តើបុគ្គលអស្ចារ្យធ្វើការសម្រេចចិត្តរឿងរ៉ាវសំខាន់ៗក្នុងជីវិតដោយឆ្លាតវៃយ៉ាងដូចម្ដេច ?
នៅក្នុងជីវិតប្រចាំថ្ងៃ មនុស្សយើងម្នាក់ៗត្រូវធ្វើការសម្រេចចិត្តរឿងរ៉ាវច្រើនយ៉ាងរាប់មិនអស់ មិនថាតូចតាចឬធំដុំនោះទេ។ មិនមានសោះឡើយថាមានការសម្រេចចិត្តណាមួយ ដែលមិនតម្រូវឲ្យអ្នកខាតបង់ឬលះបង់អ្វីម្យ៉ាង ហើយនេះគឺជាចំណុចដូចគ្នាមួយនូវរាល់ផលទទួលបានពីការសម្រេចចិត្ត។ ប៉ុន្តែអ្វីដែលជាភាពខុសគ្នានូវរាល់ការសម្រេចចិត្តទាំងអស់ ស្ថិតនៅត្រង់កម្រិតមានតិចឬច្រើនទៅលើការខាតបង់រវាងវិធីនីមួយៗដែលអ្នកជ្រើសរើសដោះស្រាយបញ្ហា។ គឺកម្រិតនៃការខាតបង់តិចបំផុតតាមដែលអាចធ្វើទៅបាននេះហើយ ដែលជាលក្ខណៈមួយសម្គាល់ឲ្យការសម្រេចចិត្តដ៏ឆ្លាតវៃរបស់បុគ្គលអស្ចារ្យ។
ដូច្នេះ តើបុគ្គលអស្ចារ្យធ្វើការសម្រេចចិត្តរឿងរ៉ាវសំខាន់ៗក្នុងជីវិតដោយឆ្លាតវៃយ៉ាងដូចម្ដេច ? ការសម្រេចចិត្តដ៏ឆ្លាតវៃគឺជាផលដែលកើតឡើងមកពីការដុសខាត់សំលៀងនូវលក្ខណៈចំនួន៣ជាគោលដូចខាងក្រោមនេះ៖
១) បញ្ញាផ្នែកអារម្មណ៍៖ ការសម្រេចចិត្តដ៏ឆ្លាតវៃគឺនៅពេលអ្នកបានប្រើប្រាស់ខួរក្បាលផ្នែកទាំងសងខាងរបស់អ្នក ដែលផ្នែកខាងស្ដាំផ្ទុកដោយអារម្មណ៍ រីឯផ្នែកខាងឆ្វេងគឺជាកន្លែងគិតហេតុផល។ អារម្មណ៍របស់អ្នកគួរតែជាអ្នកមករុញច្រានអ្នក នាំផ្លូវអ្នក ប៉ុន្តែវិចារណញ្ញាណ ដែលជាការត្រិះរិះគិតថ្លឹងថ្លែងហេតុផលត្រូវតែស្ថិតនៅពីលើអារម្មណ៍របស់អ្នក ដើម្បីឲ្យអារម្មណ៍របស់អ្នកមានដែនកំណត់របស់វានៅក្រោមការត្រួតត្រារបស់វិចារណញ្ញាណ។ អ្វីដែលជាគ្រឹះមូលដ្ឋានសាងផ្លូវឲ្យអ្នកទៅដល់ការមានបញ្ញាផ្នែកអារម្មណ៍នេះ គឺជាការត្រួតពិនិត្យលើខ្លួនឯង។ ការត្រួតពិនិត្យលើខ្លួនឯង គឺជាការមានស្មារតីភ្ញាក់រលឹកដឹងខ្លួនជាប់ជានិច្ចនូវរាល់អារម្មណ៍ទាំងឡាយដែលផុសឡើងមក ពិនិត្យមើលថាតើនេះជាអារម្មណ៍អ្វី តើអ្វីអាចជាផលប៉ះពាល់ដែលកើតឡើងចេញពីវាទៅកាន់អ្នកជុំវិញខ្លួនអ្នក។ បើមកដល់ដំណាក់កាលនៃការត្រួតពិនិត្យនេះ អារម្មណ៍អវិជ្ជមានរបស់អ្នកចុះថាមពលរបស់វា នោះមានន័យថាអ្នកបានឲ្យអារម្មណ៍នេះស្ថិតក្រោមដែនកំណត់របស់វិចារណញ្ញាណហើយ។
២) គ្រប់គ្រងលើភាពមិនប្រាកដប្រជា៖ មានការសម្រេចចិត្តជាច្រើនដែលអ្នកធ្វើវាជាប់ជាប្រចាំថ្ងៃរហូតក្លាយជាទម្លាប់ ដូចជាអ្វីដែលត្រូវញាំុ សំលៀកបំពាក់អ្វីដែលគួរស្លៀកជាដើម។ ការសម្រេចចិត្តតូចតាចរបៀបនេះអាចឲ្យយើងឃើញធ្លុះដល់ភាពប្រាកដប្រជានៃលទ្ធផលដែលចេញពីការសម្រេចចិត្តបែបនេះ។ យ៉ាងណាមិញ ការសម្រេចចិត្តមួយចំនួននៅក្រៅបទពិសោធន៍ប្រចាំថ្ងៃរបស់យើង ដែលមានលក្ខណៈស្មុគស្មាញនិងហាក់មើលមិនច្បាស់ពីកោះត្រើយ។ នៅពេលជួបនឹងភាពមិនប្រាកដប្រជាចូលពាក់ព័ន្ធនឹងលទ្ធផលនៃការសម្រេចចិត្ត មនុស្សយើងច្រើនមានការភ័យខ្លាចហានិភ័យផ្សេងៗ ដែលធ្វើឲ្យមានការខាតបង់ច្រើន ទើបជំហានបន្ទាប់ដែលពួកគេធ្វើគឺព្យាយាមវិភាគសម្លឹងមើលឲ្យបានសព្វជ្រុងជ្រោយ ដោយការប្រមូលយកព័ត៌មានទាក់ទងឲ្យបានច្រើនតាមតែអាចធ្វើទៅបាន។ ព័ត៌មានច្រើននាំយើងទៅកាន់ការមើលឃើញបញ្ហាក្នុងរូបភាពធំ ជាហេតុនាំឲ្យមានដំណោះស្រាយច្រើនដែលយើងអាចរកឃើញបាន។ ប៉ុន្តែតើអ្នកមិនគិតថាជម្រើសច្រើនពេកធ្វើឲ្យអ្នកអល់អែកមួយកន្លែង មិនសម្រេចចិត្តអ្វីសោះទេឬ ? ទុកពេលខ្លះសម្រាប់ការវិភាគថ្លឹងថ្លែងពីដំណោះស្រាយបែបណាមានប្រសិទ្ធភាពចំពោះបញ្ហាមួយនោះ ប៉ុន្តែគួរតែកំណត់ពេលសមល្មមសម្រាប់ធ្វើវា។
៣) មានភាពឆ្លាតវៃក្នុងការយល់ដឹងពីអាទិភាពចំពោះកិច្ចការសំខាន់៖ តើអ្វីដែលពួកយើងអាចរៀនបានពីរបៀបដែលបុគ្គលអស្ចារ្យភាគច្រើនធ្វើការសម្រេចចិត្តរឿងសំខាន់ក្នុងការងារពួកគេ ? ចំណុចសំខាន់ស្ថិតនៅត្រង់ថា ពួកគេស្គាល់ច្បាស់ពីដំណើរការណ៍នៃខួរក្បាលរបស់ខ្លួនឯង សំដៅលើពេលណាវាធ្វើការប្រកបដោយប្រសិទ្ធភាពបំផុតនេះឯង។ កិច្ចការកាន់តែសំខាន់ អ្នកទាំងនោះកាន់តែត្រូវផ្ដល់អាទិភាពមុនគេទៅលើវា ក៏ព្រោះតែថាមពលខួរក្បាលរបស់យើងដែលធ្វើការសម្រេចចិត្តរឿងរាប់រយជំពូកក្នុងមួយថ្ងៃៗ នឹងចុះថយបន្តិចម្ដងៗ។ ម្យ៉ាងទៀតចំពោះការសម្រេចចិត្តទៅលើកិច្ចការតូចតាចគួរតែប្ដូរវាឲ្យក្លាយជាទម្លាប់ ឬក៏ចាំគិតពីវាពេលរួចរាល់ពីការងារមុននឹងចូលគេង។
ដូចអតីតប្រធានាធិបតីសហរដ្ឋអាមេរិក បារ៉ាក់ អូបាម៉ាធ្លាប់និយាយថា៖ "អ្នកនឹងឃើញថាខ្ញុំស្លៀកពាក់តែឈុតសំលៀកបំពាក់ពណ៌ប្រផេះ ឬពណ៌ខៀវប៉ុណ្ណោះ។ ខ្ញុំព្យាយាមកាត់បន្ថយការសម្រេចចិត្តរបស់ខ្ញុំ។ ខ្ញុំមិនចង់សម្រេចចិត្តទៅលើអ្វីដែលគួរញាំុ ឬគួរស្លៀកពាក់នោះទេ ព្រោះខ្ញុំមានការសម្រេចចិត្តជាច្រើនផ្សេងទៀតដែលត្រូវធ្វើ។" ៕
ប្រែសម្រួល៖ ស្រីពៅ ប្រភព៖ gbr.pepperdine.edu & inc
អត្ថបទទាក់ទង៖ គន្លឹះសំខាន់ៗ ជួយឲ្យអ្នកក្លាយជាមនុស្សពូកែគិត ទោះបញ្ហាអ្វីក៏អាចដោះស្រាយចេញ
