ព័ត៌មានទាន់ហេតុការណ៍៖ កូរ៉េខាងជើងគំរាមបាញ់នុយក្លេអ៊ែរ ប្រសិនបើអាមេរិកបង្កហេតុ
សារព័ត៌មានរដ្ឋរបស់កូរ៉េខាងជើងបានព្រមានកាលពីថ្ងៃអង្គារ ម្សិលមិញថា កូរ៉េខាងជើងនឹងវាយប្រហារដោយនុយក្លេអ៊ែរលើសហរដ្ឋអាមេរិក បើសិនជាមានរូបភាពនៃការឈ្លានពានណាមួយពីសហរដ្ឋអាមេរិក។
ការប្រកាសនេះ គឺធ្វើឡើងបន្ទាប់ពីសហរដ្ឋអាមេរិកបានបញ្ជូនក្រុមនាវាពិឃាដទៅកាន់តំបន់ជាប់នឹងឧបទ្វីបកូរ៉េ។ កាលពីពេលកន្លងទៅ លោក ត្រាំ ដែលបានជំរុញឱ្យចិនដោះស្រាយជាមួយប្រទេសជិតខាងដែលជាមិត្តខ្លួននោះ បានសរសេរនៅលើ Twitter របស់លោកថា កូរ៉េខាងជើងកំពុងរករឿងដាក់ខ្លួន ហើយសហរដ្ឋអាមេរិកនឹងដោះស្រាយបញ្ហាដោយខ្លួនឯងទោះបីចិនជួយឬមិនជួយក៏ដោយ។
ស្ថានការណ៍កាន់តែតានតឹងឡើងដូច្នេះ ដោយសារតែមានការបារម្ភថា កូរ៉េខាងជើងនឹងធ្វើការសាកល្បងគ្រាប់នុយក្លេអ៊ែរទី ៦ នាពេលឆាប់ៗខាងមុខៗនេះ។
សូមបញ្ជាក់ថា កូរ៉េខាងជើង ប្រកាសកាលពីថ្មីៗនេះថា ខ្លួនបានត្រៀមខ្លួនជាស្រេចដើម្បីធ្វើសង្គ្រាមជាមួយសហរដ្ឋអាមេរិក៕
ដោយ៖ យោធិន
