ធ្លាប់តែដឹង «ម៉ែគ្រាប់បែករបស់អាមេរិក» ឥឡូវទើបដឹង «ឪគ្រាប់បែករបស់រុស្ស៊ី» ខ្លាំងជាងអាមេរិក៤ដង!
មិត្តអ្នកអានមួយចំនួនធំនៅកម្ពុជាប្រហែលទើបតែបានស្គាល់ និងដឹងពី «ម៉ែគ្រាប់បែក» របស់សហរដ្ឋអាមេរិកដែលទើបនឹងទម្លាក់កម្ទេចជំរំរបស់ក្រុមភេរវកម្ម ISIS នៅប្រទេសអាហ្វហ្គានីស្ថានកាលពីសប្ដាហ៍កន្លងទៅ ប៉ុន្តែពេលនេះសារព័ត៌មាន CNN បានបង្ហាញពី «ឪគ្រាប់បែក» របស់រុស្ស៊ីវិញម្ដង។
វាត្រូវបានផលិតដោយរុស្ស៊ីនៅឆ្នាំ២០០៧ ហើយប្រហែលជា ឪគ្រាប់បែក មានឈ្មោះលើសគ្រាប់បែកៗណាៗទាំងអស់។ កងកម្លាំងរុស្ស៊ីបានឱ្យដឹងថា វាជាគ្រាប់បែកដែលមានអានុភាពខ្លាំងបំផុត ហើយអានុភាពរបស់វាខ្លាំងជាង ម៉ែគ្រាប់បែករបស់អាមេរិក ៤ដង ធំជាងគ្រាប់មិនមែននុយក្លេអ៊ែរទាំងអស់នៅកងកាំភ្លើងធំអាមេរិក និងធំជាងគ្រាប់បែកមិនមែននុយក្លេអ៊ែរៗណាៗទាំងអស់ដែលសហរដ្ឋអាមេរិកធ្លាប់បានប្រើលើសមរភូមិនាពេលកន្លងមក។
អតីតឧត្ដមសេនីយ៍ អ្នកវិភាគយោធា និងអតីតអនុព័ន្ធយោធាអាមេរិកលោក Rick Francona ជឿជាក់ថា រុស្ស៊ីពិតជាមានឪគ្រាប់បែកនេះពិតប្រាកដ ហើយលោកថា វាជាគ្រាប់បែកដែលមានអនុភាពបំផុតលើសគ្រាប់បែកណាៗទាំងអស់ ដោយមិនគិតគ្រាប់បែកនុយក្លេអ៊ែរ។ ទោះជាយ៉ាងណា ឪគ្រាប់បែកនេះ មិនទាន់ត្រូវបានគេប្រើប្រាស់លើសមរភូមិនោះទេ។
សូមបញ្ជាក់ថា ឪគ្រាប់បែកនេះ មានអានុភាពស្មើនឹង ៤៤ TNT ទម្ងន់តែ ៧១០០គីឡូក្រាម (ស្រាលជាងម៉ែគ្រាប់បែករបស់អាមេរិក) ខណៈផ្កាភ្លើងផ្ទុះមានអង្កត់ផ្ចិត ៣០០ម៉ែត្រ៕
ដោយ៖ យោធិន
