បើអ្នកចង់កែខ្លួនពីសិស្សគម្រក់ មកជាសិស្សគំរូវិញ អ្នកគួរតែអនុវត្តតាមវិធីសាស្ត្រទាំងនេះ
តើអ្នកចង់ក្លាយជាសិស្សនិទ្ទេសA ទេ? តាមពិតទៅវាមិនពិបាកទេរហូតដល់ធ្វើមិនបាននោះទេ ឲ្យតែអ្នកមានឆន្ទៈថាចង់ធ្វើនោះ។ វាមិនពិបាកឡើយ ព្រោះថាអ្នកដទៃ មានខួរក្បាលមួយ ដៃ២ជើង២ ដូចអ្នកដែរ តែគេអាច រៀនពូកែ ចុះហេតុអ្វីអ្នកមិនអាចនោះ វាសំខាន់ត្រង់ថា អ្នកប្រើវិធីសាស្រ្តអ្វីប៉ុណ្ណោះ ហើយអ្នកពិតជាចង់កែខ្លួនពីសិស្សគ្មានបានការមកជាសិស្សឆ្នើមវិញឬអត់? សាកអនុវត្តតាមវិធីទាំងនេះសិនទៅ៖
១) ខំរៀនឲ្យខ្លាំងជាងគេ៖ សាកចំណាយពេល១ខែសិនទៅមើលថា តើការខិតខំវានាំលទ្ធផលដូចម្ដេច? វាពិបាកតែពេលដំបូងទេ តែបើអ្នកអាចជម្នះវាបាន ជឿថាអ្នកនឹងធ្វើបានបន្តបន្ទាប់ទៀត។
២) ស្ដាប់គ្រូ៖ អ្នកគួរតែស្ដាប់ មិនមែនស្ដាប់ចេញពី១ចូល១ទេ។ តាមពិតទៅបើចំណាយពេលស្ដាប់គ្រូ៥០ភាគរយក៏ចេះដែរ សំខាន់កុំឲ្យតែខ្ជិលស្ដាប់។
៣) កុំពន្យារពេល៖ សិស្សខ្ជិលចូលចិត្តពន្យារពេលណាស់។ ដូចនេះបើចង់ពូកែ អ្នកគួរសាកឈប់ពន្យារពេលក្នុងការធ្វើកិច្ចការផ្ទះសិនទៅមើល ហើយថាតើលទ្ធផលទទួលបានវាល្អយ៉ាងណាវិញ?
៤) កុំខ្វល់ពីអ្នកដទៃដែលរំខានអ្នក៖ អ្នកមិនអាចគេចផុតពីមិត្តភ័ក្ដិខ្ជិលៗ ដែលតែងតែចង់អូសទាញអ្នកកុំឲ្យរៀនបានទេ។ ដូចនេះអ្នកត្រូវតាំងចិត្តខ្លួនឯងឲ្យមុតមាំថា ទោះគេបបួលយ៉ាងណា ក៏ខ្លួនមិនចុះញ៉មដែរ៕
ដោយ ៖ ព្រំ សុវណ្ណកណ្ណិកា
