បើយុវជនកម្ពុជាចំណាយពេលចូលរួមសិក្ខាសាលាផ្សេងៗបានច្រើន នឹងទទួលបានផ្លែផ្កាសំខាន់ៗទាំង៤នេះ
បច្ចុប្បន្ននេះ នៅប្រទេសកម្ពុជា ជាពិសេសនៅក្នុងទីក្រុងភ្នំពេញ គឺមានសិក្ខាសាលាល្អៗជាច្រើន ដែលត្រូវបានបង្កើតឡើងដោយក្រុមហ៊ុន អង្គការ សមាគម និង សម្ព័ន្ធយុវជនផ្សេងៗ ដោយផ្ដោតលើប្រធានបទផ្សេងៗគ្នា ប៉ុន្តែយុវជនហាក់ដូចជា មិនសូវសកម្ម ឬ ឲ្យតម្លៃខ្លាំងលើវានៅឡើយ។ ខាងក្រោមនេះ ជាហេតុផលសំខាន់ៗដែលអ្នកគួរចូលរួមសិក្ខាសាលាឲ្យបានច្រើនតាមតែអាចធ្វើទៅបាន៖
១) មានឱកាសសិក្សា និង យល់ដឹងបន្ថែមលើប្រធានបទនីមួយៗ៖ សិក្ខាសាលាទាំងនោះ គឺជាឱកាសមួយដ៏សំខាន់សម្រាប់យុវជនក្នុងការសិក្សា និង យល់ដឹងបន្ថែមទៀតអំពីដំណើរការ និង រឿងរ៉ាវផ្សេងៗដែលទាក់ទងនឹងប្រធានបទនីមួយៗព្រោះថា ក្នុងនោះ តែងតែមានវាគ្មិន ដែលជាអ្នកជំនាញមកពន្យល់ និងបកស្រាយ។
២) ស្គាល់មិត្តភ័ក្ដិ និង បណ្ដាញ៖ ត្រូវចាំថា មនុស្សដែលចូលរួមសិក្ខាសាលា ភាគច្រើនគឺសុទ្ធតែតែជាមនុស្សដែលផ្ដល់តម្លៃខ្លាំងទៅលើចំណេះដឹង ហើយប្រហែលជាអ្នកខ្លះកំពុងបម្រើការងារនៅតាមក្រុមហ៊ុន ឬ ស្ថាប័នផ្សេងៗ។ នេះហើយជាឱកាសដែលអ្នកត្រូវស្គាល់មនុស្សសំខាន់ៗទាំងនេះ ហើយកាលណាស្គាល់កាន់តែច្រើន គឺកាន់តែល្អ ព្រោះ អ្នកទាំងនោះនឹងក្លាយជាមនុស្សដ៏សំខាន់ក្នុងការរុញច្រានឲ្យការងាររបស់អ្នកជោគជ័យទៅបានយ៉ាងលឿន។
៣) ពង្រឹងជំនាញទំនាក់ទំនង៖ មនុស្សមួយចំនួន ពូកែណាស់ខាងរៀនសូត្រ ប៉ុន្តែបើនិយាយអំពីការទំនាក់ទំនងក្នុងសង្គមវិញ គឺនិយាយមិនចេញ។ ដូច្នេះហើយបើទំនាក់ទំនងក្នុងសង្គមខ្សោយហើយ កុំសង្ឃឹមថា អាចធ្វើការងារណាមួយបានជោគជ័យដោយងាយឲ្យសោះ ព្រោះអ្នកម្នាក់ឯងគឺ ទៅមិនរួចឡើយ។ ដូច្នេះហើយបើកាលណាអ្នកចូលរួមកាន់តែច្រើន នោះអ្នកនឹងអាចមានលទ្ធភាពក្នុងការពង្រឹងជំនាញទំនាក់ទំនងរបស់ខ្លួន ហើយក្លាយជាមនុស្សម្នាក់ដែលងាយចុះសម្រុងជាមួយអ្នកដទៃ។
៤) បង្កើតភាពរីករាយ៖ ចូលរួមក្នុងសិក្ខាសាលាផ្សេងៗ មិនមែនចំណេញត្រឹមទទួលបានចំណេះដឹង និង បង្កើតទំនាក់ទំនងនោះទេ តែវាក៏ជួយឲ្យអ្នកមានអារម្មណ៍ស្រស់ស្រាយ និង សប្បាយចិត្តនៅពេលជួបមនុស្សថ្មីៗ។ ដូច្នេះហើយ ជាជាងបង្កើតការសប្បាយតាមរយៈការជួបជុំមិត្តភ័ក្ដិផឹកស៊ី ឬ ធ្វើរឿងមិនល្អ អ្នកគួរតែបង្កើតភាពរីករាយតាមរយៈការចូលរួមសិក្ខាសាលាផ្សេងៗវិញល្អជាង។
សូមបញ្ជាក់ថា ស្ទើរតែរៀងរាល់សប្ដាហ៍សិក្ខាសាលាផ្សេងៗ ត្រូវបានគេប្រារព្ធឡើង ទាំងនៅក្នុងគ្រឹះស្ថានសិក្សា មជ្ឈមណ្ឌលពាណិជ្ជកម្ម និង ទីកន្លែងសាធារណៈមួយចំនួនទៀត ដូច្នេះហើយដើម្បីទទួលបានដំណឹងសិក្ខាសាលាទាំងនោះ លោកអ្នកគប្បីតាមដានដំណឹងផ្សេងៗនៅតាមបណ្ដាញសង្គម និង គេហទំព័រមួយចំនួន ព្រោះវាជាចរន្តដ៏សំខាន់ ដើម្បីទទួលបានព័ត៌មាន៕
ដោយ៖ រតនា វិចិត្រ
