គុណសម្បត្តិ និង គុណវិបត្តិក្នុងការយកភាសាអង់គ្លេសជាភាសាផ្លូវការសម្រាប់ទំនាក់ទំនងអន្តរជាតិ
ភាពខុសគ្នានៃភាសាចម្រុះជាច្រើននៅទូទាំងសកលលោក បន្ថែមទាំងភាសាតាមតំបន់របស់ជនជាតិភាគតិចក្នុងប្រទេសនីមួយៗទៀត បានបង្កើតជារនាំងឧបសគ្គដល់មនុស្សក្នុងការប្រាស្រ័យទាក់ទងគ្នា ក្នុងគោលដៅដោះដូរប្រយោជន៍គ្នាតាមរយៈជំនួញ ចំណងការទូតរវាងប្រទេសមួយនឹងប្រទេសមួយទៀត ព្រមទាំងការទទួលយកចំណេះដឹងពីគ្នាទៅវិញទៅមក។យ៉ាងណាមិញ អស់រយៈកាលជាយូរណាស់មកហើយដែលភាសាអង់គ្លេសបានក្លាយជាភាសាដ៏ពេញនិយមនិងដើរតួយ៉ាងសំខាន់ដើម្បីកាត់បន្ថយនូវរនាំងឧបសគ្គនៃទំនាក់ទំនងរបស់មនុស្សនេះ។ ចាប់តាំងពីភាសាអង់គ្លេសត្រូវបានចាត់ទុកជាភាសាផ្លូវការសម្រាប់ទំនាក់ទំនងជាអន្តរជាតិមក ឧបសគ្គក្នុងការប្រាស្រ័យទាក់ទងរបស់មនុស្សត្រូវបានកាត់បន្ថយ ផ្ដល់ជាប្រយោជន៍យ៉ាងល្អប្រសើរក្រៃលែងសម្រាប់មនុស្ស ប៉ុន្តែគុណវិបត្តិតែងមកជាគូជាមួយនឹងគុណសម្បត្តិជានិច្ច។ តើអ្វីខ្លះជាគុណសម្បត្តិនៃការយកភាសាអង់គ្លេសជាភាសាផ្លូវការសម្រាប់ទំនាក់ទំនងអន្តរជាតិ ?
១) ការរួបរួមតែមួយដែលនាំមកនូវផលប្រយោជន៍សម្រាប់គ្នាទៅវិញទៅមក៖ នៅពេលមានការព្រមព្រៀងគ្នាជ្រើសរើសភាសាណាមួយប្រើប្រាស់ដូចគ្នាហើយ អ្នកដែលទទួលបានប្រយោជន៍ច្រើនបំផុតពីការព្រមព្រៀងនេះ គឺជាការដោះដូរជំនួញនេះឯង។ ចំណងដែលបង្កជាការដោះដូរប្រយោជន៍ឲ្យគ្នាបាន លុះត្រាណាតែភាគីទាំងសងខាងមានការទុកចិត្តចំពោះគ្នាទៅវិញទៅមក ហើយវាពិតជាមិនអាចទៅរួចឡើយ បើរនាំងនៃភាសាខុសគ្នាធ្វើឲ្យពួកគេមិនទាំងយល់ពីគ្នាផងនោះ។ បើអវត្តមាននូវទំនុកចិត្តហើយ ការចរចាព្រមព្រៀងគ្នាដែលផ្ដល់ប្រយោជន៍ទៅវិញទៅមក ក៏ស្ថិតនៅក្នុងភាពមិនអាចទៅរួចដែរ ហើយពិភពលោកក៏មិនអាចអភិវឌ្ឍមកដល់កម្រិតដូចបច្ចុប្បន្ននេះបានដែរ។
២) ការស្រាវជ្រាវពង្រីកចំណេះដឹង៖ មនុស្សយើងម្នាក់ៗត្រូវតែទទួលស្គាល់ថា គ្មាននរណាម្នាក់ចេះដឹងសព្វគ្រប់នោះទេ សូម្បីតែអ្នកប្រាជ្ញបណ្ឌិតក៏ដោយ។ ពិភពលោកនេះធំធេងទូលំទូលាយឥតមានដែនកំណត់នោះទេ ដូច្នេះចំណេះដឹងទទួលបានថ្មីៗពីការស្រាវជ្រាវលើអ្វីៗដែលជាធម្មជាតិនៅជុំវិញខ្លួនយើង តែងកើតមានឡើងជានិរន្ត។ ការស្រាវជ្រាវមិនថាផ្នែកវិទ្យាសាស្ត្រ ឱសថសាស្ត្រ ឬគណិតសាស្ត្រអ្វីនោះទេ បើពុំមានភាសារួមណាមួយជាយានចម្លងសម្រាប់ផ្ទេរចំណេះដឹង ទម្លុះនូវឧបសគ្គភាសាខុសគ្នាទេនោះ យើងម្នាក់ៗពិតជាមិនអាចពង្រីកការយល់ដឹងរបស់ខ្លួនឲ្យទូលំទូលាយបានឡើយ។
ចុះការយកភាសាអង់គ្លេសជាភាសាផ្លូវការសម្រាប់ទំនាក់ទំនងអន្តរជាតិមានគុណវិបត្តិរបស់វាដូចម្ដេចខ្លះវិញ ?
ការសាបរលាបនូវភាសាជាតិកំណើត៖ វាជារឿងមិនអាចប្រកែកបានឡើយ ហើយក៏ជាបញ្ហាមួយដែលអ្នកឲ្យតម្លៃលើភាសាអង់គ្លេសភាគច្រើនមិនសូវជាបានគិតគូរចាប់អារម្មណ៍ ដែលនៅពេលភាសាអង់គ្លេសមានឥទ្ធិពលកាន់តែខ្លាំងទៅ ភាសាផ្សេងៗដែលជាភាសាកំណើតសម្គាល់អត្តសញ្ញាណជាតិសាសន៍នីមួយៗនឹងសាបរលាប អស់ឥទ្ធិពលបន្តិចម្ដងៗក្នុងប្រវត្តិសាស្ត្រមនុស្សលោក។
វាក៏មិនមែនជារឿងនឹងកើតឡើងក្នុងពេលអនាគតដែរ ព្រោះវាកំពុងតែមានវត្តមានក្នុងពេលបច្ចុប្បន្ននេះឯង។ វាបង្ហាញនៅត្រង់ក្មេងជំនាន់ក្រោយមួយចំនួន កើតនៅលើទឹកដីខ្លួនឯង ប៉ុន្តែមិនចេះនិយាយនិងសរសេរអក្សររបស់ជាតិកំណើតខ្លួនឯង ក៏ព្រោះតែការឲ្យតម្លៃលើសលប់លើប្រយោជន៍ដែលភាសាអង់គ្លេសផ្ដល់ឲ្យពួកគេ។
គុណវិបត្តិមិនមែនមានត្រឹមតែប៉ុននេះនោះទេ ព្រោះថាកាលណាភាសាអង់គ្លេសពង្រីកឥទ្ធិពលកាន់តែខ្លាំង នោះការរើសអើងអ្នកប្រើប្រាស់ភាសាដទៃនឹងកើតមានឡើងយ៉ាងប្រាកដ និងនាំមកនូវការបែងចែកឋានៈនៃអ្នកប្រើប្រាស់ភាសាក្នុងសង្គម។ អ្នកប្រើប្រាស់ភាសាអង់គ្លេសនឹងទទួលបានការលើកតម្កើងខ្ពស់ជាងអ្នកប្រើប្រាស់ភាសាដទៃ ហើយវានឹងបង្កើតនូវភាពមិនស្មើគ្នាចេញពីការរើសអើងភាសាមិនខាន៕
ប្រែសម្រួល៖ ស្រីពៅ
ប្រភព៖ hubpages
