ខ្លីៗ គន្លឹះ៣យ៉ាង ដើម្បីស្វែងរកឲ្យឃើញថា «អ្នកជានរណា?»
ហេតុអ្វីអ្នកចាំបាច់ត្រូវស្គាល់ខ្លួនឯង ? ដូចព្រះពុទ្ធទ្រង់មានពុទ្ធដីកាថា៖ «គោលបំណងរបស់អ្នកនៅក្នុងជីវិត គឺស្វែងរកឲ្យឃើញនូវគោលដៅមួយ ហើយបូជាបេះដូងនិងវិញ្ញាណរបស់អ្នកដើម្បីវា»។ ការស្គាល់ខ្លួនឯង គឺមិនខុសពីការស្គាល់នូវអ្វីជាចំណុចខ្លាំងនិងអ្វីជាចំណុចខ្សោយរបស់ខ្លួននោះទេ នោះអ្នកនឹងស្គាល់នូវភាពល្ងង់ខ្លៅរបស់ខ្លួន ដឹងថាអ្វីគួរកែលម្អ អ្វីគួរដុសខាត់សំលៀងឲ្យមុតបន្ថែម ដើម្បីអភិវឌ្ឍខ្លួនឲ្យមានសតិសម្បជញ្ញៈបែងចែកដឹងអ្វីល្អអ្វីអាក្រក់ដោយឥតលម្អៀង។
នៅពេលអ្នកដឹងពីចំណុចទាំងនេះនៅក្នុងខ្លួនអ្នកហើយ អ្នកសួរខ្លួនឯងទៅមើល តើអ្នកមកទីនេះមានគោលដៅអ្វី ? បើអ្នកមិនមានគោលដៅក្នុងជីវិតនោះទេ អ្នកក៏មិនខុសអ្វីដែរពីខ្លែងដែលដាច់ខ្សែ រេរាំបក់ទៅបក់មកតាមតែទំនោរនៃខ្យល់ ដល់ពេលអស់ដង្ហើមទៅក៏មិនបានបន្សល់អ្វីជារបស់មានតម្លៃសម្រាប់ខ្លួនឯង និងមនុស្សក្នុងសង្គមគេបានទទួលប្រយោជន៍ពីអ្នក។ ដូច្នេះ តើអ្វីខ្លះអាចជួយអ្នកឲ្យស្វែងរកថាខ្លួនឯងជានរណាឲ្យពិតប្រាកដបាន ?
១) តើអ្វីទៅដែលធ្វើឲ្យអ្នកមានអារម្មណ៍ដូចជាមានជីវិតស្រស់បំព្រង? ៖ វាជាការរុករកចូលទៅដល់ជម្រៅខាងក្នុងនៃចិត្តរបស់អ្នក ស្វែងរកថាតើអ្វីទៅដែលអ្នកធ្វើហើយ តែងផ្ដល់ភាពសប្បាយរីករាយនិងសេចក្ដីសុខដល់អ្នកជានិច្ច។ យ៉ាងណាមិញវាមិនមែនជាសកម្មភាពណាដែលពិតថាផ្ដល់ក្ដីសុខដល់អ្នក តែបែរជាបំផ្លាញដល់ក្ដីសុខអ្នកដទៃដែលខុសពីគុណធម៌ជាមនុស្ស នោះអ្នកមិនគួរចាត់ទុកវាជាអ្វីដែលផ្ដល់ជីវិតស្រស់បំព្រងដល់អ្នក និងបន្តធ្វើវាទៀតនោះទេ។
២) តើអ្វីជាទេពកោសល្យរបស់អ្នក? ៖ ការទទួលខុសត្រូវរបស់អ្នកសម្រាប់ជីវិតរបស់ខ្លួន គឺជាការស្វែងរកឲ្យឃើញនូវអ្វីដែលខ្លួនឯងធ្វើបានល្អបំផុត នោះហើយជាទេពកោសល្យនិងសក្ដានុពលរបស់អ្នក ព្រោះថានរណាម្នាក់ក៏មានវាដែរ។ ទេពកោសល្យរបស់អ្នក អាចជាគ្រឿងសព្វាវុធដ៏អស្ចារ្យរបស់អ្នកដែលអ្នកត្រូវប្រើប្រាស់វាដើម្បីប្រយុទ្ធក្នុងសង្គ្រាមនៃជីវិតសម្រេចនូវគោលដៅដ៏ជាក់លាក់មួយ សម្រាប់បំពេញប្រយោជន៍ដល់មនុស្សជាតិ។
៣) តើអ្វីជាគោលបំណងរបស់អ្នកក្នុងជីវិតនេះ? ៖ ដូចដែលបានរៀបរាប់ពីខាងលើដូច្នោះ អ្នកត្រូវស្គាល់នូវគោលបំណងនៃការរស់រានមានជីវិតរបស់អ្នកក្នុងពិភពលោកដ៏ធំធេងនេះ ពុំនោះទេអ្នកនឹងមិនអាចស្គាល់ថាខ្លួនឯងជានរណា អាចធ្វើអ្វីបានខ្លះ រស់នៅជីវិតដែលឥតន័យ ឥតខ្លឹមសារសោះឡើយ៕
ប្រែសម្រួល៖ ស្រីពៅ ប្រភព៖ foreverconscious
