ទោះមានការគម្រាមពីអាមេរិក តែថ្ងៃនេះកូរ៉េខាងជើងធ្វើព្យុះយាត្រាបង្ហាញមីស៊ីលចម្ងាយឆ្ងាយ!
សព្វាវុធទំនើបចុងក្រោយរបស់កូរ៉េខាងជើង ដែលតាមអ្នកវិភាគគេជឿថា ជាមីស៊ីលអន្តរទ្វីបចំនួនបីប្រភេទត្រូវបានដាក់បង្ហាញនៅក្នុងព្យុះហយាត្រាកណ្ដាលទីក្រុងព្យុងយ៉ាងនៅថ្ងៃសៅរ៍នេះ ខណៈភាពតានតឹងជាមួយសហរដ្ឋអាមេរិកនៅមិនទាន់ធូរស្រាលនៅឡើយ។
នៅក្នុងព្យុះហយាត្រានោះ មេដឹកនាំកូរ៉េខាងជើងលោក Kim Jong-un បានឈរមើលការសម្ដែង ក៏ដូចជាការបង្ហាញកម្លាំងយោធារបស់ខ្លួន ក្នុងនោះមានកងរថក្រោះ មីស៊ីល និងរ៉ុកកែតជាច្រើនគ្រាប់ដាក់បង្ហាញបង្អួតប្រជាជនរបស់ខ្លួនទៀតផង។
សូមបញ្ជាក់ថា កម្មវិធីព្យុហយាត្រានេះ គឺជាខួបលើកទី ១០៥នៃខួបកំណើតបិតាស្ថាបនិកកូរ៉េខាងជើង ហើយជាថ្ងៃឈប់សម្រាកដ៏ធំបំផុតរបស់កូរ៉េខាងជើង ដែលគេហៅថា ជាថ្ងៃនៃព្រះអាទិត្យ (The Day of the Sun)។
ទោះជាយ៉ាងណារហូតមកដល់ពេលនេះ ការធ្វើតេស្ដនុយក្លេអ៊ែរទី៦ មិនទាន់ត្រូវបានសាកល្បងនៅឡើយ ខណៈអាមេរិក និងបណ្ដាប្រទេសសម្ព័ន្ធមិត្តកំពុងតាមដានយ៉ាងយកចិត្តទុកដាក់។ គេសង្ស័យថា កូរ៉េខាងជើងអាចបាញ់សាកល្បងនុយក្លេអ៊ែរទី ៦នេះចេញពីនាវាក្នុងទឹក៕
ដោយ៖ យោធិន
