កញ្ញា អេង គីមហុង អ្នកសារព័ត៌មានវិទ្យុបារាំងRFI៖ «ក្លាយជា អ្នកសារព័ត៌មានដ៏ល្បីម្នាក់ គឺជាក្ដីសុបិនរបស់ខ្ញុំតាំងពីតូច»
កញ្ញាអេង គីមហុង បានប្រឡូកក្នុងវិស័យសារព័ត៌មានអស់រយៈពេល ៥ ទៅ ៦ឆ្នាំមកហើយ រហូតអភិវឌ្ឍខ្លួនទៅជាអ្នក អ្នកសារព័ត៌មានប្រចាំនៅវិទ្យុបារាំងអន្តរជាតិ ឬ គ្រប់គ្នាស្គាល់ថា វិទ្យុRFI ដែលជាស្ថាប័នសារព័ត៌មានល្បីល្បាញមួយក្នុងប្រទេសកម្ពុជា។ អ្នកសារព័ត៌មានវ័យក្មេងរូបនេះ បានបញ្ជាក់ថា ក្លាយជាអ្នកសារព័ត៌មាននៅពេលនេះ គឺជាអ្វីដែលខ្លួនចង់បានតាំងពីតូចមកម្ល៉េះ។
ធ្វើជាអ្នកសារព័ត៌មានមិនមែនជារឿងងាយស្រួលនោះទេ ព្រោះត្រូវតាមដានព័ត៌មានច្រើន ហើយត្រូវចេញទៅខាងក្រៅដើម្បីសម្ភាស និង ប្រមូលយកព័ត៌មាន ជាពិសេសក្នុងនាមជាមនុស្សស្រី គឺដូចជាពិបាកជាងមនុស្សប្រុសបន្តិច ប៉ុន្តែវាមិនមែនជាបញ្ហាធំនោះទេប្រសិនបើ យើងពិតជាស្រលាញ់ផ្នែកនេះមែន។ «មានភាពអៀនខ្មាសតិចពេលចេញក្រៅ ព្រោះខ្លួនជាស្រី អ៊ីចឹងហាក់ដូចជាមិនសូវហ៊ានរត់ឬ ដេញតាមប្រភព លុះត្រាតែអ្នកកាសែតប្រុសៗហ្នឹងគាត់ចាប់ផ្ដើមមុនទើបរាងក្លាហានបន្តិច»។ នេះជាសម្ដីរបស់ គីម ហុងដែលរៀបរាប់អំពីឧបសគ្គខ្លះៗនៅពេលចុះទៅយកព័ត៌មាន និង ស្រង់យកប្រភពសំខាន់ៗ ដើម្បីសរសេរជាអត្ថបទដ៏ល្អមួយសម្រាប់ចេញផ្សាយ។ ឆ្លងកាត់បទពិសោធន៍ក្នុងវិស័យសារព័ត៌មានអស់រយៈពេលជាច្រើនឆ្នាំ ធ្វើឲ្យកញ្ញា គីមហុង មានអារម្មណ៍ថា កាន់តែស្រលាញ់វិស័យនេះ ជាពិសេសនោះអ្នកសារព័ត៌មានអាចជួយនាំសាររបស់ប្រជាជនដែលកំពុងមានបញ្ហា ឲ្យជួបនឹងដំណោះស្រាយបាន។ «សំខាន់ត្រង់ថា អ្នកកាសែតប្រដូចបាននឹងព្រាបនាំសារពីបញ្ហាទៅរកដំណោះស្រាយ។ ដ្បិតតែមិនបានដោះស្រាយតែក៏គេបានឮដែរ»។ គីម ហុងបញ្ជាក់។
ប៉ុន្តែយ៉ាងណាក៏ដោយ អ្នកសារព័ត៌មានស្រីវ័យក្មេងរូបនេះ ក៏បានលើកឡើងពីផលអវិជ្ជមានផងដែរ ប្រសិនបើអ្នកសារព័ត៌មានមិនគោរពតាមវិជ្ជាជីវៈ ព្រោះវានឹងបំផ្លាញសង្គមទៅវិញ។ «ហេតុអ្វីបានជាខ្ញុំហ៊ាននិយាយអ៊ីចឹង ឧទាហរណ៍ ចុងប៊ិចអ្នកកាសែត អាចធ្វើឲ្យមានសភាពការណ៍ពីល្អទៅអាក្រក់ ពីអាក្រក់មកល្អ។ ជាក់ស្ដែងអត្ថបទមួយព្យាយាមលាបពណ៌ (ក ) ដោយមិនផ្ដល់ក្បាលមីក្រូទៅឲ្យ(ក) បកស្រាយសោះ»។ បើទោះបីជា បច្ចុប្បន្ននេះហាក់ទទួលបានភាពជោគជ័យក្នុងវិស័យនេះក្ដី ជាពិសេសបាននឹងកំពុងបម្រើការងារក្នុងស្ថាប័នដ៏ល្បីឈ្មោះ បូករួមនឹងប្រាក់ខែខ្ពស់លើសពីអ្នកសារព័ត៌មានផ្សេងទៀត ឬ អ្នកមានអាជីពការងារផ្សេងមួយចំនួនក្ដី ជាពិសេសអ្នកដែលមានវ័យប្រហាក់ប្រហែលគ្នា ប៉ុន្តែ កញ្ញា អេង គីមហុង និយាយថា ខ្លួនមិនទាន់ទទួលបានភាពជោគជ័យពេញលេញអ្វីនៅឡើយ ព្រោះ មានចំណុចច្រើនទៀតដែលត្រូវរៀន និងពង្រឹងខ្លួនឲ្យខ្លាំងជាងមុន។ កញ្ញាបានលើកទឹកចិត្តដល់យុវជន ឬ ក្មេងៗជំនាន់ក្រោយឲ្យចូលបម្រើការក្នុងវិស័យនេះ ហើយថា ដើម្បីក្លាយជាអ្នកសារព័ត៌មានអាជីពម្នាក់បាន គឺត្រូវកើតចេញពីទឹកចិត្តស្រលាញ់ជាមុនសិន ព្រោះបើមិនស្រលាញ់ទេ នោះនឹងធ្វើការបានបន្តិចប្រាកដជារត់ចោលមិនខាន ដោយសារតែអ្នកសារព័ត៌មានត្រូវធ្វើការច្រើន ហើយពេលខ្លះគ្មានថ្ងៃសៅរ៍ ឬ អាទិត្យនោះទេ។ ចំណុចសំខាន់មួយទៀត គឺត្រូវព្យាយាមតាមដានស្ដាប់ រាល់ព្រឹត្តិការណ៍ដែលកើតឡើងក្នុងស្រុក និង ក្រៅស្រុកឲ្យបានច្រើនតាមតែអាចធ្វើបាន ព្រោះអ្នកសារព័ត៌មានត្រូវដឹងច្រើនជាងអ្នកស្ដាប់ ទើបអាចពន្យល់អ្នកស្តាប់ ឬ អ្នកអានឲ្យយល់បាន។ ចំណុចមួយចុងក្រោយដែលមិនអាចខ្វះបាននោះ គឺការពុះពារ និង អត់ធ្មត់រាល់ពេលជួបការលំបាកម្តងៗ ដើម្បីប្រាកដថា យើងនៅតែអាចបន្តដំណើរទៅមុខបាន៕
ដោយ៖រតនា វិចិត្រ
