តើជោគជ័យរបស់អ្នកនៅក្នុងសាលាអាចធានាពីជោគជ័យរបស់អ្នកនៅក្នុងសង្គមបានទេ ?
ហេតុអ្វីបានជាមនុស្សមួយចំនួនដែលជោគជ័យនៅក្នុងសាលា តែបែរជាទទួលបរាជ័យនៅក្នុងសង្គមទៅវិញ ? ក្រែងប្រព័ន្ធអប់រំរបស់សាលាសន្យាថានឹងផ្ដល់ឲ្យអ្នកនូវការងារល្អ និងទទួលបានការគោរពកោតសរសើរពីមនុស្សជុំវិញខ្លួន ឲ្យតែអ្នកខិតខំរៀនសូត្រ មិនថាអ៊ីចឹងឬ ? លើសពីនេះទៅទៀត ចុះហេតុអ្វីមនុស្សដែលរៀនមិនសូវពូកែក្នុងសាលាបែរជាទទួលបានភាពជោគជ័យក្នុងសង្គមទៅវិញ ? នេះបញ្ជាក់ថា ប្រព័ន្ធអប់រំក្នុងសាលាតែម្យ៉ាងមិនអាចកំណត់បានពីសក្ដានុពលនិងសមត្ថភាពពិតប្រាកដរបស់មនុស្សម្នាក់បានទេ។
នៅទីនេះមិនមែនចង់លើកទឹកចិត្តឲ្យអ្នកបោះបង់ការសិក្សាចោលនោះឡើយ តែអ្វីក៏ដោយតែងមានចំណុចវិជ្ជមាននិងចំណុចអវិជ្ជមានរបស់វា។ ការខិតខំប្រឹងប្រែងរៀនសូត្រក្រេបយកចំណេះដឹងពីសាលាគឺជាអ្វីដែលគ្រប់គ្នាត្រូវធ្វើនិងឲ្យតម្លៃនៅក្នុងជីវិត។ យ៉ាងណាមិញ បើអ្នកបរាជ័យក្នុងសាលា វាមិនមែនជាទីបញ្ចប់នៃជីវិតរបស់អ្នកឡើយ។ បរាជ័យនៅក្នុងសាលាមិនមែនមានន័យថាអ្នកនឹងបរាជ័យនៅក្នុងសង្គមដែរនោះទេ។ អ្នកត្រូវប្រឹងប្រែងរៀនសូត្រ តែជាមួយគ្នានេះដែរ អ្នកមិនគួរយកលទ្ធផលនៅក្នុងសាលាមកធ្វើជារង្វាស់សម្រាប់វាយតម្លៃពីជោគវាសនានាថ្ងៃអនាគតរបស់អ្នកទាំងស្រុងនោះទេ។
ការប្រឹងប្រែងរៀនសូត្រក្នុងសាលាតែម្យ៉ាងពិតមិនអាចនាំអ្នកទៅកាន់ជោគជ័យបាននោះឡើយ ព្រោះនៅពេលអ្នកមានកាតព្វកិច្ចក្នុងកិច្ចការសង្គមច្រើន អ្នកនឹងចាប់ផ្ដើមស្វែងយល់ថាសមត្ថភាពក្នុងការដោះស្រាយបញ្ហាទៅវិញទេទើបជារឿងសំខាន់បំផុតដែលអ្នកត្រូវមាន ដើម្បីទប់ទល់នឹងការប្រកួតប្រជែងដ៏ខ្លាំងក្លារបស់ពិភពលោកនេះបាន។ យ៉ាងណាមិញ នៅក្នុងសាលាមិនបានបង្រៀនអ្នកឲ្យអ្នកចេះបត់បែន មានភាពច្នៃប្រឌិតចេះដោះស្រាយបញ្ហានោះឡើយ ក៏ព្រោះតែពួកគេតម្រូវឲ្យអ្នករៀនសូត្រតាម ថាតាមនិងអនុវត្តតាមអ្វីដែលបានកំណត់រួចមកហើយ ហើយអ្នកគ្រាន់តែដើរទៅតាមផ្លូវដែលត្រួសត្រាយហើយប៉ុណ្ណោះ។ អ្នកចាំដើរតាមតែគេ អ្នកនឹងមិនអាចជោគជ័យបាននៅក្នុងជីវិតនោះទេ ព្រោះអ្នកគ្មានភាពម្ចាស់ការលើខ្លួនឯង ចាំតែគេបង្គាប់ រស់នៅក្រោមសភាពជាគំនិតរបស់អ្នកដទៃ។ បើដំណោះស្រាយមួយមិនដំណើរការណ៍ហើយ អ្នកនឹងជាប់ផុងមួយកន្លែង មិនបែកគំនិតរកឃើញដំណោះស្រាយមួយទៀតឡើយ។ នេះគឺជាចំណុចខ្វះខាតរបស់ការអប់រំក្នុងសាលា។
ដើម្បីឲ្យការខិតខំរៀនសូត្រក្នុងសាលាផ្ដល់ផ្លែផ្កាដល់អ្នក ទាល់តែអ្នកចេះបើកចិត្តទូលាយរៀនសូត្របន្ថែមពីអ្វីដែលនៅជុំវិញខ្លួនអ្នក ហើយបទពិសោធន៍ជីវិតគឺជារឿងសំខាន់ណាស់។ នៅពេលអ្នកទទួលយកចំណេះដឹងថ្មីៗកាន់តែច្រើនប៉ុណ្ណា អ្នកនឹងកាន់តែមានបទពិសោធន៍យល់ដឹងរាក់ជ្រៅបានច្រើនប៉ុននោះ បន្ទាប់មកផ្គួបផ្សំគ្នាជាមួយចំណេះដឹងពីសាលាមក វានឹងផ្ដុំគ្នាបង្កើតជាពន្លឺបញ្ចេញរស្មីដ៏ភ្លឺចិញ្ចាចបំភ្លឺជីវិតអ្នកឲ្យមានតម្លៃមិនខាន៕
ប្រែសម្រួល៖ ស្រីពៅ ប្រភព៖ thebookoflife
