​​​ក្នុង​អំឡុង​ទស្សនកិច្ច​​របស់​អនុ​ប្រធានាធិបតី​អាមេរិក លោក​ Mike Pence ​ទៅ​កាន់​កូរ៉េខាងត្បូង​កាល​ពី​ថ្ងៃ​ចន្ទ​ លោក​បាន​បញ្ជាក់​​យ៉ាង​ច្បាស់​ថា​ ​សហរដ្ឋ​អាមេរិក​នឹង​បន្ត​ដាក់​ពង្រាយ​ប្រព័ន្ធ​ការ​ពារ​មីស៊ីល​ Terminal High Altitude Area Defense (THAAD) នៅ​កូរ៉េខាងត្បូង​ឆាប់​ៗ​នេះ​ ​ទោះ​បី​មាន​ការ​ជំទាស់​ពី​ចិន​ក៏​ដោយ។ បើ​យោង​តាម​ MSN ​ចុះ​ផ្សាយ​ថ្ងៃ​នេះ​បាន​ឱ្យ​ដឹង​ថា​ ​សហរដ្ឋ​អាមេរិក​បាន​ប្រកាស​​ពី​ដំណាក់​កាល​ដំបូង​នៃ​ការ​ដាក់​ពង្រាយ​ប្រព័ន្ធ​នេះ​កាល​ពី​ដើម​ខែ​មីនា​ កន្លង​ទៅ​ ​ហើយ​មន្ត្រី​អាមេរិក​អះអាង​ថា​ ​វា​អាច​ចំណាយ​​ពេល​ច្រើន​​ខែ​ដើម្បី​ដំឡើង​ប្រព័ន្ធ​ទាំង​មូល​​​ ​និង​ឱ្យ​វា​បំពេញ​មុខងារ​បាន​ពេញ​លេញ​។ តាម​ពិត​ទៅ​ សហរដ្ឋ​អាមេរិក​ និង​កូរ៉េខាងត្បូង​ បាន​ប្រកាស​ផែនការ​នៃ​ការ​​​ដំឡើង​ប្រព័ន្ធ​រួម​គ្នា​តាំង​ពី​ឆ្នាំ​២០១៦​មក​ម្ល៉េះ​ ប៉ុន្តែ​ក្រុង​សេអ៊ូល​​មិន​ទទួល​យក​គម្រោង​នេះ​ដោយ​សារ​បញ្ហា​មួយ​ចំនួន។ នៅ​ឆ្នាំ​២០១៣ ​ក្រុង​សេអ៊ូល​ធ្លាប់​បដិសេធ​​មិន​ធ្វើ​គម្រោង​ដោយ​សារ​តែ​តម្លៃ​ និង​​​សម្ភារៈ។ បើ​តាម​ប្រភព​ព័ត៌មាន​ MSN ​​ការ​ដាក់​ពង្រាយ​ និង​ឱ្យ​ដំណើរការ​ប្រព័ន្ធ​ THAAD តែ​មួយ​ គឺ​តម្លៃ​ប្រហែល​ជាង​ ១​ពាន់​លាន​ដុល្លារ​ទៅ​ហើយ។ ទោះ​ជា​យ៉ាង​ណា​ក្រុង​វ៉ាស៊ីនតោន​ មាន​គម្រោង​ជួយ​ចែក​រំលែក​ថ្លៃ​ដាក់​ពង្រាយ​ប្រព័ន្ធ​នេះ។ អត្ថបទ​ទាក់ទង៖ តើ​កូរ៉េខាងជើង​មាន​​កម្មវិធី​នុយក្លេអ៊ែរ​ទំនើប​​កម្រិត​ណា?​​​ នេះ​ជា​ហេតុផល​ដែល​អាមេរិក​ព្រួយ​បារម្ភ! សូម​បញ្ជាក់​ថា​ ប្រព័ន្ធ​ការពារ​មីស៊ីល​ THAAD ​គឺ​ជា​ប្រព័ន្ធ​ការពារ​មីស៊ីល​ដែល​ទំនើប​បំផុត​នៅ​ក្នុង​ពិភពលោក។ វា​អាច​​ចាប់​ និង​កម្ទេច​មីស៊ីល​ទាំង​ចម្ងាយ​ខ្លី​ និង​ចម្ងាយ​វែង។ ​វា​អាច​បាញ់​កម្ទេច​មីស៊ីល​ក្នុង​រយៈ​ចម្ងាយ​ជិត​ ២០០​គីឡូម៉ែត្រ​ និង​រយៈ​កម្ពស់​ជិត​ ១៥០​គីឡូម៉ែត្រ៕​ ដោយ ៖ យោធិន​​​​​