្នាំ១៩៤៩ និងក្ដោបក្ដាប់អំណាចបែបឃោរឃៅនិងផ្ដាច់ការនៅក្នុងដែនដីនៃកោះដែលមានឈ្មោះថាសាធារណរដ្ឋចិននេះ រហូតដល់ដង្ហើមចុងក្រោយរបស់បុរសកណ្ដាប់ដៃដែករូបនេះក្នុងឆ្នាំ១៩៧៥។
ទោះជាយ៉ាងណា សម្ពន្ធភាពរវាងតៃវ៉ាន់ដែលមានរាជធានីស្ថិតនៅតៃប៉ិមួយនេះនិងចិនមានភាពល្អប្រសើរបន្តិចម្ដងៗចាប់ពីអំឡុងទសវត្សឆ្នាំ១៩៨០ ហើយចិនថែមទាំងបានដាក់នូវគោលនយោបាយមួយឈ្មោះថា "ប្រទេសមួយ ជាមួយប្រព័ន្ធគ្រប់គ្រងពីរ" និងធានាផ្ដល់នូវអំណាចនិងសិទ្ធិស្វយ័តឲ្យតៃវ៉ាន់ ប្រសិនបើយល់ព្រមនឹងពួកគេរួបរួមជាប្រទេសតែមួយវិញ។ បើទោះជាសំណើនេះទទួលរងការបដិសេធពីតៃវ៉ាន់ក្ដី ក៏គេឃើញមានចំណងសម្ពន្ធភាពវិជ្ជមានរវាងទឹកដីទាំងពីរនេះ តាមរយៈការធ្វើទស្សនកិច្ចរបស់អ្នកដឹកនាំទាំងពីរ និងការធ្វើវិនិយោគទុនទៅលើផ្នែកសេដ្ឋកិច្ចផងដែរ។
ម្យ៉ាងទៀត មកទល់ពេលនេះ កោះតៃវ៉ាន់បានធ្វើការបោះឆ្នោតជ្រើសរើសប្រធានាធិបតីរបស់ខ្លួនប្រកបដោយប្រជាធិបតេយ្យចំនួន៣ដងតាំងពីឆ្នាំ២០០០ រួមទាំងការជាប់ឆ្នោតអ្នកដឹកនាំស្ត្រីថ្មី អ្នកស្រី Tsai Ing-wenនេះកាលពីខែមករាឆ្នាំ២០១៦នេះផងដែរ ដែលជាការបង្ហាញពីឯករាជ្យរបស់ខ្លួនយ៉ាងពិតប្រាកដ ទោះជាមិនទាន់មានការទទួលស្គាល់ជាផ្លូវការដោយច្?%9
